Meta ដែលក្រុមហ៊ុនមេរបស់ Facebook និង Instagram បាននឹងកំពុងទាក់ទាញ អ្នកបង្កើតមាតិកា នៅលើ TikTok ឱ្យចូលមកប្រើប្រាស់ platform របស់ខ្លួនជំនួសវិញ។ ការបោះជំហានរបស់ Meta ក្នុងការឈានចាប់ទៅយក user របស់ TikTok គឺអាចជាពេលវេលាល្អ ដោយសារតែអនាគតរបស់ បណ្តាញសង្គមនេះ នៅមិនទាន់មានភាពច្បាស់លាស់ នៅឡើយ បើទោះបីជាលោកប្រធានាធិបតី Donald Trump បានចេញបញ្ជាឱ្យបន្តដំណើរការ នៅក្នុងទឹកដីអាមេរិក ៧៥ ថ្ងៃទៀត។

ដើម្បីអាចទាក់ទាញអ្នកបង្កើតមាតិកា នៅលើ TikTok ឱ្យងាកមកប្រើ Facebook និង Instagram វិញ ក្រុមហ៊ុន Meta បានផ្តល់ជារង្វាន់ជាទីគាប់ចិត្ត ដែលមានដូចជា content deals និងការសន្យាជួយជ្រោមជ្រែងដើម្បី ធ្វើឱ្យមាតិកា ល្បី មានអ្នកមើលច្រើន ជាដើម។ បន្ថែមលើនេះ Meta បានប្រកាសថា TikTok creators ដែលមានលក្ខណៈសម្បត្តិគ្រប់គ្រាន់តាម policy របស់ Meta នោះពួកគេ នឹងអាចរកប្រាក់ចំណូលបានរហូតដល់ទៅ ៥ ពាន់ដុល្លារ ក្នុងរយៈពេល ៣ ខែ តាមរយៈការ បង្ហោះមាតិកា Reels នៅលើ Facebook និង Instagram។

អ្នកបង្កើតមាតិកា លើ TikTok នឹងមានលទ្ធភាព ទទួលបាន Facebook Content Monetization ដែលនឹងអនុញ្ញាតឱ្យពួកគេ អាចរកប្រាក់ចំណូលបាន សម្រាប់ការបង្ហោះ វីដេអូ រូបភាព និង text នៅលើ Facebook។ លើសពីនេះ Meta នឹងផ្តល់ជា content deals ដើម្បីជួយឱ្យទទួលបានអ្នកគាំទ្រកាន់តែច្រើន ទាំងនៅលើ Facebook និង Instagram។

TikTok creators មួយចំនួន ក៏ទទួលបានអត្ថប្រយោជន៍បន្ថែមទៀត ដូចជា ការទទួលបាន Meta Verified ដែលក្នុងនោះ រួមមាន verified badge, account support និង impersonation protection ជាដើម។

គួរឱ្យដឹងថា TikTok បានត្រឡប់មកវិញជាធម្មតា នៅក្នុងសហរដ្ឋអាមេរិក បន្ទាប់ពីបានបិទដំណើរការ អស់ ១២ ម៉ោង។ បើទោះបីជាអាចបន្តដំណើរការឡើងវិញយ៉ាងណាក្តី ប៉ុន្តែ កម្មវិធីបណ្តាញសង្កមរបស់ ByteDance មួយនេះ ត្រូវបានដកចេញពី App Store និង Play Store បាត់ទៅហើយ។ នេះមានន័យថា អនាគតរបស់ TikTok នៅស្រពិចស្រពិល បើទោះជាមានការចេញបញ្ជា ពី ប្រធានាធិបតីអាមេរិក Donald Trump ឱ្យ កម្មវិធីបណ្តាញសង្គមនេះ បន្តមានវត្តមាននៅក្នុងទឹកដីអាំមេរិក រយៈពេល ៧៥ ថ្ងៃទៀត។ មកទល់ពេលនេះ គេនៅមិនទាន់អាចកំណត់បានថា TikTok នឹងវិលត្រឡប់មកកាន់ Apple App Store និង Google Play Store នៅពេលណានោះទេ៕

ប្រភព៖ Techcrunch   ប្រែសម្រួល ៖ គីម ណារ៉ាក់