រឿងមិនដែលជួប កូនភ្លោះ នាំគ្នារត់ចូលសិល្បៈទាំង២នាក់
- 2014-10-02 16:33:04
- ចំនួនមតិ 0 | ចំនួនចែករំលែក 0
រឿងមិនដែលជួប កូនភ្លោះ នាំគ្នារត់ចូលសិល្បៈទាំង២នាក់
ចន្លោះមិនឃើញ
នៅក្នុងសង្គមសិល្បៈខ្មែរមិនធ្លាប់មានឡើយ កូនភ្លោះនាំគ្នាចូលសិល្បៈទាំង ២ នាក់នោះ ប៉ុន្តែ ថ្ងៃនេះ Sabay សូមណែនាំទស្សនិកជនទៅស្គាល់កូនភ្លោះមួយគូ ដែលបានស្ម័គ្រចិត្តចូលសិល្បៈទាំង ២ នាក់ គឺ លោក ស៊ិន សុភា និង លោក ស៊ិន សុភ័ក្ត្រ ជាពិធីករ របស់ស្ថានីយទូរទស្សន៍ប៉ុស្ដិ៍លេខ៣។
អានអត្ថបទ៖ “ព្រាយខ្លា” ពីប្រទេសកម្ពុជាបង្កចលាចលផ្អើលអ្នកស្រុកថៃ
បច្ចុប្បន្នកូនភ្លោះទាំង ២ នាក់នោះ កំពុងតែកាន់កម្មវិធីចំនួន ២ នៅស្ថានីយទូរទស្សន៍ប៉ុស្ដិ៍លេខ ៣ មានកម្មវិធីខ្សឹបដាក់មេក្រូ ក្នុងវគ្គ "វគ្គកូនភ្លោះនាំផ្លូវ" និង កម្មវិធី "សួនកុមារ"។ លោក ស៊ិន សុភា ជាបង បានប្រាប់ Sabay ថា លោកមានស្រុកកំណើតក្នុង ខេត្ត បន្ទាយមានជ័យ បច្ចុប្បន្នទាំង ២ នាក់បងប្អូន ជានិស្សិតឆ្នាំទី ២ នៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច។ ដោយសារតែមានចិត្តស្រលាញ់សិល្បៈ ទាំង ២ នាក់ បងប្អូនបានព្យាយាមចូលប្រលងកម្មវិធីសិល្បៈជាច្រើនលើកទាំងនៅខេត្ត ដែលខ្លួនរស់នៅ ក៏ដូចជា នៅតាមបណ្ដាស្ថានីយទូរទស្សន៍។
ពី ៤ ទៅ ៥ កម្មវិធីដែល បងប្អូនទាំង២នាក់ធ្លាប់ចូលប្រលងតែកម្មវិធី systema star search season2 របស់ស្ថានីយទូរទស្សន៍ប៉ុស្ដិ៍លេខ៣ បានជាប់ ដោយនៅក្នុងនោះ បងប្អូនទាំង ២ នាក់ បានចំណាត់ថ្នាក់លេខ ៥ ផ្នែក ពិធីករ ។
លោក ស៊ិន សុភា បានបន្តឲ្យដឹងថា ពេលជាប់កម្មវិធីខាងលើភ្លាម ខាងស្ថានីយទូរទស្សន៍ ប៉ុស្ដិ៍លេខ៣បានឲ្យមកសាកល្បងការងារនៅស្ថានីយ ប៉ុន្តែដោយឪពុករបស់លោក ធ្លាក់ខ្លួនឈឺ ហើយជីវភាពមានការធ្លាក់ចុះ អ្នកទាំង ២ មិនបានមកចាប់អាជីពសិល្បៈភ្លាមៗឡើយ ព្រោះត្រូវទៅជួយរកស៊ីដើម្បីផ្គត់ផ្គង់គ្រួសារ។
បើទោះបីជាបែបនេះក្ដី សុភា បានប្រាប់ថា ស្ថានីយទូរទស្សន៍ប៉ុស្ដិ៍លេខ៣ មិនបានបោះបង់ អ្នកទាំង២ចោលឡើយ គឺនៅតែផ្ដល់ឱកាសដដែល ប្រហែលជា ២ឆ្នាំ ពេលដែលបងប្អូនទាំង២នាក់ ឡើងមករៀននៅភ្នំពេញ ទើបមកចាប់អាជីពជាពិធីករនៅប៉ុស្ដិ៍លេខ៣។ បច្ចុប្បន្នអ្នកទាំង២ ពុងតែកាន់កម្មវិធីចំនួន២ មានកម្មវិធីខ្សឹបដាក់មេក្រូ ក្នុងវគ្គ "វគ្គកូនភ្លោះនាំផ្លូវ" និងកម្មវិធី "សួនកុមារ" ដោយកម្មវិធីទាំងនេះ បានកាន់ជាង ១ ឆ្នាំ មកហើយ។
អានអត្ថបទ៖ ថន លក្ខិណា៖ “ចំណេះដឹងសំខាន់ជាពន្លឺនៃជីវិត”
ក្រៅពីការងារជាពិធីករ បងប្អូនទាំង២នាក់ក៏ចេះច្រៀង ហើយកំពុងច្រៀងនៅក្លឹបកម្សាន្តមួយរៀងរាល់យប់។ ចំណូលដែលបានមកពី ការងារសិល្បៈទាំង២កន្លែងនេះ បានល្មមនឹងការផ្គត់ផ្គង់ ការសិក្សាក៏ដូចជា ការចាយវាយប្រចាំថ្ងៃ មិនចាំបាច់ពឹងម្ដាយនៅស្រុកផ្ញើមកឲ្យឡើយ។ លោក ស៊ិន សុភា និយាយ។
លោក ស៊ិន សុភា បានលើកឡើងថា ពួកគេនឹងខិតខំបន្ថែមទៀត ដើម្បីឲ្យទស្សនិកជនកាន់តែស្គាល់ជាងនេះ ព្រោះដូចបានលើកឡើងហើយ អាជីពជាអ្នកសិល្បៈនេះ អ្នកទាំង២ស្រលាញ់ខ្លាំងណាស់៕
អត្ថបទ៖ ខុត សីហា
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
