នៅ​ព្រឹក​ថ្ងៃ​ទី១២​ ខែ​មករា​ ឆ្នាំ​២០២៥​ អង្គការ​ផ្កាយ​សមុទ្រ​ និង​ក្រុម​ហ៊ុន​ធានា​រ៉ាប់រងអាយុជីវិត និងសុខភាព អេ អាយ អេ ខេមបូឌា បាន​ធ្វើ​ពិធី​បើក​​ការ​ប្រកួត​បាល់ទាត់​វិលជុំកុមារ និង​យុវជន AIA-ISF Youth League ឆ្នាំ២០២៥ និង AIA-ISF Elite Football Camp រដូវ​កាល​ថ្មី​នៅ​កីឡដ្ឋាន AIA Stadium បន្ត​ជំរុញ​កីឡាករ​ កីឡា​ការិនី​វ័យក្មេង​ឲ្យ​ស្វែង​រក​សក្ដានុពល និងអភិវឌ្ឍសមត្ថភាពខ្លួន។​

ថ្លែង​ក្នុង​ពិធី​បើក​ការ​ប្រកួត​អ្នកស្រី ជួប វិច្ឆិកា អគ្គនាយិកាប្រតិបត្តិអង្គការផ្កាយសមុទ្របាន​ឲ្យ​ដឹង​ថា​ ព្រឹត្តិការណ៍​​ប្រកួត​បាល់ទាត់​វិល​ជុំ​កុមារ និង​យុវជន AIA–ISF Youth League ប្រើប្រាស់កីឡាបាល់ទាត់ជាវិធីសាស្ត្រដើម្បីជំរុញឱកាសទទួលបានការអប់រំប្រកបដោយគុណភាព និងការរៀនសូត្រជំនាញសំខាន់ៗ ។ ការប្រកួតនេះមិនត្រឹមតែជាការប្រកួតប្រជែងនោះទេ តែវាជាឱកាសដ៏កម្រសម្រាប់កុមារ និងយុវជនរស់ នៅក្នុងភាពក្រីក្រឲ្យអាចបង្កើនចំណេះដឹងទាក់ទងនឹងជំនាញបំណិនជីវិត យល់ដឹងកាន់តែច្បាស់ពីបញ្ហា សង្គម និងទទួលបានភាពសប្បាយរីករាយពីការ​លេង​កីឡា​ទៀត​ផង។

អ្នក​ស្រី​បន្ថែម​ទៀត​ថា​ ក្រៅពីការហ្វឹកហាត់បាល់ទាត់ អង្គការផ្កាយសមុទ្រក៏បានផ្តល់ការបណ្តុះបណ្តាលអំពីជំនាញបំណិនជីវិតដល់កីឡាករកីឡាការនីផងដែរ ។ ការបណ្តុះបណ្តាលទាំងនេះគឺផ្ដោតលើបញ្ហានានាដែលជះឥទ្ធិពលដល់សហគមន៍របស់កីឡាករ កីឡាការិនី។ គ្រូបង្វឹកបាល់ទាត់របស់អង្គការផ្កាយសមុទ្របង្កើតបរិស្ថានសុវត្ថិភាព ដើម្បីរៀនសូត្រ និង ពិភាក្សាអំពីបញ្ហាសង្គមគួរឲ្យព្រួយបារម្ភ ដែលកើតឡើងជុំវិញជីវិតកុមារ និងយុវជន ដូចជា៖ ការប្រើប្រាស់ គ្រឿងញៀន ការជួញដូរមនុស្ស អំពើហិង្សាក្នុងគ្រួសារ ល្បែងស៊ីសង និងសមភាពជាដើម ។ កុមារ និងយុវជន ដែលចូលរួមក្នុងព្រឹត្តការណ៍ប្រកួតបាល់ទាត់វិលជុំកុមារ និងយុវជន AIA–ISF Youth League ទទួលបានឱកាសដ៏សំខាន់ពីការប្រកួតប្រជែងក្នុងកម្មវិធីកីឡាផង និងសកម្មភាព ដែលជួយកសាងជំនាញ ដូចជាការធ្វើការងារជាក្រុម ភាពជាអ្នកដឹកនាំ ការសម្រេចចិត្តប្រកបដោយប្រសិទ្ធភាព។

អ្នកស្រី Jane Tay អគ្គនាយិកាប្រតិបត្តិនៃក្រុមហ៊ុនធានារ៉ាប់រងអាយុជីវិត និងសុខភាព អេ អាយ អេ​ ខេមបូឌា ផ្តោតសំខាន់លើការណែនាំ និងជំរុញ​ឱ្យប្រជាជនក្នុងសង្គមទទួលយកទម្លាប់ល្អៗក៏ដូចជាមធ្យោបាយដើម្បីឱ្យទទួលបាននូវសុខភាពល្អតាមរយៈគំនិតផ្តួចផ្តើមរួមមានកិច្ចសហការជាមួយក្រសួងកិច្ចការនារីពង្រឹងលើសមភាពយេនឌ័រ និងសិទ្ធិស្ត្រី លើកកម្ពស់ការយល់ដឹងអំពីជំងឺមហារីកសុដន់តាមរយៈយុទ្ធនាការប្រចាំឆ្នាំ Fit for Hope របស់យើងជាដើម ។ អេ អាយ អេ​ ខេមបូឌា ចូលរួមជួយលើកស្ទួយកុមារដែលជួបបញ្ហាជីវភាពរាប់ពាន់នាក់ផងដែរ ដោយតាមរយៈឧបត្ថម្ភដល់បាល់ទាត់ AIA-ISF ដែលជាលីគបាល់ទាត់ថ្នាក់មូលដ្ឋានធំជាងគេនៅកម្ពុជា។ ជាងនេះទៀតសោធក៏សហការជាមួយក្លឹប Tottenham Hotspur ក្នុងក្របខណ្ឌ English Premier League ដែលជាដៃគូសកល និងជាក្លឹប បាល់ទាត់កំពូលនៅលើពិភពលោក ដើម្បីធានាថាកុមារទាំងនោះទទួលបានការអប់រំ ដែលពួកគេសមនឹង ទទួលបាន។ អេ អាយ អេ ខេមបូឌា គឺជាក្រុមហ៊ុនធានារ៉ាប់រងអាយុជីវិតកម្ពុជាតែមួយគត់ដែលបានទទួលពានរង្វាន់ “ក្រុមហ៊ុនល្អបំផុតសម្រាប់ការងារនៅអាស៊ី (Best Companies to Work for in Asia)” ពី HR Asia ក្នុងរយៈពេល ៣ឆ្នាំជាប់គ្នា ២០២០, ២០២១ និង ២០២២។

បញ្ជាក់​ដែរ​ថា​ ការ​ប្រកួត​បាល់ទាត់​វិល​ជុំ​កុមារ និង​យុវជន AIA-ISF Youth League ឆ្នាំ២០២៥ និង AIA-ISF Elite Football Camp នឹង​ធ្វើ​ឡើង​នៅ​រាជធានី-ខេត្ត​ចំនួន​៣ គឺ​ទី១ ថ្ងៃទី១២ ខែមករា ២០២៥ នៅរាជធានីភ្នំពេញ ទី២ ថ្ងៃទី២៦ ខែមករា ២០២៥ នៅខេត្តកំពង់ធំ និងទី៣​ ថ្ងៃទី២ ខែកុម្ភៈ ២០២៥ នៅខេត្តបន្ទាយមានជ័យ។​ ក្រុម​ចូលរួម​មាន​សរុប​ ១៣៥ក្រុម និង​មាន​យុវជន​ខ្ទង់​ជាង​ ១៨៦០នាក់។​ ការ​ប្រកួត​នេះ​នឹង​ចម្រាញ់​រក​ជើងឯក​ប្រចាំ​តំបន់​ទាំង​រួច​ធ្វើ​ការ​ប្រកួត​ធំ​ផ្ដាច់ព្រ័ត្រ​រក​ម្ចាស់​ពាន​ប្រចាំ​ឆ្នាំ​២០២៥​ នេះ​តែ​ម្ដង៕

អត្ថបទ៖ កុសល