ដូចការគ្រោងទុក ខ្សែភាពយន្ដរឿង “អំណោយស្នេហ៍ក្នុងថ្ងៃណាត់ជួប” របស់ផលិតកម្ម អិល ឌី បានសម្ពោធចាក់បញ្ចាំងតាមរោងភាពយន្ដជាផ្លូវការកាលល្ងាចថ្ងៃទី១៧ ខែមករា ដោយមានវត្ដមានតារាចម្រៀង និងសម្ដែងល្បីៗចូលរួមជាច្រើនរូប។

ពិធីករ និងជាតួអង្គឯកក្នុងរឿង គឺ វី យ៉ារ៉ូ បានឡើងលើវេទិកាសម្ពោធរឿង ដើម្បីឆ្លើយសំណួរពិធីករម្នាក់ទៀតទាក់ទងនឹងភាពលំបាក នៃការសម្ដែង និងអត្ថន័យក្នុងរឿងទាំងមូល។ យូរៗម្ដង គេឃើញយ៉ារ៉ូ អួលដើមករ ស្រក់ទឹកភ្នែក ធ្លាក់លើក្បាលមេក្រូដែលខ្លួនកំពុងកាន់ដើម្បីនិយាយ។

អ្វីដែលលោករំជួលចិត្ដខ្លាំងនោះ ព្រោះវារឿងទី១ដែលរូបលោកចាប់បានតំណែងតួឯក ហើយខ្លឹមសារខ្លះក្នុងរឿងនេះបានបង្កប់រឿងពិតរបស់លោកជាមួយម្ដាយ។ វី យ៉ារ៉ូ សន្យាថា នៅថ្ងៃណាមួយលោកនឹងជួលHall ឬរោងភាពយន្ដមួយសម្រាប់បងប្អូន ព្រមទាំងសាច់ញាតិរបស់ខ្លួនទស្សនារឿងដែលខ្លួនបានសម្ដែង។

តាមកាលវិភាគ ខ្សែភាពយន្ដរឿង “អំណោយស្នេហ៍ក្នុងថ្ងៃណាត់ជួប” ដែលជាខ្សែភាពយន្ដបង្កប់នូវមនោសញ្ចេតនាជ្រៀលជ្រៅ និងអប្បិយជំនឿដ៏អស្ចារ្យ នឹងចាប់ផ្ដើមចាក់បញ្ចាំងនៅគ្រប់រោងភាពយន្ដពីថ្ងៃទី១៩ ខែមករា ឆ្នាំ២០២៣ តទៅ។

ក្នុងឱកាសសម្ពោធរឿងនេះ នៅផ្សារទំនើបអ៊ីឌីនហ្គាឌិន បឹងកក់ កាលពីយប់មិញ គេឃើញវត្ដមានតារាចម្រៀងរ៉េបពូឃ្លាំង នូ ឧសភា ជា សុវណ្ណនរាហ៍ ប្រុសខួច ហេង ជាឡាយ កញ្ញា អាង សុជាតា ហេង ចន្ថា និងកញ្ញា ស៊ីន យូប៊ីន ព្រមទាំងតារាល្បីៗជាច្រើនរូបទៀត៕