រាជធានីភ្នំពេញ – ថ្ងៃទី០៥ ខែមីនា ឆ្នាំ២០២៦ – វិស័យកម្សាន្តនៅកម្ពុជាបានឈានចូលដល់របត់ថ្មីមួយនៅថ្ងៃនេះ ជាមួយនឹងការសម្ពោធជាផ្លូវការនូវ Sabay Cinema ដែលពីមុនប្រតិបត្តិការក្រោមឈ្មោះ Major Cineplex Cambodia។ ការផ្លាស់ប្តូរនេះធ្វើឡើងបន្ទាប់ពីក្រុមហ៊ុន Major Cineplex Group បានដកប្រតិបត្តិការរបស់ខ្លួនចេញពីកម្ពុជា ស្របតាមយុទ្ធសាស្ត្ររៀបចំរចនាសម្ព័ន្ធអាជីវកម្មក្នុងតំបន់ឡើងវិញ។

ជាការឆ្លើយតប ក្រុមហ៊ុន Sabay Digital Group បានសម្រេចចិត្តយ៉ាងមុតមាំក្នុងការទិញយកភាគហ៊ុនទាំងអស់ពី Major Cineplex Group ដោយនាំយកប្រតិបត្តិការរោងភាពយន្ត និងកន្លែងបោះប៊ូលីង (Bowling) មកស្ថិតក្រោមការគ្រប់គ្រង និងជាកម្មសិទ្ធិរបស់ខ្មែរ១០០%។ ការផ្លាស់ប្តូរនេះមិនត្រឹមតែជាការសម្រេចចិត្តខាងយុទ្ធសាស្ត្រអាជីវកម្មប៉ុណ្ណោះទេ ប៉ុន្តែវាគឺជាជំហានដ៏មានអត្ថន័យមួយឆ្ពោះទៅរកការពង្រឹងឧស្សាហកម្មវប្បធម៌ជាតិ និងការដាក់អនាគតនៃវិស័យភាពយន្ត និងការកម្សាន្តនៅក្នុងដៃរបស់ប្រជាជនកម្ពុជាផ្ទាល់។

ក្នុងផ្នែកមួយនៃការផ្លាស់ប្តូរនេះ ម៉ាកយីហោ Blue-O Bowling ត្រូវបានប្តូរឈ្មោះថ្មីទៅជា Sabay Rhythm & Bowl ដែលឆ្លុះបញ្ចាំងពីចក្ខុវិស័យរបស់ Sabay ក្នុងការកសាងប្រព័ន្ធអេកូឡូស៊ីកម្សាន្តដ៏ទំនើប និងសម្បូរបែប ដែលមិនត្រឹមតែសម្រាប់ការទស្សនាភាពយន្តប៉ុណ្ណោះទេ តែថែមទាំងលើកកម្ពស់របៀបរស់នៅ និងបទពិសោធន៍សង្គមសម្រាប់មនុស្សគ្រប់វ័យ។

ព្រឹត្តិការណ៍សម្ពោធជាផ្លូវការត្រូវបានរៀបចំឡើងនៅរោងភាពយន្ត Sabay Cinema ជាន់ទី២ នៃផ្សារទំនើប អ៊ីអន ម៉ល ភ្នំពេញ ដោយមានការចូលរួមពីបណ្តាស្ថាប័នសារព័ត៌មានក្នុងស្រុក ថ្នាក់ដឹកនាំក្នុងឧស្សាហកម្មភាពយន្ត អ្នកជំនាញផ្នែកច្នៃប្រឌិត និងភ្ញៀវកិត្តិយសជាច្រើនរូប។ វត្តមានរបស់ភ្ញៀវកិត្តិយសបានឆ្លុះបញ្ចាំងអំពីទំនុកចិត្តយ៉ាងរឹងមាំ តម្លាភាព និងការប្តេជ្ញាចិត្តរយៈពេលវែងរបស់ Sabay ចំពោះវិស័យនេះ។

ទីតាំងរោងភាពយន្តទាំង ៦ នឹងនៅបន្តដំណើរការជាធម្មតា ដោយទស្សនិកជននឹងទទួលបាននូវបទពិសោធន៍ថ្មី ជាមួយស្តង់ដារសេវាកម្មកាន់តែប្រសើរ និងអត្តសញ្ញាណម៉ាកយីហោថ្មីដ៏ទាក់ទាញ។

បច្ចេកវិទ្យាទំនើបចុងក្រោយ៖ Sabay ទទួលខុសត្រូវទាំងស្រុងលើប្រតិបត្តិការ រួមបញ្ចូលទាំងការរក្សា និងវិនិយោគបន្ថែមលើប្រព័ន្ធបច្ចេកវិទ្យាបញ្ចាំងកុនទំនើបៗ ដូចជាប្រព័ន្ធ IMAX Laser និង ScreenX ជាដើម។

ប្រព័ន្ធសេវាកម្មឌីជីថល៖ នឹងមានការដាក់ឱ្យប្រើប្រាស់នូវប្រព័ន្ធលក់សំបុត្រ និងការកក់សំបុត្រតាមអនឡាញថ្មី ដែលផ្តល់ភាពងាយស្រួល និងរហ័សជាងមុន។

ទីតាំងពោរពេញដោយការច្នៃប្រឌិត៖ ទីតាំងមួយចំនួននៅក្នុង Sabay Cinema និង Sabay Rhythm & Bowl នឹងត្រូវរៀបចំឡើងវិញ ដោយរួមបញ្ចូលនូវកន្លែងធ្វើការរួម (Co-working areas) ហាងកាហ្វេ និងកន្លែងប្រមូលផ្តុំគំនិតច្នៃប្រឌិត (Creative spaces) ដើម្បីគាំទ្រដល់ផលិតករភាពយន្តវ័យក្មេងតាមរយៈការកសាងបណ្តាញ ការសហការ និងឱកាសបណ្តុះបណ្តាលនានា។

"អ្វីដែលយើងកំពុងធ្វើនៅថ្ងៃនេះ គឺមានអត្ថន័យធំធេង។ វាគឺជាជំហានដំបូងសម្រាប់ Sabay Cinema ក្នុងការកសាងមូលដ្ឋានគ្រឹះជាតិឱ្យកាន់តែរឹងមាំ និងជំរុញឧស្សាហកម្មភាពយន្ត និងការកម្សាន្តរបស់កម្ពុជាឱ្យឈានដល់ស្តង់ដារកាន់តែខ្ពស់។" នេះបើតាមការថ្លែងឱ្យដឹងពីលោក ជី សិលា ម្ចាស់រោងភាពយន្ត Sabay Cinema។

Sabay Cinema និង Sabay Rhythm & Bowl ដើរទៅមុខជាមួយនឹងមហិច្ឆតាច្បាស់លាស់ចំនួនពីរ៖

• ពង្រឹង និងវិនិយោគ លើប្រព័ន្ធអេកូឡូស៊ីនៃវិស័យភាពយន្ត និងការច្នៃប្រឌិតរបស់កម្ពុជា។

• លើកកម្ពស់ ទិដ្ឋភាពកម្សាន្តជាតិ តាមរយៈកំណើនប្រកបដោយចីរភាព។

នៅពេលដែលទំព័រថ្មីនេះចាប់ផ្តើម Sabay Cinema ឈរយ៉ាងរឹងមាំក្នុងនាមជាសហគ្រាសដែលគ្រប់គ្រងដោយជនជាតិខ្មែរប្រកបដោយមោទនភាព ដោយមានការប្តេជ្ញាចិត្តខ្ពស់ក្នុងការផ្តល់ឱកាសដល់ធនធានក្នុងស្រុក ការពង្រីកខ្លួនដោយឯករាជ្យ និងការជឿជាក់យ៉ាងមុតមាំក្នុងការឆ្ពោះទៅមុខជាលំដាប់សម្រាប់វិស័យភាព និងសេវាកម្មកម្សាន្តរបស់កម្ពុជា។

អំពី Sabay Cinema

Sabay Cinema ផ្តល់នូវបទពិសោធន៍ទស្សនាភាពយន្តលំដាប់ថ្នាក់ពិភពលោកនៅទូទាំងប្រទេសកម្ពុជា ដោយរួមបញ្ចូលគ្នានូវបច្ចេកវិទ្យាទំនើប ក្រុមការងារក្នុងស្រុកដែលមានបទពិសោធន៍ និងចក្ខុវិស័យយុទ្ធសាស្ត្ររយៈពេលវែង។ ម៉ាកយីហោនេះប្តេជ្ញាលើកកម្ពស់វិស័យភាពយន្ត និងការកម្សាន្តរបស់ប្រទេសកម្ពុជា ស្របពេលដែលបង្កើតនូវបទពិសោធន៍ដ៏មានអត្ថន័យ និងក្តីរីករាយសម្រាប់ទស្សនិកជនទូទាំងប្រទេស។

អំពី Sabay Digital Group

Sabay Digital Group គឺជាក្រុមហ៊ុនប្រព័ន្ធផ្សព្វផ្សាយ និងបច្ចេកវិទ្យាឈានមុខគេរបស់កម្ពុជា ដែលត្រូវបានបង្កើតឡើងក្នុងឆ្នាំ២០០៧ ជាមួយនឹងប្រតិបត្តិការចម្រុះលើខ្លឹមសារឌីជីថល ការកម្សាន្ត និងអាជីវកម្មដែលទាក់ទងនឹងរបៀបរស់នៅ។ តាំងពីឆ្នាំ២០១០ មក Sabay បានវិនិយោគយ៉ាងសកម្មក្នុងឧស្សាហកម្មភាពយន្ត រួមមានការចែកចាយភាពយន្ត ការផលិត និងវិនិយោគលើភាពយន្តក្នុងស្រុក និងប្រតិបត្តិការរោងភាពយន្ត ដែលដើរតួនាទីយ៉ាងសំខាន់ក្នុងការអភិវឌ្ឍន៍ប្រព័ន្ធអេកូឡូស៊ីកម្សាន្តទំនើបរបស់កម្ពុជា។