ក្រោយក្លាយជាទីប្រឹក្សា e-commerce មហាសេដ្ឋី Jack Ma នឹងបើកវិទ្យាស្ថានបច្ចេកវិទ្យានៅឥណ្ឌូណេស៊ី

2018-10-15 02:15:00
ចំនួនមតិ 0 | ចំនួនចែករំលែក 0

ចន្លោះមិនឃើញ

មហាសេដ្ឋី Jack Ma បានប្រកាសថា លោកនឹងបើកវិទ្យាស្ថានបច្ចេកវិទ្យា នៅឥណ្ឌូណេស៊ី ប៉ុន្តែលោកមិនបានបង្ហាញ នឹងប្រកាសដំណើរការនៅថ្ងៃណាទេ។

បើផ្អែកតាមស្ថាបនិកក្រុមហ៊ុនបច្ចេកវិទ្យាយក្ស Alibabaរូបនេះ ប្រទេសឥណ្ឌូណេស៊ី កំពុងខ្វះខាតវិស្វករបណ្ដុះបណ្ដាលផ្នែកនេះ ហើយវិទ្យាស្ថានរបស់លោក នឹងបណ្ដុះបណ្ដាលយុវជនប្រទេសនេះ ឱ្យក្លាយជាអ្នកអភិវឌ្ឍកម្មវិធី និងវិស្វករផ្នែក Cloud Computingបង្រៀនអំពីបច្ចេកវិទ្យាផ្សេងៗ និងអ៊ីនធឺណិតជាដើម ដើម្បីជួយសេដ្ឋកិច្ចក្នុងស្រុកឱ្យកើនឡើង។

លោកបានបន្ថែមថា វិទ្យាស្ថាន ក៏នឹងបណ្ដុះបណ្ដាល e-commerce លើយុវជនវ័យក្មេងឥណ្ឌូណេស៊ី ដើម្បីពង្រឹងវិស័យឌីជីថល ខណៈបច្ចុប្បន្នមហាសេដ្ឋីដែលនឹងក្លាយជា ប្រធានប្រតិបត្តិ Alibaba នៅឆ្នាំក្រោយជាទីប្រឹក្សារបស់រដ្ឋាភិបាលឥណ្ឌូណេស៊ី លើផ្នែក e-commerce។

Jack Ma ប្រាប់ទៀតថា វិទ្យាស្ថានរបស់លោកនឹងបណ្ដុះបណ្ដាល មេដឹកនាំបច្ចេកវិទ្យាឱ្យបាន ១០០០នាក់ ក្នុង១ឆ្នាំនៅ១០ឆ្នាំក្រោយ។

បើនិយាយពីសេដ្ឋកិច្ចឌីជីថល ឥណ្ឌូណេស៊ី អាចនឹងឡើងដល់ ១៣០ ពាន់លានដុល្លារ នៅឆ្នាំ ២០២០ ស្មើ ១១% នៃ GDP សរុប។ នេះបើយោងតាមការវាយតម្លៃ របស់ក្រសួងទំនាក់ទំនង និងព័ត៌មាន។

ចំណែកក្រុមហ៊ុនប្រឹក្សាយោបល់ផ្នែកគ្រប់គ្រង McKinsey ប៉ាន់ប្រមាណថា e-commerce ប្រទេសនេះ នឹងកើនដល់ ៥៥ពាន់លានដុល្លារនៅឆ្នាំ ២០២០ កើនពី ៨ ពាន់លានដុល្លារឆ្នាំ២០១៧។

សម្ដីរបស់ Jack Ma ធ្វើឡើងក្នុងអំឡុងកិច្ចប្រជុំប្រចាំឆ្នាំ នៃមូលនិធិរូបិយវត្ថុអន្តរជាតិ និង ធនាគារពិភពលោកនៅ Nusa Dua កោះបាលី ប្រទេសឥណ្ឌូនេស៊ី ថ្ងៃទី ១២ ខែតុលាឆ្នាំ ២០១៨៕

ប្រភព៖ Reuters ប្រែសម្រួល៖ អ៊ុំ សុភក្តិ