ដីនៅថៃតម្លៃកប់ពពក កន្លែងថ្លៃបំផុត ១ម៉ែត្រការ៉េ ជាង ៣ម៉ឺនដុល្លារ

2017-12-19 08:14:51
ចំនួនមតិ 0 | ចំនួនចែករំលែក 0

ចន្លោះមិនឃើញ

មកដឹង តម្លៃដីនៅប្រទេសថៃក្នុងឆ្នាំ ២០១៨

តាមការវាយតម្លៃថ្មីរបស់ក្រសួងរតនាគារ ឲ្យដឹងថាតម្លៃដីថ្លៃបំផុតក្នុងប្រទេស គឺនៅផ្លូវ Salom ដែលមានតម្លៃ ១ លានបាត (ជាង ៣ម៉ឺនដុល្លារ) ក្នុងមួយការ៉េ ហើយដីដែលថោកបំផុតគឺនៅសង្កាត់ Khok Charoen ខេត្ត Lop Buri ដែលមានតម្លៃត្រឹមតែ ២០បាត (០,៦១ដុល្លារ) ក្នុងមួយការ៉េ។ តម្លៃនេះនឹងត្រូវអនុវត្តឲ្យមានប្រសិទ្ធភាពចាប់ពីថ្ងៃ ទី១ ខែ មករា ឆ្នាំ ២០១៨នេះតទៅ។

លោក Patchara Anuntasilpa អគ្គនាយករតនាគារបាននិយាយថាដីដែលមានតម្លៃថោកបំផុតនៅក្នុងទីក្រុងបាងកក គឺជាដីដែលមិនជាប់ផ្លូវជាតិនៅក្នុងស្រុក Bang Khunthian ដែលតម្លៃ ៥០០ បាត (ជាង ១៥ដុល្លារ) ក្នុងមួយការ៉េ។

ចំណែកឯទីតាំងកំពូលទាំង ៥ ដែលមានតម្លៃខ្ពស់បំផុតនៅក្រៅក្រុងបាងកក គឺនៅលើផ្លូវ Prachathipat នៅក្រុង Hat Yai ខេត្ត Songkhla ដែលមានតម្លៃ ៤០០ ០០០ បាត (ជាង ១ម៉ឺន ២ពាន់ដុល្លារ) ក្នុងមួយការ៉េ ។ ដីនៅ Tha Pae ខេត្តឈៀងម៉ៃមានតម្លៃ ២៥០ ០០០ បាត (ជាង ៧ពាន់ដុល្លារ) ក្នុងមួយការ៉េ, ដីមាត់ឆ្នេរសមុទ្រខេត្តប៉ាតាយ៉ា មានតម្លៃ ២២០ ០០០ បាត (ជិត ៧ពាន់ដុល្លារ) ក្នុងមួយការ៉េ, ដីនៅផ្លូវ Si Chan ខេត្ត Khon Kaen មានតម្លៃ ២០០ ០០០ បាត (ជាង ៦ពាន់ដុល្លារ)ក្នុងមួយការ៉េ និងដីនៅផ្លូវ Phorsi ខេត្ត Udon Thani មានតម្លៃ ១៨០ ០០០បាត (ជាង ៥ពាន់ ដុល្លារ) ក្នុងមួយការ៉េ។

ចំណែកឯការស្ទាប់ស្ទង់តម្លៃដីទាបបំផុត គឺមានទីតាំងស្ថិតនៅក្នុងសង្កាត់ Khok Charoen ខេត្ត Lop Buri ដែលមានតម្លៃ ២០ បាត (០,៦១ ដុល្លារ) ក្នុងមួយការ៉េ បន្ទាប់មកគឺដីនៅស្រុក Kanlayaniwattana ខេត្តឈៀងម៉ៃដែលមានតម្លៃ ២៥ បាត (០,៧៦ ដុល្លារ) ក្នុងមួយការ៉េ។

លោក Patchara បានមានប្រសាសន៍ថា ក្រសួងរតនាគារបានបញ្ចប់ការវាយតម្លៃដីចំនួន ៣២ លានក្បាលនៅទូទាំងប្រទេស ដើម្បីជួយសម្រួលដល់ការអនុវត្តន៍ដីធ្លីនិងពន្ធដារ។ លោកបានបន្តថា ចំនួននៃក្បាលដីអាចត្រូវបានកើនឡើងនាពេលអនាគត ខណៈពេលដែលដីទំហំធំអាចត្រូវកាត់ជាតូចៗថែមទៀត៕

ចុចអាន ៖

ប្រភព៖ Bangkokpost ប្រែសម្រួល៖ រ័ត្ន