ព្រះករុណាព្រះបាទនរោត្ដម សីហមុនី បានប្រោស​ព្រះរាជទាន​នូវ​គ្រឿង​ឥស្សិរយស​ថ្នាក់​ខ្ពង់ខ្ពស់​បំផុត​ចំនួន ៤​ដល់​ព្រឹទ្ធាចារ្យ វណ្ណ ម៉ូលីវណ្ណ ដែលជាបិតាស្ថាបត្យកម្មខ្មែរ ក្រោយលោកទទួលមរណភាព។ ព្រះរាជទាន នៃ​គ្រឿង​ឥស្សិរយស​នេះ បានធ្វើឱ្យប្រជាពលរដ្ឋខ្មែរទូទាំងប្រទេសមានចម្ងល់ថា ហេតុអ្វីបានជាលោកតា វណ្ណ ម៉ូលីវណ្ណ ទើប​តែ​ទទួល​បាន​ក្រោយ​លោក​ទទួលមរណភាពហើយ?

ពាក់ព័ន្ធនឹងមន្ទិលនេះ ឯកឧត្ដម ហង់ ពៅ អគ្គនាយករងអជ្ញាធរជាតិអប្សរា ដែលធ្លាប់ធ្វើការច្រើនជាមួយលោកតា វណ្ណ ម៉ូលីវណ្ណ បានពន្យល់ថា លោកតា ជាមនុស្សម្នាក់ដែលមិនងាយនឹងជួប និងមិនងាយនឹងនិយាយផ្ទាល់នោះទេ លុះត្រា​កម្មវិធី​ប្រជុំធំៗថ្នាក់ជាតិ ទើបលោកបង្ហាញវត្តមាន។ ចំណែកឯគ្រឿងឥស្សិរយស ដែលរាជរដ្ឋាភិបាល ក៏ដូចជា​ព្រះបរមរាជវាំង​ចង់ប្រគល់ជូន គឺមិនស្មើនឹងតម្លៃ នៃអ្វីដែលលោកបានធ្វើនោះទេ មានន័យថា សមិទ្ធផលធំៗជាច្រើន ដែលលោកបានកសាង គឺមានតម្លៃជាង គ្រឿងឥស្សិរសទាំងនោះទៅទៀត។ ដូច្នេះហើយ ទើបលោកតា វណ្ណ ម៉ូលីវណ្ណ មិនចង់ទទួលយកគ្រឿងឥស្សិរយសទាំងនោះឡើយ។

ដូចនេះឆ្លើយតបទៅនឹងការលើកឡើងពីសំណាក់ប្រជាពលរដ្ឋ មិនមែនរដ្ឋាភិបាលមិនគិតគូរ ចំពោះ​ការ​ប្រគល់​ជូន​គ្រឿង​ឥស្សិរយស​ឡើយ។ ប៉ុន្តែហេតុផលដ៏សំខាន់មួយ គឺលោកតា វណ្ណ ម៉ូលីវណ្ណ សប្បាយចិត្​តនូវអ្វីដែល​លោក​បាន​ធ្វើ​ជូន​ជាតិ​មាតុភូមិ​កម្ពុជា ចេញពីក្ដីស្រឡាញ់ ចេញពីក្រអៅបេះដូងដ៏ពិតប្រាកដ មិនមែនដោយសារចង់បានគ្រឿងឥស្សិរយស ដោយ​ប្រការ​ណាមួយឡើយ។ នេះបើតាម ការបញ្ជាក់បន្ថែមរបស់ ឯកឧត្ដម ហង់ ពៅ។

សូមជម្រាបជូនថា ព្រះករុណាព្រះបាទ នរោត្ដម សីហមុនី ព្រះមហាក្សត្រ នៃព្រះរាណាចក្រកម្ពុជា បាន​ព្រះរាជទាន​គ្រឿង​ឥស្សិរយស​ចំនួន ៤ ដ៏ខ្ពង់ខ្ពស់បំផុតមានដូចជា៖

១. ជាតូបការ

២. មុនីសារាភ័ណ្ឌ ថ្នាក់មហាសេរីវឌ្ឍន៍

៣. សវត្ថារា ថ្នាក់មហាសេរីវឌ្ឍន៍

៤. សម្ដេចព្រះមហាក្សត្រយានី ព្រះស៊ីសុវត្ថិ មុនីវង្ស កុសមៈនារីរ័ត្ន ថ្នាក់មហាសេរីវឌ្ឍន៍

អត្ថបទ៖ វឌ្ឍនៈ