ពណ៌សក់អ្វីអន្ទងចិត្តយុវវ័យចង់លាបនាពេលបច្ចុប្បន្ន?

2014-10-17 16:06:09
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវវ័យតែងផ្លាស់ប្ដូរពណ៌សក់ឲ្យទាន់សម័យកាល ដើម្បីភាពស្រស់ស្អាត និង គួរជាទីទាក់ទាញសមស្របនឹងអាយុកាល។ តើពណ៌អ្វីខ្លះដែលយុវវ័យបច្ចុប្បន្នកំពុងពេញនិយមជាងគេ?

ជាក់ស្ដែង អ្នកស្រី ណៃ ម្ចាស់ហាងមរកតអ៊ុតសក់ ក្នុងរាជធានីភ្នំពេញ ដែលតែងមានភ្ញៀវចូលបន្តកន្ទុយគ្នា រៀបរាប់ថា យុវវ័យភាគច្រើនគេលាបពណ៌តាមគ្នា ព្រោះមិនចង់ខុសគេតែឯង ហើយឲ្យមើលទៅស៊ីវីល័យ។

អ្នកស្រីបន្តថា៖ "ពណ៌ដែលពេញនិយមបំផុតក្នុងហាងខ្ញុំ ដែលគេចូលចិត្តលាប មានពណ៌ស្វាយចាស់ស្រដៀងពណ៌សំបកផ្លែទំពាំងបាយជូរ ពណ៌មាស ពណ៌ទង់ដែង និង ក្រហមបែបស្វាយតិចៗ។ បួនពណ៌នេះគេនិយមណាស់ ព្រោះពេលលាបទៅមិនឆើតឆាយពេក តែសុភាពស្រស់ស្អាត"។

សម្រាប់កញ្ញា ម៉ាណា អាយុ ២០ ឆ្នាំ និស្សិតឆ្នាំទី ១ នៃវិទ្យាស្ថានវ៉ាន់ដា ប្រាប់ថា ការលាបពណ៌សក់វាជារឿងធម្មតាទៅហើយ ដូច្នេះការជ្រើសពណ៌សក់ក៏ជារឿងចាំបាច់ដើម្បីឲ្យចូលចំណោមគេផងដែរ។

ម៉ាណាថា៖ "ខ្ញុំឃើញបច្ចុប្បន្ន យុវវ័យមិនថាស្រីឬប្រុស ច្រើនតែលាបពណ៌ក្រហមបែបស្វាយតិចៗ និងពណ៌ទង់ដែង"។

ចំពោះ កញ្ញា នៅ សុខា អាយុ ២៣ ឆ្នាំ រស់នៅច្បាអំពៅ បញ្ចេញយោបល់ថា បើទោះយុវវ័យនិយមចូលចិត្តលាបពណ៌សក់ តែភាគច្រើនទាល់តែពណ៌នោះមើលទៅសុភាពបែបទាន់សម័យទើបគេពេញចិត្ត បើពណ៌ចេញមកខ្លាំងពេក ឬឆើតពេកក៏មិនមានអ្នកលាបច្រើនឡើយ។ "សម្រាប់ខ្ញុំ ចូលចិត្តលាបពណ៌ទង់ដែង"។

ចុះប្រិយមិត្តវិញ ចង់លាបពណ៌សក់អ្វីដែរ? ហើយយល់ថា ពណ៌ណាខ្លះកំពុងពេញនិយមសម្រាប់យុវវ័យ?

សូមអាន៖ គេថាស្រីៗសក់ក្រហមអត់ល្អ?

ប្រុសៗលាប Whitening ដែរ?

អត្ថបទ៖ លឹម សុនា