Galaxy Note 10 មានចំណុចណាខ្លះខ្លាំងជាង Note 9?

2019-08-09 08:40:35
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីម្សិលមិញ Samsung បានបញ្ចេញកំពូលទូរសព្ទពីររបស់ខ្លួនគឺ Galaxy Note 10 និង Note 10 Plus ហើយទទួលបានប្រជាប្រិយភាពយ៉ាងខ្លាំងទៅលើរចនាបថនិងសមត្ថភាពដ៏ខ្លាំងរបស់វា។ ដូចនេះហើយតើ Note 10 និង 10 Plus មានលក្ខណៈពិសេសជាង Note 9 ដូចម្តេចខ្លះ?

១. អេក្រង់ធំ ប៉ុន្តែរូបរាងតូច

នៅឆ្នាំនេះ ត្រកូល Note មានដល់ទៅពីរជម្រើស ដែល Note 10 មានអេក្រង់ ៦,៣ អ៊ីញ និង Note 10 Plus មានអេក្រង់ ៦,៨ អ៊ីញ។ អ្វីដែលពិសេសនោះ Note 10 ទាំងពីរស្ទើរតែពុំមានគែមនៅខាងមុខ ដែលធ្វើឲ្យទូរសព្ទទាំងពីរនេះមានប្រហាក់ប្រហែលនឹង Note 9 ដែរ ដែលមានទំហំអេក្រង់ត្រឹមតែ ៦,៤ អ៊ីញ។

បញ្ជាក់ដែរថា Note 10 មានកម្រិតបង្ហាញរូបភាពទាបជាង Note 9 (FHD+ ធៀបនឹង QHD+) ចំណែក Note 10 Plus នៅបន្តប្រើអេក្រង់ដែលអាចបង្ហាញរូបភាពម្រិត QHD+ ដដែល។

២. កម្លាំងម៉ាស៊ីនខ្លាំងជាងមុន

Note 10 ទាំងពីរនេះ ភ្ជាប់មកជាមួយបន្ទះឈីប Snapdragon 855 ឬ Exynos 9825 ដែលមានកម្លាំងខ្លាំងជាងស៊េរីមុន(Snapdragon 845 ឬ Exynos 9810 ) ប្រហែលជា ៣០ ភាគរយ ។ Note 9 មានរ៉េមផ្តើមពី ៦ GB ឯ Note 10 ពី ៨ GB ។

៣. ស៊ីថ្មតិចជាងមុន

Note 9 មានទំហំថ្ម ៤០០០ mAh ឯ Note 10 មានទំហំថ្ម ៣៥០០ mAh ប៉ុន្តែដោយសារ Note 10 ប្រើប្រាស់បន្ទះឈីបថ្មីមានទំហំ ៧ nm ដែលស៊ីថ្មតិចជាង Note 9 ប្រើឈីបទំហំ ១០ nm ដូចនេះថ្មទូរសព្ទទាំងពីរគឺអាចប្រហាក់ប្រហែលគ្នា។ ចំណែក Note 10 Plus វិញ មានទំហំថ្មទៅដល់ ៤៣០០ mAh អាចឲ្យអ្នកប្រើប្រាស់មួយថ្ងៃពេញគ្មានបញ្ហា។

៤. សាកលឿនជាងមុន

Note 10 និង Note 10 Plus ភ្ជាប់មកជាមួយបច្ចេកវិទ្យាសាកថ្មលឿនដល់ ២៥ W ឯ Note 9 ត្រឹមតែ ១៨ W ប៉ុណ្ណោះ។ ប៉ុន្តែNote 10 Plus អាចសាកបានលឿនរហូតទៅដល់ ៤៥ W (៧០ ភាគរយក្នុងរយៈពេល ៣០ នាទី) ពេលប្រើជាមួយនឹងឆ្នាំងសាក ដែលដាក់លក់ផ្សេង ពុំភ្ជាប់មកក្នុងប្រអប់ឡើយ។

៥. កាមេរ៉ា

Note 9 ភ្ជាប់មកជាមួយកាមេរ៉ាភ្លោះ (១២ MP ប្រភេទធម្មតា និង ១២ MP ប្រភេទ Telephoto) ។ ចំណែក Note 10 មានកាមេរ៉ាក្រោយ ៣ គ្រាប់ (១៦ MP ប្រភេទ Ultra-Wide, ១២ MP ប្រភេទធម្មតា និង ១២ MP ប្រភេទ Telephoto) ហើយលើ Note10 Plus មាន ៤ គ្រាប់ មានលើសនូវកាមេរ៉ាវាស់ជម្រៅ ToF ។

៦. មុខងារបន្ថែមទៅលើ S-Pen

Note 9 នាំមុខងារ Bluetooth មក S-Pen ដើម្បីផ្តល់ភាពងាយស្រួលនៅពេលថតរូបនិងដំណើរការមួយចំនួន ដោយមិនបាច់ប៉ះអេក្រង់។ Samsung បានបន្ថែមមុខថ្មីៗជាច្រើនទៀតទៅលើ S-Pen របស់ Note 10 ដូចជា បញ្ជាលើមុខងារផ្សេងៗក្នុងកាមេរ៉ា៕

ប្រភព៖ Androidcentral ប្រែសម្រួល៖ អ៊ឹម ដេវីដ