រថយន្ត Toyota Camry 2025 ត្រូវបាន​សម្ពោធដាក់លក់​ជាផ្លូវការនៅក្នុងប្រទេសសិង្ហបុរីហើយ ដែលជាប្រទេសមុនគេ​ក្នុងតំបន់​អាស៊ាន បន្ទាប់ពី​ក្រុមហ៊ុន​បានបង្ហាញ​ចេញ​កាលពីខែវិច្ឆិកា ឆ្នាំមុន។

តម្លៃរថយន្ត Toyota Camry 2025 ដែល​លក់​ក្នុងប្រទេសនេះ គឺ​ថ្លៃខ្លាំងណាស់រហូតដល់ជាង ១៨ម៉ឺន៨ពាន់ដុល្លារឯណោះ​ក្នុង១គ្រឿង ខណៈ​ការ​លក់នៅ​ទីផ្សារ​អាមេរិក មានតម្លៃទាបបំផុតត្រឹមតែ ២ម៉ឺន ៨ពាន់ដុល្លារតែប៉ុណ្ណោះ។

រថយន្ត​ Camry ស៊េរីថ្មីជំនាន់ទី៩នេះ មកតែជាមួយ option ១ប៉ុណ្ណោះ គឺ HEV Elegance ប្រើម៉ាស៊ីន Hybrid A25A-FXS ចំណុះ ២,៥លីត្រ បំពាក់ម៉ូទ័រអគ្គិសនី១ ផលិតបាន​កម្លាំងសរុប ២២៧សេះ (ប៉ុង១) ដំណើរការ​ជាមួយប្រអប់លេខ E-CVT និងមានកម្រិតស៊ីសាំងជាមធ្យម ៥,១លីត្រ/១០០គីឡូម៉ែត្រ

សម្រាប់ Version ដែលចេញ​លក់នៅសិង្ហបុរីនេះ វាមកជាមួយ​ការបំពាក់បរិក្ខារស្តង់ដារពេញលេញ ដូចជា ចង្កៀង LED មួយជុំរថយន្ត, ដំបូល panoramic sunroof, យ៉ាន់កង់ alloy ១៨អ៊ីញ, កុងទ័រ ១២,៣អ៊ីញ, អេក្រង់ថាច់ស្រ្គីន ១២,៣អ៊ីញ, អេក្រង់ Head-up Display, កញ្ចក់មើលក្រោយ​ជាប្រភេទឌីជីថល, កាមេរ៉ា ៣៦០, សាកថ្មឥតខ្សែ និង speaker JBL ៩គ្រាប់ជាដើម៕

អត្ថបទ៖ សំភី