បះសក់! បុរសស្លាប់កាលពី ៧ ខែមុន ស្រាប់តែវិលត្រឡប់មកលេងផ្ទះវិញ

2017-12-23 04:23:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ឧត្តមសេនីយ៍ត្រីប៉ូលិសក្រុងបាងកក លោក ហ្សេនីត សំរ៉ាន់សំរូតគីត បានចាត់តាំងក្រុមការងារមួយដើម្បីស៊ើបអង្កេតសាកសពកំណត់អត្តសញ្ញាណខុសមួយ ដែលនាំឱ្យបុរសម្នាក់នៅខេត្តស៊ីសាកេត ត្រូវបានគេប្រកាសថាស្លាប់ ហើយក្រុមគ្រួសាររបស់គាត់បានរៀបចំពិធីបុណ្យសពនិងបូជាសពបុរសមិនស្គាល់ឈ្មោះម្នាក់ កាលពីជិត ៧ ខែកន្លងទៅ។

លោកសាខុន សាជីវ៉ា អ្នកនេសាទអាយុ ៤៤ ឆ្នាំបានត្រឡប់មកស្រុកកំណើតវិញកាលពីថ្ងៃអាទិត្យ ទី១៧ធ្នូ បន្ទាប់ពីធ្វើការនៅលើទូកមួយក្នុងខេត្តនគរស៊ីធម្មរាជ អស់រយៈពេល ១៤ ខែ ទើបដឹងថាគ្រួសាររបស់គាត់គិតថាគាត់ស្លាប់ហើយបានបូជាសពអ្នកដទៃ។

លោកវរសេនីយឯកកំប៉ាណាត អារុនគីរីរ៉ូច មកពីប៉ូស្តិ៍ប៉ូលិសណាងឡឺង នៃក្រុងបាងកក និយាយថា ប៉ូលិសបានធ្វើតាមនីតិវិធីត្រឹមត្រូវក្នុងការរាយការណ៍ពីមរណភាពរបស់បុរសមិនស្គាល់ឈ្មោះម្នាក់ ដែលសាកសពមើលលែងស្គាល់នេះត្រូវបានរកឃើញកាលពីថ្ងៃទី ២០ ខែឧសភានៅក្នុងបន្ទប់ជួលមួយនៅស្រុកព្រះនគរ។

ប៉ូលិសបានរកឃើញអត្តសញ្ញាណបណ្ណថៃដោយគ្មានរូបថត ឯកសារចុះបញ្ជីគ្រួសារថតចម្លង និងបណ្ណសម្គាល់បុគ្គលិករបស់ក្រុមហ៊ុនសន្តិសុខ ដែលមានឈ្មោះ សាខុន សាជីវ៉ា មុនពេលបញ្ជូនសាកសពទៅធ្វើកោសល្យវិច្ច័យនៅសាលខ្មោចរបស់មន្ទីរពេទ្យវិជ្ជរ៉ា។

សាកសពនោះត្រូវបានរកឃើញថាស្លាប់ដោយសារមេរោគឆ្លងក្នុងក្រពះនិងពោះវៀន ហើយប៉ូលិសបានទាក់ទងសាច់ញាតិលោក សាខុន សាជីវ៉ា មកទទួលយកសាកសពធ្វើបុណ្យ។

លោកកំប៉ាណាតនិយាយថា បន្ទាប់ពីដឹងថា លោក សាខុន សាជីវ៉ា នៅរស់ ប៉ូលិសឥឡូវកំពុងដុតដៃដុតជើងស្រាវជ្រាវរកអត្តសញ្ញាណពិតប្រាកដរបស់សាកសព ទោះបីជាថៅកែរបស់គាត់មិនមានស្នាមម្រាមដៃរបស់គាត់ក៏ដោយ និងកំពុងឆែកមើលការទូទាត់ហិរញ្ញវត្ថុដើម្បីស្វែងរកសាច់ញាតិ ឬ តម្រុយផ្សេងទៀត។

បុគ្គលិកធ្វើការជាមួយគ្នានិយាយប្រាប់ប៉ូលិសថា សាកសពនោះនិយាយថៃ និងមកពីខេត្តភាគឦសាន។

លោកកំប៉ាណាតនិយាយថា ប៉ូលិសក៏ចង់ឱ្យលោក សាខុន សាជីវ៉ា ធ្វើជាសាក្សីទាក់ទិននឹងការអះអាងរបស់គាត់ថា ឯកសាររបស់គាត់ត្រូវបានចោរលួច ដូច្នេះប៉ូលិសអាចសុំឱ្យការិយាល័យស្រុកព្រះនគរលុបចោលបណ្ណមរណភាពរបស់គាត់។

មុននេះ លោក សាខុន សាជីវ៉ា និយាយថា បុរសមីយ៉ាន់ម៉ាម្នាក់បានលួចយកអត្តសញ្ញាណបណ្ណរបស់គាត់ ដូច្នេះ គាត់បានដាក់របាយការណ៍ និងសុំទទួលអត្តសញ្ញាណបណ្ណថ្មីពីការិយាល័យស្រុកខាណំ នៃខេត្តនគរស៊ីធម្មរាជហើយ៕