អស់រយៈពេលជាច្រើនខែនៃដំណាក់កាលប្រកួត ប្រកបដោយភាពអនុស្សាវរីយ៍សប្បាយរីករាយ រំភើប ភាពសោកស្ដាយ មនោសញ្ចេតនាកាត់ថ្លៃពុំបានរវាងគ្រូបង្វឹក និងកូនក្រុម នាពេលនេះកម្មវិធីល្ខោនខ្មែរ រដូវកាលទី១ ក្រោមគំនិតផ្ដួចផ្ដើមដោយសហភាពសហព័ន្ធយុវជនកម្ពុជា ខេត្តស្វាយរៀង បានមកដល់វគ្គផ្ដាច់ព្រ័ត្រហើយ។ កាលពីវគ្គវេទិការបស់ខ្ញុំ លទ្ធផលដែលប្រកបដោយភាពសុក្រឹតបានរកឃើញបេក្ខជនជើងខ្លាំងទាំង៣ក្រុម រួមមាន៖ ក្រុមមន្ទីរវប្បធម៌ និងវិចិត្រសិល្បៈខេត្តសៀមរាប ក្រុមខ្ញុំស្រឡាញ់វប្បធម៌នៃស.ស.យ.ក ខេត្តកំពង់ស្ពឺ និងក្រុមយុវជនមន្ទីរវប្បធម៌ និងវិចិត្រសិល្បៈរាជធានីភ្នំពេញ ដែលទទួលបានពិន្ទុសរុបខ្ពស់ជាងគេ គិតចេញពីពិន្ទុវាយតម្លៃរបស់គណៈកម្មការមេប្រយោគ បូកផ្សំនឹងពិន្ទុបោះឆ្នោតពីសាធារណជននៅលើបណ្ដាញសង្គមហ្វេសប៊ុក។

ក្រុមសិល្បៈទាំង៣សមាសភាពក្រុមនេះ នឹងឆ្ពោះទៅការបង្ហាញសមត្ថភាពជាលើកចុងក្រោយ ដើម្បីប្រណាំងប្រជែងដណ្ដើមពានរង្វាន់ ក្នុងវគ្គផ្ដាច់ព្រ័ត្រនៃកម្មវិធីល្ខោនខ្មែរ រដូវកាលទី១។

-ជ័យលាភីលេខ១ នឹងទទួលបានទឹកប្រាក់ ១២ លានរៀល

-ជ័យលាភីលេខ២ នឹងទទួលបានទឹកប្រាក់ ៨ លានរៀល

-រីឯជ័យលាភីលេខ៣ នឹងទទួលបានទឹកប្រាក់ ៤ លានរៀល

មិនត្រឹមតែប៉ុណ្ណោះ ទស្សនីយភាពសិល្បៈបុរាណពិសេសៗនឹងបង្ហាញវត្តមាននៅថ្ងៃផ្ដាច់ព្រ័ត្រផងដែរ។ ដើម្បីជ្រាបថា តើបេក្ខជនក្រុមណានឹងគ្រងជ័យលាភីរង្វាន់លេខ១ ហើយបេក្ខជនក្រុមណាខ្លះនឹងក្លាយជាម្ចាស់ជ័យលាភីលេខ២ និងលេខ៣? សូមកុំភ្លេចតាមដានទស្សនាការផ្សាយផ្ទាល់ វគ្គផ្ដាច់ព្រ័ត្រ ដែលនឹងមានការចាក់ផ្សាយលើកញ្ចក់ទូរទស្សន៍ BTV និងទំព័រហ្វេសប៊ុកផ្លូវការ របស់សហភាពសហព័ន្ធយុវជនកម្ពុជាខេត្តស្វាយរៀង នៅថ្ងៃព្រហស្បតិ៍ ទី២២ ខែធ្នូ ឆ្នាំ២០២១ ចាប់ពីម៉ោង ៦យប់តទៅ ។

ទស្សនិកជនក៏អាចចូលរួមទស្សនាដោយសេរី នៅស្ថានីយទូរទស្សន៍បាយ័នស្ទឹងមានជ័យ ចាប់ពីម៉ោង ៥ល្ងាចតទៅ។