ដឹងទេទម្រាំគូរប្លង់ហើយមួយៗ វីរស្ថាបត្យករ វណ្ណ ម៉ូលីវណ្ណ ប្រើពេលប៉ុន្មាន?

2017-10-04 10:32:59
ចំនួនមតិ 0 | ចំនួនចែករំលែក 0

ចន្លោះមិនឃើញ

បើតាមការរៀបរាប់របស់បណ្ឌិត មីសែល ត្រាណេ បុរាណវិទូដ៏ល្បីល្បាញបំផុតក្នុងការចងក្រងប្រវត្តិសាស្ត្រ វប្បធម៌ អរិយធម៌របស់កម្ពុជា បានលើកឡើងថា ការលេចធ្លោប្រាសាទអង្គរវត្ត ក៏ដូចជាស្នាដៃរបស់បុព្វបុរសខ្មែរជាច្រើន មិនមែនជារឿងចៃដន្យនោះទេ សុទ្ធតែត្រូវការពេលគិតរាប់ឆ្នាំ និងមានការសិក្សាជ្រៅជ្រះបំផុត។ មិនខុសអីពីស្នាដៃធំៗរបស់ឯកឧត្ដមបណ្ឌិត វណ្ណ ម៉ូលីវណ្ណ ទម្រាំអាចគូរប្លង់មួយបានដូចជា ពហុកីឡដ្ខានជាតិអូឡាំពិក វិមានឯករាជ្យ សាលមហោស្រពចតុមុខ លោកត្រូវប្រើរយៈចាប់ពី ៥ឆ្នាំ ទៅ៨ឆ្នាំឯណោះ។

លោកបណ្ឌិត មីសែល ត្រាណេ

**"បើនិយាយពីការគូរប្លង់មួយៗរបស់លោកគឺអាស្រ័យទៅលើទំហំក្មួយ តែបើនិយាយពីរយៈពេលវិញ គឺតាំងពីក្មួយឯងនៅវាររហូតដល់ចេះដើរ"។ នេះជាសម្ដីពិតរបស់លោកបណ្ឌិត មីសែល ត្រាណេ។**

លោកបណ្ឌិត មីសែល ត្រាណេ សង្កត់ធ្ងន់ថា ក្នុងផ្នត់គំនិតដែលប្រកាន់ភ្ជាប់ជានិច្ចរបស់ឯកឧត្ដម វណ្ណ ម៉ូលីវណ្ណ គឺ ទោះបីជាទំនើបយ៉ាងណាក៏មិនចោលលក្ខណៈជាខ្មែរដាច់ខាត (បង្កើតថ្មីលើមូលដ្ឋានចាស់។ ដូច្នេះហើយទើបរាល់ស្នាដៃនីមួយៗរបស់លោកសុទ្ធតែមានរចនាប័ទ្មបែបខ្មែរ ស្ទើរតែទាំងអស់។ លោកបណ្ឌិតក៏បានបន្ថែមទៀតថា មុននឹងលេចចេញស្នាដៃនីមួយៗ ឯកឧត្ដម វណ្ណ ម៉ូលីវណ្ណ ក៏មានការីឆ្វេងស្ដាំជាច្រើនរូប ដែលសុទ្ធសឹងតែជាអ្នកជំនាញផ្នែកស្ថាបត្យកម្ម មានទាំងជនជាតិបារាំង និងខ្មែរ។

ចរិតលក្ខណៈរបស់ឯកឧត្ដម វណ្ណ មូលីវណ្ណ ជាបិតាស្ថាបត្យកម្មខ្មែរ គឺជាមនុស្សម៉ឺងម៉ាត់ច្បាស់លាស់នឹងការងារបំផុត មិនងាយនឹងនិយាយលេងសើចទេ។ តែលោកជាអ្នកដែលស្រឡាញ់ ថែរក្សាការពារនូវសម្បត្តិវប្បធម៌របស់ខ្មែរ សឹងតែក្នុងមួយជីវិតរបស់លោកកើតមកដើម្បីតែ វប្បធម៌ សិល្បៈខ្មែរប៉ុណ្ណោះ។ នេះបើតាមការលើកឡើងបន្ថែមទៀតរបស់ លោកបណ្ឌិត មីសែល ត្រាណេ។

វិមានឯករាជ្យ ស្នាដៃរបស់ឯកឧត្ដម វណ្ណ ម៉ូលីវណ្ណ

ជាចុងក្រោយ លោកបណ្ឌិត មីសែល ត្រាណេ ចង់ឱ្យកូនខ្មែរជំនាន់ក្រោយយកគំរូតាម ឯកឧត្ដម វណ្ណ ម៉ូលីវណ្ណ ដើម្បីវប្បធម៌ អរិយធម៌ដ៏រុងរឿងរបស់ខ្មែរ ជាពិសេសចូលរួមថែរក្សាការពារនូវរាល់ស្នាដៃរបស់បុព្វបុរសខ្មែរ ឱ្យបានគង់វង្សយូរអង្វែង៕

ចុចអានអត្ថបទពាក់ព័ន្ធ៖

អត្ថបទ៖ វឌ្ឍនៈ