បន្ទាប់ទូលទុក្ខម្ដាយស្លាប់ សោម ស្រីនាថ ត្អូញសល់នាងម្នាក់ឯងទទួលបន្ទុកកាន់តែធំ

2017-06-14 03:38:21
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាម៉ូដែល សម្ដែង និងពិធីការ សោម ស្រីនាថ បានបាត់បង់ម្ដាយក្លាយជាកូនកំព្រា ត្អូញពីបន្ទុកកាន់តែធ្ងន់ក្រោយអ្នកមានគុណរូបនេះចែកឋានទៅប៉ុន្មានថ្ងៃនេះ ដោយមហារីកសុដន់។

ត្បិតថា កាលនៅរស់ម្ដាយជាប្រភពចំណូលមួយផ្នែកក៏ពិតមែន ប៉ុន្តែស្រីនាថ ថានាងនៅតែបង្គោលគ្រួសារធំមួយ។ ដល់ឥឡូវ អត់ពីម្ដាយដែលធ្លាប់មានចំណូលពីការលក់គុយទាវទៅ ធ្វើឲ្យបន្ទុករ៉ាប់រងគ្រួសាររបស់នាង កាន់តែធ្ងន់ ដោយក្នុងនោះ ត្រូវមាននាទីជាបងស្រីផង ជាម្ដាយផងរ៉ាប់រងប្អូនប្រុស២នាក់ទៀត ដែលកំពុងសិក្សាថ្នាក់ទី១១ ចំណេះទូទៅ។

ស្រីនាថ អះអាងទៀតថា ប្អូនប្រុសទាំងពីរដែលជាកូនភ្លោះ កាន់តែកៀកនឹងឆ្នាំប្រឡង ដែលចាំបាច់ត្រូវរៀនគួរបន្ថែមច្រើន ទើបធ្វើឲ្យការចំណាយកាន់តែច្រើន ងាកទៅចំណូលក៏មិនទៀងទាត់ អីចឹងហើយទើបធ្វើឲ្យនាងបារម្ភ។ "ឥឡូវហ្នឹងបារម្ភបង ចំណូលយើងអត់ទៀងទាត់ ខែណាមានការងារច្រើនទៅ គ្រាន់ ខែខ្លះអត់សូវ ចំណូលតិច អីចឹងបារម្ភណាស់បង"។

តាមការបញ្ជាក់របស់តារាម៉ូដែលរូបនេះ នាងមានចំណូលមិនដល់២ពាន់ដុល្លារទេ ដោយក្នុងនោះខ្ទង់ ៦០០ដុល្លារបានពីការងារជាពិធីការិនីនៅទូរទស្សន៍ប៉ុស្តិ៍លេខ៥។ ក្រៅពីនេះនាងបានឆ្លៀតទៅច្រៀងនៅភោជនីយដ្ឋានម៉េងហ្គោ ចំនួន២ថ្ងៃ រួមទាំងការងារច្រៀងក្នុងក្រុម CSM Girl ដើរម៉ូដ ថតស្ប៉តពាណិជ្ជកម្ម និងសម្ដែងរឿង។

យ៉ាងណា ស្រីនាថ ថា ការងារ ដើរម៉ូដ ថតស្ប៉តពាណិជ្ជកម្ម និងថតរឿងជាដើមសុទ្ធតែមិនអាចរំពឹងទុកបាន គឺមានតែចំណូលប៉ុស្ដិ៍លេខ៥ និងនៅម៉េងហ្គោប៉ុណ្ណោះ អីចឹងហើយទើបធ្វើឲ្យនាងបារម្ភនឹងកត្តាជីវភាព។

សោម ស្រីនាថ ទើបនឹងបាត់បង់ម្ដាយកាលពីថ្ងៃទី ១១ មិថុនានេះ ដោយសារជំងឺមហារីកសុដន់។ វេលាបុណ្យសពដែលធ្វើនៅវត្តទឹកថ្លានោះ មានការជជែកក្នុងគ្រុបសមាគមសិល្បករស្ម័គ្រចិត្ត ពីរឿងមិនសូវមានមិត្តភ័ក្ដិសិល្បករទៅចូលរួមទេ ដោយហេតុថានាងមិនសូវល្បី។

តាមការសាកសួរសាមីខ្លួន មិត្តសិល្បករដែលបានចូលរួមមាន ដួង ហ្សូរីដា ជាអ្នកជួយចាត់ចែងពិធីបុណ្យ។ ក្រៅពីនេះមាន ចន ច័ន្ទលក្ខិណា ដួង ហ្សូរីម៉ា ករុណា ពេជ្រ និងយ៉ែម សំអូន ជាដើម។ "អ្នកខ្លះដូចបង យុគ អីគាត់រវល់អត់បានអញ្ជើញមក តែបានចូលបុណ្យដែរ ហើយអ្នកផ្សេងទៀត គេថានឹងមកនៅថ្ងៃ ៧ថ្ងៃតែម្ដងបង"។ ស្រី នាថ បន្ថែម។

បុណ្យ៧ថ្ងៃ របស់ម្ដាយកញ្ញា សោម ស្រីនាថ នឹងត្រូវប្រារព្ធធ្វើនៅវត្តទឹកថ្លាដែលនាថ្ងៃទី ១៦ មិថុនា ឆ្នាំ ២០១៧ខាងមុខ៕