ឃឹម ឌីម៉ា ៖ ខ្ញុំវ៉ៃទាំងឈឺដៃ ក៏ព្រោះចង់បានមេដាយមាស ជូនប្រជាជនខ្មែរយើង

2017-08-30 01:01:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ឃុន ឌីម៉ា ឬបងប្អូនធ្លាប់តែស្គាល់ឈ្មោះថា ឃឹម ឌីម៉ា នោះ ជាកីឡាករប្រដាល់សេរីកម្ពុជាតែម្នាក់គត់ដែលទទួលបានមេដាយមាសក្នុងព្រឹត្តិការណ៍ស៊ីហ្គេមលើកទី២៩នៅប្រទេសម៉ាឡេស៊ីនេះ។

អ្នកប្រដាល់នៅខេត្តបន្ទាយមានជ័យរូបនេះ មានបញ្ហាឈឺដៃតាំងពីប្រកួតដំបូងមកម្ល៉េះ ប៉ុន្តែរូបគេនៅតែធ្វើបានល្អ ហើយតែងតែប្ដូរកែងធ្វើឱ្យដៃគូចុះចាញ់បានរហូត។ ហេតុផលដែលទ្រាំវ៉ៃទាំងឈឺនេះដែរ ឌីម៉ា ប្រាប់ថាខ្លួនជាជនជាតិកម្ពុជា ត្រូវធ្វើគ្រប់យ៉ាងដើម្បីជាតិខ្លួនឯង អ្វីដែលអាចធ្វើបានត្រូវតែធ្វើ មិនស្ដាយក្រោយនោះទេ។ កីឡាករគេហៅថា នាគខ្មៅ រូបនេះសឹងតែបោះបង់ការប្រកួតនៅទឹក៣ទៅហើយសម្រាប់វគ្គផ្ដាច់ព្រ័ត្រ ប៉ុន្តែដោយសារចិត្តនិងបេះដូងបញ្ជាថាត្រូវតែប្រកួត ទើបខ្លួនវ៉ៃទាំងឈឺដៃ រហូតទាល់តែបានជ័យជម្នះតែម្ដង។

សម្រាប់មេដាយមាសនេះដែរ ឌីម៉ា ថាមិនមែនសម្រាប់តែខ្លួនឯងម្នាក់ទេ វាជាមេដាយសម្រាប់បងប្អូនប្រជាជនកម្ពុជាទាំងអស់។ ប្រដាល់នេះ ជាកីឡាមានជាយូរមកហើយនៅស្រុកខ្មែរ ដូច្នេះឌីម៉ា មិនធ្វើឱ្យបងប្អូនអស់សង្ឃឹមនោះទេ៕