ប្រុសៗលាប Whitening ដែរ?

2014-10-16 17:54:13
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅពេលដែលយុវជនខ្មែរកាន់តែប្រែប្រួលសាច់ឈាមទៅជាសក្បុសដូចតារាកូរ៉េខាងត្បូង ដែលជា ក្រុមសិល្បករដ៏មានឥទ្ធិពលបំផុតនៅពាសពេញអាស៊ីនោះ Sabay បានទទួលព័ត៌មានមកថា ប្រុសៗក៏ចាយលុយទៅលើគ្រឿងសំអាងមិនចាញ់នារីដែរក្នុងពេលបច្ចុប្បន្ននេះ ពិសេសពពួកក្រែម Whitening ដែលជួយអោយស្បែកប្រែទៅជាសជ្រះ។

សូមចុចអាន៖ គន្លឹះសំខាន់៦យ៉ាង ធ្វើឲ្យស្អាត មិនបាច់ប្រើម្សៅក្រែម

រូបតំណាង (រូបថត៖ បរទេស)

បងស្រី តាំង ឃីម លក់គ្រឿងក្រអូបនៅផ្សារចាស់ប្រាប់អោយ Sabayឲ្យដឹងថា៖ ”មែនហើយអូន ឥឡូវនេះប្រើទាំងស្រីទាំងប្រុស ទូទៅទៅហើយ។ ឡេខ្លះគេមានសម្រាប់បុរសផ្សេង នារីផ្សេង តែខ្លះទៀតអាចប្រើបានមិនថាស្រីរឺប្រុសទេ។ សម្បូរមករកឡេប្រភេទធ្វើអោយប្ដូរស្បែកទៅជាស គ្នាចង់សដូចតួកូរ៉េ។ ឡេភាគច្រើននាំចូលមកពីប្រទេសថៃ ចិន ម៉ាឡេស៊ីមានតម្លៃចាប់ពី ២ ដុល្លារ ដល់ ៣០ដុល្លារលាបមុខក៏បាន លាបខ្លួនក៏មាន គេហៅថា Whitening មករកតែអាហ្នឹង”។

កាលដែលយុវជនខ្មែរនាំគ្នាចំណាយពេលជាមួយរឿងដុសខាត់រូបសម្ផស្ស និង ការរចនាម៉ូដសំលៀកបំពាក់ ម៉ូដសក់កាន់តែប្រជែងជាមួយនារីៗនោះ នាំឲ្យមានការបារម្ភថា យុវជនខ្មែរមួយភាគធំអាចមានទំនោរទៅរកការធ្វើខ្លួនអោយទៅជាភេទទី ៣ ប៉ុន្តែយុវជន ហេង លក្ខិណាម្ចាស់ហាងអ៊ុតសក់យ៊ីហោក្រុងទេពបានបដិសេធទស្សនៈនេះ។

“មិនមែនអញ្ចឹងទំាងអស់ទេបង និយាយទៅ យើងថា អោយមនុស្សដោយវាយតម្លៃគេតែសម្បកក្រៅក៏មិនកើតដែរ ព្រោះថា អ្នកខ្លះជាភេទទី ៣ មែនតែអត់មានលាបអីទេ មើលមិនដឹងទេ បើគេមិនប្រាប់ តែខ្លះគ្នាលាបឡេមែនមកពីគ្នាចង់ស ធម្មតាសាសន៍យើងមានសម្បុរមិនបានសដូចគេ អញ្ចឹងគ្នានៅក្មេង គ្នាក៏ចង់ស្អាត ពីមុនបច្ចេកវិទ្យាអត់ទាន់ទំនើប បើថា អាក្រក់ ក៏អាក្រក់មួយជីវិតទៅ តែឥឡូវមិនដូចអញ្ចឹងទៀតទេ តែយើងចេះកែច្នៃ អាក្រក់អាចក្លាយជាស្អាតបាន ធម្មតាក្នុងសង្គមមួយបើគេស្អាតអស់ហើយ យើងនៅអាក្រក់ម្នាក់ឯងកើតដែរ។ ខ្ញុំយល់ថាអាហ្នឹង គឺជា ភាពស៊ីវិល័យមួយ មិនថាតែប្រទេសយើងទេ គឺយើងគួរដើរឲ្យទាន់គេដែរ មិនមែនរឿងអីអាក្រក់ឯណា គ្មានបង្កបញ្ហាអីអោយអ្នកណាផង! ”។

ជាមួយនោះយុវជន ឡុង មេសា អ្នកលក់ថាសចម្រៀងនៅហាង X Young និយាយដែរថា ការលាប Lotion មិនមែនសុទ្ធតែមិនល្អទេ។ គេសង្កត់ធ្ងន់ថា ”បើគ្រាន់តែលាបឡេថាខ្ទើយ ខ្ញុំគិតថាអ្នកនោះចង្អៀតចង្អល់ពេកហើយ! ខ្ញុំលាបឡេដែរហ្នឹង ស្បែកយើងវាជិះផ្លូវឆ្ងាយធម្មតាយើងត្រូវមានឡេការពារពិសេសខ្ញុំអ្នករកស៊ី ដើរឆ្លងច្រកព្រំដែនពេលខ្ញុំនៅកោះកុង ថៃវានាំគ្នានិយាយថៃដាក់ខ្ញុំ អ្នកណាខ្មៅៗវានិយាយខ្មែរដាក់ មានន័យថា វាមើលងាយថាខ្មែរមិនស្អាតតាមពិត អ្នកសស្អាតសុទ្ធតែថៃទំាំងអស់ តាមពិតមកពីយើងមិនចេះតុបតែងខ្លួន ថៃមិនមែនស្អាតជាងយើងប៉ុន្មានទេ គ្រាន់តែគេហ្នឹងស៊ីវិល័យជាងយើង”។

ទោះយ៉ាងណា ការលាបឡេរបស់យុវជននៅតែត្រូវបានពេបជ្រាយដោយយុវនារី។កញ្ញា ផាឡែន និស្សិតឆ្នាំទី ៣ នៅសកលវិទ្យាល័យបញ្ញាសាស្ត្រាលើកឡើងថា ការលាបឡេសមស្របតែចំពោះនារីៗតែប៉ុណ្ណោះ។

“យើងគិតមើល គ្រាន់តែស្រីៗផង ពេលតែងខ្លួនជ្រុលបន្តិចក៏យើងមានអារម្មណ៍ជ្រេញទៅហើយ ចុះទម្រាំខ្លួនជាប្រុសមកញ៉ែកញ៉កតុបតែងមុខក្រោយទៀត? ត្រូវចាំពាក្យមួយថា បុរសសង្ហាព្រោះវិជ្ជា គួរយកពេលទៅរៀនសូត្រល្អជាង។ តែបើថា ស្បែកហ្នឹងមានបញ្ហាខ្លាំង ជាជំងឺ អាហ្នឹងការលាបឡេ លាបថ្នាំព្យាបាលជារឿងធម្មតាទេ លាបប្ដូរពណ៌ស្បែក លាបអោយរលោងស ដូចទទួលយកអត់បានទេបង! ខ្ញុំថាមានតែពួកតារាហ្នឹងធ្វើអញ្ចឹងនោះ ព្រោះមុខរបរគេអញ្ចឹង”។

ចុះមិត្តអ្នកអានដែលលាបឡេទេ? មានទស្សនៈយ៉ាងណាដែរចំពោះបុរសលាបឡេ?

សូមចុចអាន៖ អាហារគ្រោះថ្នាក់ ស្ត្រីមានផ្ទៃពោះគួរជៀសវាងទទួលទាន

សូមចុចអាន៖ នារីស្លៀកក្រហម សរឹបរាង សម្បូរអារម្មណ៍សិច?

សូមចុចអាន៖ បំបៅកូនដោយទឹកដោះធ្វើឲ្យដើមទ្រូងនារីបាត់ភាពមូលណែន?

អត្ថបទ៖ វិបុត្រ