ក្រសួងវប្បធម៌ ឆ្លើយតបករណីបេក្ខជនខ្មែរស្លៀកឈុតតំណាងជាតិ ច្នៃដោយថៃ រងការរិះគន់

2017-06-12 09:17:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រសួងវប្បធម៌ ទើបបានឆ្លើយជាមួយ Sabay មុននេះ ពាក់ព័ន្ធករណីបេក្ខជនខ្មែរស្លៀកឈុតតំណាងជាតិ ច្នៃដោយជនជាតិថៃ ហើយបានរងការរិះគន់យ៉ាងខ្លាំងពីមហាជន ដោយសារតែពួកគេយល់ថា ជាសកម្មភាពធ្វើឲ្យប៉ះពាល់ដល់វប្បធម៌របស់ជាតិ។

មតិរិះគន់របស់មហាជនលើករណីដែលបានកើតឡើង មួយផ្នែក គឺបាញ់ឆ្ពោះទៅក្រុមហ៊ុននាំបេក្ខជនពីកម្ពុជាទៅប្រឡងនៅថៃ ដែលមិនបានរៀបចំឈុតនេះសម្រាប់បេក្ខជន។ មួយផ្នែកទៀត បានបាញ់ឆ្ពោះមកក្រសួងវប្បធម៌ ដោយបានវាយប្រហារក្រសួងនេះថា មិនបានមើលឲ្យគ្រប់ជ្រុងជ្រោយ។

បញ្ហានេះ ឯកឧត្ដម ថៃ នរៈសត្យា រដ្ឋលេខាធិការ និងជាអ្នកនាំពាក្យក្រសួងវប្បធម៌ បានឆ្លើយប្រាប់ Sabay មុននេះថា ឯកឧត្ដមទើបទទួលបានព័ត៌មាននេះដែរ ក្រោយបានកើតរឿងនៅលើបណ្ដាញសង្គម។ ដូច្នេះ ក្រសួងមិនទាន់មានចំណាត់ការយ៉ាងណានៅឡើយទេ។

យ៉ាងនេះក្ដី ឯកឧត្ដម បានមានប្រសាសន៍ថា សកម្មភាពខាងលើ គឺពិតជាពិបាកទទួលយកបានមែន។ ប៉ុន្តែជំហានដំបូង គឺត្រូវរង់ចាំជួបពិភាក្សាជាមួយរដ្ឋមន្ត្រីសិន។ "ការឆ្គាំឆ្គងនេះ ខ្ញុំគិតថាវាពិបាកភ្នែកមើលដែរហ្នឹង ក៏ប៉ុន្តែរង់ចាំរដ្ឋមន្ត្រីត្រឡប់មកសិន សុំយោបល់ថា ត្រូវធ្វើយ៉ាងម៉េចៗ ហើយក៏ចាំមើលមតិមហាជនដែរ ថាតើនឹងទៅជាយ៉ាងម៉េចៗទៀត។ យើងអត់មានបណ្ដែតបណ្ដោយឲ្យធ្វើអីចឹងទេ គឺក្រុមហ៊ុនជាអ្នកធ្វើដោយខ្លួនឯង"។

ឯកឧត្ដមបន្តទៀតថា សម្រាប់កម្មវិធីស្រដៀងគ្នាដែលធ្វើនៅក្នុងស្រុក គឺក្រុមហ៊ុននានាត្រូវឆ្លងកាត់ក្រសួង។ ដោយឡែកការចេញទៅប្រកួតនៅបរទេស គឺភាគច្រើនម្ចាស់កម្មវិធីធ្វើតាមសេរីភាពរបស់ខ្លួន ដោយមិនបានឆ្លងកាត់ក្រសួងទេ។ ដូច្នេះហើយ រឿងដែលកើតឡើង ចាត់ជាមេរៀនមួយ ខណៈកន្លងមក ក្រសួងក៏មិនបានដាក់កំហិតសុំការត្រួតពិនិត្យលើសកម្មភាពដែលពាក់ព័ន្ធកម្មវិធីនានាដែរ។

បែបនេះហើយ ឯកឧត្ដមបញ្ជាក់ថា នឹងយកបញ្ហានេះទៅសុំយោបល់រដ្ឋមន្ត្រីជាមុនសិន។ យ៉ាងណាក៏ដោយ ទោសទណ្ឌធ្ងន់ធ្ងរជាការពិន័យលើករណីនេះ ទំនងមិនមានទេ។ "សម្រាប់ដំណោះស្រាយ គឺអាចថាដូចកន្លងមកដែលយើងធ្លាប់ធ្វើអីចឹង គឺមានតែអប់រំខ្លះ ស្ដីឲ្យខ្លះអីចឹងទៅ បើឲ្យមានអីធ្ងន់ធ្ងរជាងនេះនោះ ខ្ញុំគិតថា ប្រហែលមិនមានទេ"។

និយាយពីករណីខាងលើដដែល ក្រោយពីធ្វើឲ្យផ្ទុះរឿងនៅយប់មិញ នៅរសៀលថ្ងៃទី ១២ មិថុនា ២០១៧នេះ ខាងតំណាងកម្មវិធី MISTER NATIONAL UNIVERS ដែលបេក្ខជនខ្មែរយើងឈ្មោះ កៅ កែវណារិន បានចូលរួមប្រកួត ក៏បានចេញមកបកស្រាយដែរ ក្រោយទទួលការចោទសួររបស់ លោក វណ្ណ ស៊ីដារ៉ូ ប្រធានយុវផលិតករវ័យក្មេង Z-Way។

តាមរយៈលិខិតមួយច្បាប់ កម្មវិធីខាងលើ បានឲ្យដឹងថា កម្មវិធីបានសម្រេចរៀបចំឈុតខាងលើជូនបេក្ខជនតំណាងកម្ពុជាភ្លាមៗ ក្រោយពីបេក្ខជនរូបនេះមិនមានឈុតតំណាងជាតិរបស់ខ្លួន ដូច្នេះហើយ ទើបធ្វើឲ្យមានកំហុសឆ្គង។ បែបនេះ ពួកគេសុំអភ័យទោសពលរដ្ឋកម្ពុជាទាំងឡាយលើករណីនេះផង។

"យើងខ្ញុំបានជួយក្នុងការផ្តល់ឈុតតំណាងជាតិជូនដល់បេក្ខភាព នៃប្រទេសមួយចំនួនដែលមិនមានឈុតជាតិផ្ទាល់ខ្លួន ឬមិនមានពេលវេលាគ្រប់គ្រាន់ដើម្បីចាត់ចែងឈុតជាតិដោយខ្លួនឯងបានទាន់ពេលវេលា។ ហើយទាក់ទិននឹងបញ្ហានៃឈុតនេះ គឺជាកំហុសតែមួយគត់របស់យើងខ្ញុំ ហើយក៏សូមអភ័យទោសយ៉ាងក្រៃលែងដល់ប្រជាជនកម្ពុជាទាំងអស់សម្រាប់កំហុសឆ្គងនេះ"៕

*កៅ សីហា ប្រតិកម្មនឹងថៃច្នៃសំលៀកបំពាក់ខ្មែរ

*ដឹងមូលហេតុតារាសម្ដែងជើងចាស់ ជួបគ្រោះថ្នាក់ធ្ងន់ធ្ងរ

*រឿងប៉ុណ្ណឹងហើយ រឿងអីមិនសុំទោស!

អត្ថបទ៖ ទារិកា