មិនងាយទេ! ទម្រាំស្រកទម្ងន់ តារាថៃ ៧រូបនេះប្រឹងអនុវត្តច្រើនវិធីណាស់!

2017-09-25 04:23:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ឡើងទម្ងន់ គឺជាបញ្ហាកង្វល់មួយរបស់តារាៗ ជាពិសេសវាក៏ជាផ្នែកមួយអាចប៉ះពាល់ដល់ប្រជាប្រិយភាពរបស់ពួកគេដែរ។ ពិតណាស់ នៅពេលជួបបញ្ហានេះ សិល្បករ-សិល្បការិនីទាំងអស់ តែងព្យាយាមរិះរកវិធីផ្សេងៗ ដូចជាលំហាត់ប្រាណ និងប្រុងប្រយ័ត្នចំពោះរបបអាហារជាដើម ដើម្បីទទួលបានរាងស្អាត សង្ហារបស់ខ្លួនមកវិញ។

ខាងក្រោមនេះជា តារាថៃទាំង ៧ដួងដែលធ្លាប់មានរាងធាត់បែកសាច់ទ្រលុកទ្រលន់ ហើយប្រែជាមានរាងស្អាតវិញ។ តើពួកគេមានវិធីសាស្ត្រអ្វីខ្លះ ដើម្បីថែរាង៖

១. តារាចម្រៀង Gam The Star

នាងធ្លាប់ឡើងទម្ងន់រហូតទៅដល់ ៧០គីឡូឯណោះ ប៉ុន្តែពេលនេះនាងមានរាងស្អាតប្លែក នៅសល់តែ ៥០គីឡូប៉ុណ្ណោះ។ មូលហេតុដែលធ្វើឲ្យតារាស្រីរូបនេះស្រកទម្ងន់ គឺដោយសារនាងទម្លាប់មិនញ៉ាំបាយល្ងាច និងធ្វើលំហាត់ប្រាណទៀងទាត់។

២. តារាសម្ដែង Kimberley

Kim ក៏ជាតារាស្រីម្នាក់ដែលធ្លាប់មានរាងម៉ាប់ដែរ តែក្រោយមកនាងក៏ស្រកវិញ អស់ ២០គីឡូ ដោយសារយុទ្ធសាស្រ្តផ្ទាល់ខ្លួន។ មិត្តស្រីរបស់ Mark Prin រូបនេះ តែងញ៉ាំផ្លែប៉ោមពណ៌ខៀវ ជំនួសអាហារពេលល្ងាច ព្រោះតែផ្លែឈើនេះសម្បូរទៅដោយសារជាតិហ្វៃបឺរ ដែលមានប្រយោជន៍ខ្ពស់សម្រាប់អ្នកចង់សម្រកខ្លាញ់។ យ៉ាងណាមិញ នាងក៏ញ៉ាំសាច់ដែរ ប៉ុន្តែញ៉ាំតែ ២ដងប៉ុណ្ណោះក្នុងមួយសប្ដាហ៍។ ក្រៅពីនេះ នាងហាត់យូហ្គា និងហាត់ប្រាណជាហូរហែផងដែរ។

៣. តារាសម្ដែង Ploy Chermarn

កាលពីប៉ុន្មានឆ្នាំមុន Ploy មានរាងធាត់ណាស់ ប៉ុន្តែដោយសារការប្រឹងប្រែងហាត់ប្រាណជាប្រចាំ និងគ្រប់គ្រងរបបអាហារបានត្រឹមត្រូវ ទើបនាងប្រែជាមានរាងស្អាតគួរឲ្យទាក់ទាញដូចសព្វថ្ងៃ។

៤. តារាចម្រៀង Kangsom Tanatat

មុនពេលចូលសិល្បៈ Kangsom គឺជាក្មេងប្រុសម៉ាប់ម្នាក់ តែបន្ទាប់ពីហាត់ប្រាណមិនឈប់ ទើបលោកប្រែជាប្រុសសង្ហា ជាទីប្រាថ្នារបស់នារីៗជាច្រើនវិញ។

៥. តារាចម្រៀង Waii Panyarisa

រីឯស្រីស្អាត Waii វិញ បានប្រែពីនារីរាងមូលតាល់ មកមានរាងរាងស្លីមវិញ។ នេះជាលទ្ធផលគួរជាទីពេញចិត្ត ក្រោយញ៉ាំតែផ្លែឈើ និងបន្លែ បូកផ្សំនឹងហាត់ប្រាណ និងរាំជាប្រចាំ។

៦. តារាសម្ដែង Alek Teeradetch

ប្រិយមិត្តខ្លះអាចភ្ញាក់ផ្អើល ពេលដឹងថាពីមុន ប្រុសសង្ហា Alek មានទម្ងន់ដល់ទៅ ៩៥គីឡូ។ ប៉ុន្តែដោយសារ ជ្រើសយកអាហារដែលមានកាឡូរីទាប បូករួមនឹងការធ្វើលំហាត់ប្រាណ ពីមួយថ្ងៃទៅមួយថ្ងៃ ទើបធ្វើឲ្យលោកមានរាងមាំទាំសង្ហាវិញ។

៧. តារាកំប្លែង Kootee

តួកំប្លែងសម្បូរវោហារមិនចេះរីងស្ងួតនេះ បានសម្រកទម្ងន់ដោយជោគជ័យ ដោយស្រកអស់ជាង ២០គីឡូ និងបានក្លាយខ្លួនជាមនុស្សថ្មីម្នាក់ទៀត មានរាងសង្ហាជាងមុន។ វិធីងាយៗដែល ធ្វើឲ្យលោកស្រកទម្ងន់ គឺដោយសារលោកហាត់ប្រាណ និងញ៉ាំអាហារយ៉ាងត្រឹមត្រូវ៕

ចុចអាន៖

ប្រភព៖ posttoday ប្រែសម្រួល៖ យី សុធារី