រូបភាព ៦សន្លឹក បង្ហាញពីជីវិត អ្នកឡើងត្នោត និង ធ្វើស្ករត្នោតឈ្ងុយឈ្ងប់ នៅខេត្តសៀមរាប

2017-12-26 02:21:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្ងៃនេះ ក្រុមការងារផ្លូវទៅស្រុកវគ្គ២ បានមកដល់កន្លែងធ្វើស្ករត្នោត និងលក់វត្ថុអនុស្សាវរីយ៍ជាច្រើន នៅឃុំព្រះដាក ស្រុកបន្ទាយស្រី ខេត្តសៀមរាប។ ស្ទើរគ្រប់ភ្ញៀវទេសចរ ជាពិសេសភ្ញៀវបរទេស មិនសូវរំលង ចូលទស្សនាពីការធ្វើស្ករត្នោត និង វត្ថុអនុស្សាវរីយ៍ ជាច្រើន ធ្វើពីផលិតផលដើមត្នោតនោះទេ ប៉ុន្ដែ មានមនុស្សតិចតួចអាចដឹងអំពីជីវភាពប្រចាំថ្ងៃរបស់អ្នកភូមិ។ ដូច្នេះ ក្រុមការងារសូមបង្ហាញ រូបភាពត្រួសៗ នៃការឡើងត្នោត និងធ្វើស្ករត្នោតរបស់អ្នកភូមិព្រះដាក ដូចខាងក្រោមនេះ៖

១- ២៦ឆ្នាំហើយដែលលោក ម៉ិ ឡូ ប្រកបរបរជាអ្នកឡើងត្នោត និងផលិតស្ករត្នោតលក់។ បុរសវ័យ៤៦ឆ្នាំរូបនេះរស់នៅជាមួយគ្រួសារនិងកូនប្រាំនាក់ នៅភូមិតាកុះ ឃុំព្រះដាក់ ស្រុកបន្ទាយស្រី ខេត្តសៀមរាប។ ក្រៅពីការផលិតស្ករត្នោតលក់ គ្រួសាររបស់លោក ម៉ិ ឡូ ក៏មានតូបលក់របស់របរផលិតពីដើមត្នោត រពាក់ និងវត្ថុអនុស្សាវរីយ៍មួយចំនួនទៀតផងដែរ។

២- ជារៀងរាល់ព្រឹក ចាប់ពីម៉ោង៥ លោក ម៉ិ ឡូ តែងតែឡើងត្នោតពី២០ទៅ៣០ដើម ដើម្បីយកទឹកត្នោតទៅកូររម្ងាស់ជាស្ករ។ ដើមត្នោតទាំងនោះ ជាដើមត្នោតដែលលោកជួលពីអ្នកជិតខាងខ្លះ និងជារបស់លោកខ្លះ។

៣- លោក ម៉ិ ឡូ កំពុងបង្កាត់ភ្លើងដើម្បីរម្ងាស់ស្ករត្នោតនៅខាងមុខផ្ទះរបស់លោក។ ដើម្បីឲ្យទឹកត្នោតរីងស្ងួត អាចកូរវឹកជាស្ករបាន លោក ម៉ិ ឡូ ពេលយ៉ាងហោចណាស់ពី១ម៉ោង ទៅ១ម៉ោងកន្លះ អាស្រ័យទៅតាមបរិមាណទឹកត្នោតក្នុងខ្ទះ។

៤- លោក ម៉ិ ឡូ កំពុងអង្គុយវឹកស្ករត្នោតដែលរម្ងាស់រួច។ ការកូរវឹកស្ករត្នោតនេះធ្វើឡើងយ៉ាងលឿននិងប្រុងប្រយ័ត្នបំផុត ដើម្បីកុំឲ្យស្ករត្នោតខូច និងដើម្បីឱ្យស្ករត្នោតមានពណ៌ ស ល្អ។

៥- បន្ទាប់មកស្ករត្នោតដែលកូរវឹករួចហើយ ត្រូវបានលោក ម៉ិ ឡូ និងភរិយា ដួសដាក់នៅក្នុងពុម្ពស្លឹកត្នោត ដើម្បីផលិតជាស្ករផែន។ ការចាក់ផែនស្ករនេះ ធ្វើឡើងដោយប្រញាប់រួសរាន់ បើពុំដូច្នេះទេ ស្ករក្នុងខ្ទះនឹងកក ចាក់ជាផែនលែងកើត។

៦- ផលិតផលស្ករត្នោតរបស់លោក ម៉ិ ឡូ មាន៣ប្រភេទ គឺស្ករផែន ស្ករម្សៅ និងស្ករត្នោតខាប់។ ស្ករត្នោតទាំងនេះ មានដាក់លក់សម្រាប់ភ្ញៀវទេសចរ អ្នកប្រើប្រាស់ និង អ្នកយកទៅលក់បន្តទៀត៕

អត្ថបទ៖ ក្រុមការងារផ្លូវទៅស្រុក