មន្ត្រីជំនាញថាជំងឺមហារីកពោះវៀនធំ កើតឡើងច្រើនលើមនុស្សវ័យក្រោម៤០ឆ្នាំនៅកម្ពុជា
- 2017-10-17 03:28:59
- ចំនួនមតិ 0 | ចំនួនចែករំលែក 0
មន្ត្រីជំនាញថាជំងឺមហារីកពោះវៀនធំ កើតឡើងច្រើនលើមនុស្សវ័យក្រោម៤០ឆ្នាំនៅកម្ពុជា
ចន្លោះមិនឃើញ
មន្ត្រីជំនាញឲ្យដឹងថាជំងឺមួយក្នុងចំណោមជំងឺកាចសាហាវផ្សេងទៀតដែលសម្លាប់ប្រជាជនខ្មែរច្រើនជាងគេបំផុតនោះគឺជំងឺមហារីក។ ស្ថិតិចុងក្រោយបំផុតរបស់អង្គការសុខភាពពិភពលោក បានឲ្យដឹងថា ក្នុងមួយឆ្នាំៗ មានប្រជាជនកម្ពុជាប្រហែល ១៥ ០០០នាក់កើតជំងឺមហារីក និងជាង ១០ ០០០នាក់ស្លាប់ ដោយសារជំងឺនេះ។
កាលពីថ្ងៃទី១៥ ខែតុលា សមាគមនាវាយុវជនអាស៊ីអាគ្នេយ៍កម្ពុជា រៀបចំវេទិកាសុខភាពប្រចាំឆ្នាំ២០១៧ ស្ដីពីការបង្ការជំងឺមហារីក នៅវិទ្យាស្ថានបច្ចេកវិទ្យាកម្ពុជា។ លោកស្រីវេជ្ជបណ្ឌិត ហាវ មនីរត្ន ប្រធានផ្នែកវិភាគដុំសាច់មហារីកនៃមន្ទីរពេទ្យកាល់ម៉ែត បានថ្លែងក្នុងពិធីនោះថា ជំងឺមហារីកចំនួន៦ ដែលកើតញឹកញាប់ជាងគេបំផុតលើស្ត្រីកម្ពុជាគឺ មហារីកមាត់ស្បូន មហារីកសុដន់ មហារីកថ្លើម មហារីកសួត មហារីកពោះវៀនធំ និងមហារីកក្រអូមមាត់។
រីឯជំងឺមហារីកចំនួន ៦ ដែលកើតញឹកញាប់ជាងគេបំផុតលើបុរសវិញមាន មហារីកថ្លើម មហារីកសួត មហារីកពោះវៀនធំ មហារីកក្រពះ មហារីកកូនកណ្ដុរ និងមហារីកក្រអូមមាត់។ ការកកើតនៃជំងឺនេះ គឺលោកស្រីថាបង្កឡើងដោយសារមូលហេតុធំៗដូចជាការប្រើប្រាស់ថ្នាំជក់ សេពគ្រឿងស្រវឹង និងការបរិភោគអាហារមិនមានអនាម័យជាដើម។
ជាមួយគ្នានេះ ការស្រាវជ្រាវចុងក្រោយរបស់លោកស្រីវេជ្ជបណ្ឌិត រកឃើញថា អត្រាកើតជំងឺមហារីកពោះរៀនធំ លើប្រជាជនកម្ពុជាវ័យក្មេងអាយុក្រោម ៤០ឆ្នាំ គឺមានអត្រាខ្ពស់គួរឲ្យកត់សម្គាល់ បើប្រៀបធៀបទៅនឹងប្រទេសជិតខាង និងប្រទេសអភិវឌ្ឍនានា។ ដោយឡែកមូលហេតុដែលបណ្ដាលឲ្យកើតជំងឺមហារីក ទាំងវ័យក្មេងដូច្នេះ ពុំទាន់ត្រូវបានស្រាវជ្រាវរកឃើញនៅឡើយទេ ដោយហេតុថាការស្រាវជ្រាវពីជំងឺមហារីកនៅប្រទេសកម្ពុជានៅមានកម្រិត។ លោកស្រីវេជ្ជបណ្ឌិត បន្ថែម។
ដើម្បីបង្ការជំងឺមហារីក លោកស្រីវេជ្ជបណ្ឌិត បានផ្ដល់ដំបូន្មានថាប្រជាពលរដ្ឋត្រូវស្វែងរកការប្រឹេក្សាយោបល់ផ្នែកសុខភាពឲ្យបានញឹកញាប់។ មួយវិញទៀត អ្នកស្រីថា ករណីអ្នកជំងឺមានការសង្ស័យថាខ្លួនជួបបញ្ហាមិនប្រក្រតីណាមួយត្រូវទៅ ជួបគ្រូពេទ្យជំនាញដើម្បីពិនិត្យ និងទប់ស្កាត់ឲ្យទាន់ពេលវេលាកុំឲ្យកើតជាជំងឺមហារីក។
ទន្ទឹមនឹងនេះ លោកជំទាវ ឱ វណ្ឌឌីន អគ្គនាយកបច្ចេកទេសនៃក្រសួងសុខភិបាលបានគូសបញ្ជាក់ថា ក្រសួងបានសហការជាមួយសមាគមនាវាយុវជនអាស៊ីអាគ្នេយ៍កម្ពុជា និងមន្ទីរពេទ្យកាល់ម៉ែតបង្កើតមជ្ឈមណ្ឌលជាតិជំងឺមហារីក ដែលមជ្ឈមណ្ឌលនេះផ្ដោតសំខាន់ទៅលើការព្យាបាល ការបង្ការ ការស្រាវជ្រាវពីជំងឺមហារីក និងការចាក់ថ្នាំបង្ការក្នុងតម្លៃសមរម្យ។ លោកជំទាវថាគម្រោងនេះនឹងបង្កើតជាតំបន់ត្រីកោណនៅប្រទេសកម្ពុជា ដោយទីតាំងទីមួយនៅក្រុងភ្នំពេញ(មន្ទីរពេទ្យកាល់ម៉ែត) គ្រោងនឹងដំណើរការនៅឆ្នាំ ២០១៨ ទីពីរ ខេត្តសៀមរាប និងទីបីនៅខេត្តក្រចេះ ចំពោះទីតាំងទាំងពីរនេះនៅមិនទាន់បានកំណត់ពេលនៅឡើយ៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
