កុមារាថៃកម្សត់ ត្រូវឪពុកបង្ខំចិត្ត ឃុំក្នុងទ្រុងឈើ៥ឆ្នាំ ដោយសារមូលហេតុ គួរឲ្យស្រណោះ

2017-12-20 07:41:36
ចំនួនមតិ 0 | ចំនួនចែករំលែក 0

ចន្លោះមិនឃើញ

បុរសជនជាតិថៃម្នាក់ បានបង្ហាញពីរឿងរ៉ាវដែលខ្លួនសម្រេចចិត្តចាក់សោកូនប្រុស អាយុ៩ឆ្នាំរបស់ខ្លួន នៅក្នុងទ្រុងឈើជារៀងរាល់ព្រឹក មុនពេលចេញទៅធ្វើការ។

បុរសពោះម៉ាយរូបនេះមានឈ្មោះថា Chamnan Duangjan អាយុ៣៨ឆ្នាំ បានប្រាប់ឲ្យដឹងថា កូនប្រុសរបស់ខ្លួនឈ្មោះ Porrames បានកើតមានបញ្ហាអាកប្បកិរិយា បន្ទាប់ពីរូបគេជួបគ្រោះថ្នាក់ចរាចរ ខណៈពេលកំពុងធ្វើដំណើរទៅសាលារៀន ហើយបានទទួលរងរបួសក្បាលធ្ងន់ធ្ងរ ក្នុងឆ្នាំ២០១២ នៅខេត្ត Krabi ប្រទេសថៃ នៅពេលមានអាយុត្រឹមតែ ៤ឆ្នាំ។

ជាមួយគ្នានេះដែរ ម្ដាយរបស់ Porrames បានចាកចេញពីគ្រួសារ បន្ទាប់ពីរូបគេជួបគ្រោះថ្នាក់ ហើយគ្មាននរណាម្នាក់នៅមើលថែរក្សាគេឡើយ ខណៈ លោក Chamnan ត្រូវចេញទៅធ្វើការនៅខាងក្រៅ ស្របពេលដែលក្មេងប្រុសនេះ តែងតែរត់ទៅលាក់ខ្លួននៅក្នុងព្រៃក្បែរផ្ទះអ្នកជិតខាង។

រហូតមកដល់ពេលនេះ វាមានរយៈពេល៥ឆ្នាំហើយដែលលោក Chamnan បង្ខំចិត្តឃុំឃាំងកូនប្រុសរបស់ខ្លួនបែបនេះ ដោយសារតែអាកប្បកិរិយារបស់គេកាន់តែអាក្រក់ ហើយមិនអាចរៀននៅសាលាបានទៀតផង។

ដោយសារតែការព្រួយបារម្ភពីសុវត្ថិភាពកូនប្រុស បុរសជាកម្មកររោងចក្រកៅស៊ូម្នាក់នេះ បានធ្វើទ្រុងឈើកម្ពស់ និងប្រវែងជាង ២ម៉ែត្រ ដើម្បីដាក់ឃុំកូនប្រុសតែម្ដង។ ទោះជាយ៉ាងណា អ្នករស់នៅជិតខាង តែងតែផ្ដល់អាហារដល់ Porrames តាមរយៈប្រលោះទ្រុងឈើ ទំហំជិត ៥សង់ទីម៉ែត្រ។

លោក Chamnan បានឲ្យដឹងថា លោកអស់សង្ឃឹមក្នុងការជួយ Porrames ហើយបានព្យាយាមធ្វើគ្រប់យ៉ាង និងមិនដឹងថាត្រូវធ្វើអ្វីទៀតឡើយ៕

ចុចអាន៖

ប្រភព៖ Dailymail ប្រែសម្រួល៖ សេង ឡុង