រៀនចប់អនុបណ្ឌិតកសិកម្មភ្លាម បង្កើតរបរ​ចិញ្ចឹមឃ្មុំ កំពុងល្បីនៅសៀមរាប

  • 2017-12-25 01:31:36
  • ចំនួនមតិ

ចន្លោះមិនឃើញ

ថ្ងៃនេះ ក្រុមការងារផ្លូវទៅស្រុកវគ្គ២ សូមណែនាំ​បុរស​ម្នាក់ ក្រោយរៀនចប់​អនុបណ្ឌិតកសិកម្ម ចាប់​មុខរបរ​ចិញ្ចឹមឃ្មុំ ដូច្នេះចង់ដឹង​ថា តើវិធីចិញ្ចឹមឃ្មុំ ដូចម្ដេច ហើយ​សូមទស្សនា នូវរូបភាព​ដែលក្រុមការងារ​បាន​ផ្ដិត និង រៀបរាប់​ត្រួសៗ​នៅ​ខាង​ក្រោម៖

១. លោក ឈៀង ឈូក វ័យ​២៩​ឆ្នាំ ជា​កសិករ​ចិញ្ចឹម​ឃ្មុំ​នៅ​ឃុំ​រហាល ស្រុក​បន្ទាយ​ស្រី ខេត្ត​សៀមរាប​។ លោក​ចាប់​ផ្ដើម​ប្រកប​របរ​នេះ​តាំង​ពី​ឆ្នាំ​២០១៣ ក្រោយ​ពី​លោក​បញ្ចប់​ថ្នាក់​អនុបណ្ឌិត​ផ្នែក​កសិកម្ម​នៅ​សាកលវិទ្យាល័យ​មានជ័យ ក្នុង​ខេត្ត​បន្ទាយមានជ័យ​។ ទឹក​ឃ្មុំ​មិន​មែន​ជា​ផលិតផល​សម្រេច​តែ​មួយ​គត់​ដែល​លោក ឈូក ទទួល​បាន​ពី​ការ​ចិញ្ចឹម​ឃ្មុំ​ឡើយ​។

២. លម្អង​ផ្កា​គឺ​ជា​ផលិតផល​មួយ​ទៀត ដែល​លោក ឈូក ទទួល​បាន​ពី​ការ​ចិញ្ចឹម​ឃ្មុំ​របស់​លោក​។ លម្អង​នេះ​តែង​តែ​ជាប់​មក​ជាមួយ​នឹង​ជើង​ឃ្មុំ ក្រោយ​ពី​ពួក​វា​ត្រឡប់​មក​ពី​ក្រេប​លម្អង​ផ្កា​វិញ​។ ដើម្បី​ប្រមូល​លម្អង​នេះ​បាន លោក ឈូក ដាក់​តម្រង​ដែល​មាន​រន្ធ​តូច​ៗ​នៅ​មុខ​ផ្លូវ​ចូល​ផ្ទះ​ឃ្មុំ​។ ឃ្មុំ​ដែល​ចូល​ទៅ​ក្នុង​សម្បុក​ត្រូវ​ត្រសុល​ចូល​តាម​រន្ធ​តូច​ៗ​ទាំង​នេះ ដោយ​ទម្លាក់​លម្អង​ជាប់​នឹង​ជើង​ចោល​ទៅ​ក្នុង​តម្រង​របស់​លោក ឈូក​។ លម្អង​ផ្កា​ទាំង​នេះ មាន​សារធាតុ​ចិញ្ចឹម​និង​វីតាមីន​ល្អ​ជាង​ទឹក​ឃ្មុំ​ទៅ​ទៀត​។

៣. ក្រៅ​ពី​លម្អង​ផ្កា​និង​ទឹក​ឃ្មុំ លោក​ឈូក​ក៏​អាច​ផលិត​ក្រមួន​ចេញ​ពី​ផ្លិត​ឃ្មុំ​បាន​ផង​ដែរ​។ ផ្លិត​ឃ្មុំ​ត្រូវ​យក​ទៅ​រំលាយ​ក្នុង​ឆ្នាំង​។ បន្ទាប់​ពី​ផ្លិត​ឃ្មុំ​រលាយ​ក្លាយ​ជា​ទឹក លោក ឈូក ចាក់​ទឹក​ក្រមួន​នោះ​ទៅ​ក្នុង​ផើង​មួយ​ដែល​ចម្រោះ​ក្រណាត់​។ ពេល​ច្រោះ​រួច លោក​ទុក​ទឹក​ក្រមួន​នោះ​រហូត​ដល់​កក ទើប​យក​ក្រមួន​នោះ​ទៅ​ប្រើ​ប្រាស់​តាម​ការ​គួរ​។

៤. ការ​ប្រមូល​ផល​ទឹក​ឃ្មុំ​ពី​កសិដ្ឋាន ខុស​ពី​ការ​ប្រមូល​ផល​ទឹក​ឃ្មុំ​តាម​បែប​ធម្មជាតិ​។ រៀងរាល់​ពេល​ប្រមូល​ផល លោក ឈូក តែង​តែ​ចៀរ​ក្បាល​ផ្លិត​បង្ហូរ​យក​តែ​ទឹក​ឃ្មុំ​ប៉ុនណោះ ដោយ​មិន​បំផ្លាញ​ផ្លិត​ឃ្មុំ​ទាំង​មូល​នោះ​ឡើយ​។

៥. មុន​នឹង​ទទួល​បាន​ផលិត​ផល​ដូច​ខាង​ដើម ការ​ចិញ្ចឹម​ឃ្មុំ​ទាមទារ​ការ​យក​ចិត្ត​ទុក​ដាក់​ថែ​ទាំ​ប្រកប​ដោយ​បច្ចេកទេស​ច្រើន ព្រោះ​ឃ្មុំ​ត្រូវ​ប្រឈម​នឹង​ជំងឺ ការ​បាញ់​ថ្នាំ​ពុល និង​សត្វ​ជា​សត្រូវ​ផ្សេង​ៗ​៕


អត្ថបទ៖ ក្រុមការងារផ្លូវទៅស្រុក