សេង សូណា ឆ្ងល់រឿងក្រសួងដាក់ពិន័យខ្លួន ថតសិចស៊ីឲ្យរឿងហូលីវូដ

2018-08-25 02:11:29
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីដឹងថា ក្រសួងត្រៀមចាត់វិធានការក្ដៅពិន័យបញ្ឈប់សកម្មភាពសិល្បៈរយៈពេលមួយឆ្នាំ ដូចករណី កញ្ញា ដេនីក្វាន់ ពេលនេះ តារាសម្ដែង សេង សូណា មានការងឿងឆ្ងល់ មិនយល់ពីចំណាត់ការរបស់ក្រសួងបែបនេះមកលើខ្លួន ព្រោះភាពសិចស៊ីកន្លងមក នាងធ្វើសម្រាប់រឿងហូលីវូដប៉ុណ្ណោះ។

តារារូបនេះ ប្រាប់ថា កន្លងមកភាពសិចស៊ីរបស់នាង ពុំសូវពាក់ព័ន្ធក្នុងសិល្បៈខ្មែរទេ ព្រោះភាគច្រើនថតឲ្យតែបរទេស ប៉ុណ្ណោះ។ ចំពោះរឿងហូលីវូដ ដែលខ្លួនទទួលសម្ដែងកន្លងមក លុះត្រាមានការស៊ីញ៉េយល់ព្រមពីក្រសួង ទើបកញ្ញាព្រមទទួលថត។ រីឯភាពសិចស៊ី ជាគ្រាន់ជាការសម្ដែងនៅក្នុងសាច់រឿងដែលគេតម្រូវ ហើយវាជាការងារ ដែលមានការស៊ីញ៉េយល់ព្រមពីក្រសួងរួចហើយ។ ដូច្នេះ កញ្ញា សេង សូណា មិនដឹងថា ហេតុអ្វីទើបក្រសួងបែរជាសម្លឹងឃើញរូបនាងតែម្នាក់ នៅក្នុងចំណាត់ការនេះ។

រូបភាពសិចស៊ីរបស់ សេង សូណា ក្នុងខ្សែភាពយន្ត

កញ្ញា សូណា ប្រាប់ថា ៖"សម្រាប់បង នៅក្នុងសិល្បៈខ្មែរមានភាគតិច មិនមានភាពសិចស៊ីទេសាមញ្ញធម្មតា បើរឿងបរទេស ទើបសិចស៊ីមែនទែន។ បងមិនបានថតឲ្យផលិតកម្មខ្មែរទេអូន បងថតឲ្យតែពួកបរទេស បើបរទេសស៊ីញ៉េពីក្រសួងខ្មែរយើង បើខ្មែរយើងអនុញ្ញាតឲ្យថត បងក៏ថតទៅ"។ សេង សូណា បន្តថា វត្តមានសម្ដែងរបស់តារាខ្មែរក្នុងរឿងហូលីវូដ គួរតែខ្មែរយើងកោតសរសើរ តែបែរជាជាន់ពន្លិចទៅវិញ។ តារាសម្ដែងរូបនេះ ចាត់ទុកដាក់ពិន័យនេះ មិនត្រឹមត្រូវនោះទេ ព្រោះការថតសិចស៊ីរបស់នាង សម្រាប់រឿងហូលីវូដ។

ចំពោះភាពសិចស៊ីកន្លងមក កញ្ញា សូណា បញ្ជាក់ថា ធ្វើដើម្បីការងារ ព្រោះកញ្ញាស្រលាញ់ការងារ មិនមែនធ្វើដើម្បីលក់ខ្លួននោះទេ ។ ទោះយ៉ាងណា តារាសម្ដែងរូបនេះ មិនរឹងទទឹងក្នុងការចូលខ្លួនតាមការកោះហៅរបស់ក្រសួងនោះឡើយ ដោយសង្ឃឹមថា នឹងបានបកស្រាយពីមូលហេតុនេះឲ្យច្បាស់លាស់៕

អត្ថបទ៖ លឹម សុនា