បម្រាមលក់អំបិលពេលយប់ នៅតែមានឥទ្ធិពលខ្លាំង ក្នុងផ្នត់គំនិតប្រជាជនខ្មែរ

2017-12-13 23:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្វីបើវិទ្យាសាស្ត្រជឿនលឿនយ៉ាងណាក្ដី ប៉ុន្តែអប្បិយជំនឿមួយចំនួន នៅតែស្ថិតជាប់ក្នុងសង្គមខ្មែរនៅឡើយ។ ជាក់ស្ដែង អប្បិយជំនឿហាមលក់អំបិលនៅពេលយប់ ត្រូវបានប្រជាជនខ្មែរមួយចំនួនធំ ប្រកាន់ខ្ជាប់រហូតមកដល់បច្ចុប្បន្ន ទាំងអ្នកខ្លះមិនដឹងថាមកពីហេតុភេទយ៉ាងណាផងក៏មាន។

អំបិល

បើតាមការលើកឡើងរបស់លោកយាយ ណឺ រស់នៅភូមិត្រពាំងឈូក ឃុំរវៀង ស្រុកសំរោងខេត្តតាកែវ បានឱ្យដឹងថា អប្បិយជំនឿហាមលក់អំបិលនៅពេលយប់នេះ មានជាយូរយារណាស់មកហើយ ខណៈដែលបច្ចុប្បន្នក៏នៅតែមានអ្នកប្រកាន់ខ្ជាប់ច្រើនគួរសមដែរ។

"បើយើងអត់អំបិលនៅពេលយប់ ហើយយើងចង់ទៅទិញ យើងទៅដល់ផ្ទះអ្នកលក់ឃើញអំបិលចឹង លូកយកមក ហើយទុកលុយឱ្យគេទៅ មិនបាច់សួររកទេ បើសួរគេអាចនឹងមិនលក់ឱ្យ ឬធ្វើមិនលឺយើងសួរទេ។ " លោកយាយវ័យ ៨៥ឆ្នាំ ខាងលើនិយាយ។

លោកយាយ ណី វ័យ ៨៥ឆ្នាំ រស់នៅភូមិត្រពាំងឈូក ឃុំរវៀង ស្រុកសំរោង ខេត្តតាកែវ

លោកយាយបន្តថា បើតាមលោកយាយធ្លាប់បានដឹងពីដូនតាមក គឺការលក់អំបិលនៅពេលនាំឱ្យខាតលក្ខណ៍ ឬខាតលាភខាតប្រយោជន៍ ហើយអំបិលដុះឡើងថែមនៅពេលយប់ ដូច្នេះបើលក់នៅពេល គឺយប់ខាត។

ងាកទៅលោកយាយ ជិន អ្នកលក់ចាប់ហួយនៅភូមិត្រពាំងទ្រាវិញ ក៏ប្រកាន់ខ្ជាប់ណាស់ដែររឿងហាមលក់អំបិលនៅពេលយប់នេះ។ "មិនដឹងដែរចៅ មិនដឹងថាមកពីមូលហេតុអីដែរទេ បានគាត់ (ដូនតា) ហាមមិនឱ្យលក់ចឹង គ្រាន់តែធ្លាប់លឺថាបើលក់អំបិលយប់ ដាច់លក្ខណ៍។ "

លោកយាយវ័យជាង ៦០ឆ្នាំបន្ថែមថា បើចង់រកទិញអំបិលនៅពេលយប់ អ្នកទិញគ្រាន់តែយកលុយមកហុចឱ្យអ្នកលក់ ហើយទៅយកអំបិលដោយខ្លួនឯងទៅ មិនចាំបាច់សួររកអំបិលទេ។ ការសួររកទិញអំបិលនៅពេលយប់អ្នកលក់ច្បាស់ជាធ្វើមិនលឺ ឬមិននិយាយរកមិនខាន។

ដោយឡែក អ្នកស្រី វី អាជីវករមួយរូបដែរ បានប្រាប់ថា អ្នកស្រីមិនបានដឹងមូលហេតុច្បាស់ចំពោះការហាមលក់អំបិលនៅពេលយប់នេះទេ គ្រាន់តែដឹងថានេះជាការហាមតៗគ្នារបស់ចាស់ៗប៉ុណ្ណោះ។

"មិនសូវមានអ្នកមកទិញពេលយប់ដែរ បើគេមកទិញចឹង គេដឹងគេទៅយកខ្លួនឯង ហើយទុកលុយឱ្យទៅ ប៉ុន្តែកម្រមានអ្នកមកទិញយប់ណាស់។ អានេះដូចគេអត់ឱ្យជឿអត់ឱ្យជំពាក់ពេលព្រលឹមឡើងលក់អត់ទាន់ដាច់ចឹង ខ្លាចជឿទៅរហូតចឹងហា។" អាជីករខាងលើបញ្ជាក់។

យ៉ាងណាក្ដី អប្បិយជំនឿដែលមិនដឹងហេតុផលច្បាស់លាស់នេះ នៅតែមានឥទ្ធិពលខ្លាំងក្នុងសង្គមខ្មែរ ដោយពុំសូវមានអ្នកណាហ៊ានបំពាននោះទេ ព្រោះខ្លាចកើតរឿងមិនល្អដល់ខ្លួន ឬក្រុមគ្រួសារ៕

អត្ថបទ៖ សូទ្រី