ថូផ្កាចិន រំពឹងលក់បាន ៥០០ដុល្លារ ចុងក្រោយត្រូវគេទិញ លើសថ្លៃដើម១ម៉ឺនដង

2017-09-26 02:25:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ថូផ្កាចិនមួយ ត្រូវបានលក់លើសតម្លៃរំពឹងទុក រហូតដល់ទៅ ១០ ០០០ ដង នៅឯកន្លែងលក់ដេញថ្លៃមួយកន្លែង ក្នុងទីក្រុងហ្សឺណែវ ប្រទេសស្វីស បន្ទាប់ពីមនុស្ស ២ នាក់ ដែលជឿជាក់ថាវាមកពីសតវត្សទី១៨ បានចូលរួមនៅក្នុងការដេញថ្លៃនោះ។

ថូផ្កាពណ៌លឿង កម្ពស់ ៥៨ សង់ទីម៉ែត្រ ដែលមានរូបនាគ ៣ ក្បាលព័ទ្ធជុំវិញនោះ ត្រូវបានលក់ក្នុងតម្លៃរហូតដល់ទៅ ៥ លានហ្វ្រង់ស្វីស (ប្រហែល ៥,១ លានដុល្លារអាមេរិក) បន្ទាប់ពីវាត្រូវបានគេកំណត់តម្លៃដំបូងចន្លោះពី ៥០០ ដល់ ៨០០ ហ្វ្រង់ស្វីស (៥១៣ ដល់ ៨២២ ដុល្លារអាមេរិក) ប៉ុណ្ណោះ។

បើតាមការពិពណ៌នានៃថូផ្កាដែលត្រូវបានដាក់លក់ដេញថ្លៃនោះ បានឲ្យដឹងថា វាជាថូផ្កាសតវត្សទី២០ នេះ ប៉ុន្តែវាមានសញ្ញាសម្គាល់ពីសតវត្សទី១៨ នាសម័យ Qianlong ទើបធ្វើឲ្យអ្នកទិញ ២ នាក់ខាងលើ សម្រេចចិត្តដេញថ្លៃរហូតដល់ឡើងថ្លៃខ្ពស់ដ៏ថ្នាក់នេះតែម្ដង។

គួរបញ្ជាក់ថា ការដេញថ្លៃនោះបានធ្វើឡើងកាលពីថ្ងៃព្រហស្បតិ៍ នាសប្ដាហ៍មុន នៅឯកន្លែងដេញថ្លៃ Geneve-Encheres ដោយមានមនុស្ស ២ នាក់បានចូលរួមដេញថ្លៃយ៉ាងតានតឹងបំផុត ដោយសារតែជឿជាក់ថា ថូផ្កានោះមកពីសតវត្សទី១៨។ នៅចុងបញ្ចប់ អ្នកឈ្នះបានទៅលើអ្នកទិញមិនបញ្ចេញឈ្មោះម្នាក់ មកពីតំបន់អាស៊ី ដែលស្ថិតនៅក្នុងបន្ទប់ដេញថ្លៃផ្ទាល់ ខណៈគូប្រជែងរបស់គេ បានដេញថ្លៃតាមរយៈទូរសព្ទ។

យ៉ាងណាមិញ បើបូករួមទាំងតម្លៃកម្រៃជើងសា ថូផ្កានោះមានតម្លៃសរុប រហូតដល់ទៅ ៦,០៨ ហ្វ្រង់ស្វីស (៦,១ លានដុល្លារអាមេរិក) ឯណោះ៕

ចុចអាន៖

ប្រភព៖ nextshark ប្រែសម្រួល៖ សេង ឡុង