សាសា បង្ហើបរឿងរៀបការ

2016-06-08 17:44:22
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងក្នុងផលិតកម្មថោន កញ្ញា សាសា បានព្រលយថា ចង់រៀបការជាមួយនឹងអ្នករកស៊ីម្នាក់ ប៉ុន្តែមិនទាន់ដល់ពេល ព្រោះកំពុងជាប់រវល់រកស៊ីទាំងសង្ខាង។

"រឿងរៀបការគឺចង់ណាស់បង ប្រហែលជាបន្តិចទៀត។ ណាមួយអាយុក៏ច្រើនហើយដែរ ប៉ុន្តែខ្ញុំនិងដៃគូ សុទ្ធតែជាប់រវល់រកស៊ីរៀងខ្លួន "។ សាសាថ្លែងក្នុងថ្ងៃខួប ឃុន ធារិទ្ធ អ្នកដឹកនាំនៅថោន។

ម្ចាស់បទ "ផុតម៉ោង១២" បន្តឲ្យដឹងទៀតថា នាងនិងសង្សារស្គាល់គ្នាប្រមាណជាង ៣ឆ្នាំហើយ។ ជាមួយគ្នានេះនាងអះអាងថា ក្រុមគ្រួសារទាំងសង្ខាងក៏បានដឹងពីរឿងពួកគេដែរ ជាហេតុធ្វើឲ្យស្នេហាអ្នកទាំងពីរ មិនមានអ្វីជាឧបសគ្គឡើយ។

មិនតែប៉ុណ្ណោះ ម្ចាស់បទ "បោកខោអាវនឹកស្នេហ៍" ថ្លែងទាំងមិនលាក់លៀមថា ឆ្នាំនេះនាងមានអាយុ ២៧ឆ្នាំហើយ ជាវ័យមួយដែលត្រូវតែគិតគូរឿងដៃគូជីវិតមិនមានអ្វីដែលត្រូវលាក់បាំងទស្សនិកជនទេ។ ក្នុងនោះនាងបន្តទៀតថា ដៃគូនាងជាអ្នករកស៊ីធម្មតា មិនមែនជាអ្នកធំមន្ត្រីរាជការដូចដែលសារព័ត៌មានមួយចំនួនបានលើកឡើងកន្លងមកទេ។

សាសា បន្ថែម៖ “ឥឡូវខ្ញុំ និងគាត់កំពុងមើលចិត្តគ្នា ក្នុងនោះបានជាខ្ញុំស្រលាញ់គាត់ព្រោះគាត់ឲ្យតម្លៃខ្ញុំ ទៅកន្លែងណាមួយគាត់មិនចេះចាប់ដៃចាប់ជើងខ្ញុំរញ៉េរញ៉ៃទេ គាត់យល់ថាខ្ញុំជាអ្នកសិល្បៈ និយាយរួមទៅគាត់ជាមនុស្សស្លូតបូត និងគោរពស្រលាញ់ខ្ញុំ"៕

អត្ថបទ៖ ថា ម៉ាលីដា