ក្រុម OFF ROAD កម្ពុជា៖ ពីមុនយើងទៅប្រកួតដើរមើលឡានគេ ឥលូវគេមកមើលឡានយើងវិញយើងក្លាយជាបន្លាគេហើយ

2024-06-25 05:16:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមប្រណាំងរថយន្ត OFF ROAD កម្ពុជា បង្ហាញក្ដីរំពឹងខ្លាំង និងពោរពេញដោយទំនុកចិត្តខ្ពស់សម្រាប់ការប្រកួត Off-Road Magnificent Ten 2024 នៅខេត្តកាន់ឆាណាក់បូរី ប្រទេសថៃ ខណៈប្រទេសខ្លាំងៗពីមុនចាត់ទុកកម្ពុជាជាបន្លាក្នុងភ្នែកហើយ។

កីឡាករ ព្រំ រស្មី

កីឡាករ ព្រំ រស្មី បានឲ្យដឹងថា ពីមុនកម្ពុជាទៅប្រកួតម្ដងៗតែងតែដើរទៅមើលឡានរបស់ប្រទេសគេ ចង់ដឹងពីបច្ចេកទេសការរៀបចំរថយន្ត និងបំពាក់គ្រឿងសំខាន់ៗណាខ្លះដើម្បីឲ្យឡានធន់ ខ្លាំង ឆ្លងកាត់ផ្លូវឧបសគ្គនានាបាន។ ប៉ុន្តែឥលូវនេះក្រុមកម្ពុជាខ្លាំង មានបទពិសោធគ្រប់គ្រាន់ និងមានសមត្ថភាពលេចធ្លោរហូតឈ្នះពាន និងឈានចូលចំណាត់ថ្នាក់ Top 3 ជាហេតុនាំឲ្យក្រុមប្រទេសផ្សេងៗងាកមកចាប់អារម្មណ៍ក៏ដូចជាដើរមកមើលឡានកម្ពុជាវិញម្ដង ថែមទាំងគិតថាកម្ពុជាជាបន្លាមួយសម្រាប់ប្រជែងមេដាយក្នុងការប្រកួតហើយ។

ទិដ្ឋភាពធ្វើដំណើរទៅប្រទេសថៃ

ជើងខ្លាំងខាងប្រណាំងរថយន្តចាស់វស្សារបស់កម្ពុជាខាងលើបន្ថែមទៀតថា សម្រាប់ការប្រកួត Off-Road Magnificent Ten 2024 នៅខេត្តកាន់ឆាណាក់បូរី លើកនេះក្រុមកម្ពុជាបានត្រៀមលក្ខណៈសម្បត្តិរួចរាល់ទាំងរថយន្ត សម្ភារប្រកួត និងបទពិសោធ។ ពេលប្រកួតជាក់ស្ដែងប្រសិនបើម៉ាស៊ីនឡានមិនខូចអ្វីនោះទេ ជឿជាក់ថាកម្ពុជាជាប់ចំណាត់ Top 3 ឬ Top 5 ជាមិនខាន។

លោក ឈិត ឈុំសីហា

ចំណែកលោក ឈិត ឈុំសីហា ប្រធានដឹកនាំក្រុម OFF ROAD កម្ពុជាបានឲ្យដឹងដែរថា ចំពោះការចេញទៅប្រកួតនេះមួយគឺមានបែងចែកជា ៤ក្រុមធំៗ ទី១ ក្រុមប្រណាំង ទី២ ក្រុមជាងជួសជុល ក្រុមទី៣ Support Team (ក្រុមផ្គត់ផ្គង់) និងក្រុមទី៤ Media (ក្រុមព័ត៌មាន) ដូច្នេះសរុបទាំងអស់មានគ្នា ២៣នាក់។ ក្រុមនិមួយៗមានរៀបចំ និងទទួលការងាររបស់ខ្លួនល្អមែនទែន ស្របពេលក្រុមប្រណាំងបង្ហាញពីភាពក្លាហាន និងទំនុកចិត្តខ្ពស់។

ទិដ្ឋភាពធ្វើដំណើរទៅប្រទេសថៃ

បញ្ជាក់ដែរថា ការប្រណាំងរថយន្ត Off-Road Magnificent Ten 2024 នៅខេត្តកាន់ឆាណាក់បូរី ប្រទេសថៃ មាន ៤ប្រទេសចូលរួម ឡាវ ម៉ាឡេស៊ី កម្ពុជា និងថៃ។ ការប្រកួតចាប់ផ្តើមប្រណាំងពីថ្ងៃទី២៧ ដល់ ៣០ ខែមិថុនា ឆ្នាំ២០២៤។ កម្ពុជាបញ្ជូនរថយន្ត ៣គ្រឿង ប្រកួតវិញ្ញាសាជាក្រុមប្រជែងជាមួយ ២៨ក្រុមផ្សេងទៀតដែលចូលរួម និងសរុបរថយន្តទាំងអស់មាន ៨៤គ្រឿង។ ក្រុមប្រណាំងរថយន្ត OFF ROAD កម្ពុជាទៅចូលរួមការប្រកួតនេះដោយមានការឧបត្ថម្ភគាំទ្រពីបណ្ដាក្រុមហ៊ុនដូចជា Top1 , Madrid Beer , G T V C , Liberty Carz , Champion Aion Cambodia៕

អត្ថបទ៖ នួន ស៊ីណា