ក្មេងប្រុសអាយុ ៧ឆ្នាំ ដុះដុំសាច់ក្នុងខួរក្បាល សុំម្តាយស្លាប់ក្រោមហេតុផលរំជួលចិត្ត

2017-12-25 02:37:46
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីអាយុ ៥ ឆ្នាំ ក្មេងប្រុសឈ្មោះ Chen Xiaotian ត្រូវបានគ្រូពេទ្យពិនិត្យឃើញថាមានដុះដុំសាច់មហារីកធ្ងន់ធ្ងរក្នុងខួរក្បាល។ អ្វីដែលកាន់តែអាក្រក់សម្រាប់គ្រួសាររបស់ពួកគេនោះគឺ ម្តាយរបស់ក្មេងប្រុសឈ្មោះ Zhou Lu អាយុ ៣៤ ឆ្នាំក៏បានកើតជំងឺតម្រងនោមប៉ុន្មានខែក្រោយមក។ ដំបូងគ្រូពេទ្យប្រាប់ថាជំងឺរបស់ក្មេងប្រុសនោះអាចនឹងជាសះស្បើយ ប៉ុន្តែក្រោយមកជំងឺមហារីកកាន់តែធ្ងន់ធ្ងរឡើង ហើយគ្រូពេទ្យបានប្រាប់ថាគេមិនអាចរស់ដល់អាយុពេញវ័យនោះទេ។

ម្ដាយនិងកូនទាំងពីរ បានព្យាយាមពុះពារជាមួយគ្នាអស់រយៈពេល២ឆ្នាំ។ ក្មេងប្រុស Chen ក៏បានធ្លាក់ខ្លួនពិការភ្នែក ដោយសារតែមហារីករីករាលដាលពេញខួរក្បាល។ ដោយដឹងថាជីវិតរបស់គេជិតបញ្ចប់ហើយនោះ ក្មេងប្រុស Chen បានប្រាប់ម្តាយរបស់ខ្លួនថា "ខ្ញុំចង់ជួយសង្គ្រោះជីវិតរបស់ម៉ាក់"។

លោកយាយ Lu Yuanxiu អាយុ ៥៧ ឆ្នាំបាននិយាយថា "គ្រូពេទ្យបានមករកខ្ញុំ ជាជាងទៅរកម្តាយរបស់គេ។ ពួកគេបានប្រាប់ខ្ញុំថា ចៅប្រុសរបស់ខ្ញុំនឹងមិនរស់រានមានជីវិតទេ តែតម្រងនោមរបស់គេអាចជួយម្តាយគេ និងជួយសង្គ្រោះជីវិតមនុស្សពីរនាក់ទៀតបាន។ ខ្ញុំបានពិភាក្សារឿងនេះជាមួយ Zhou នាងបានបដិសេធចំពោះចំនុចនេះ ហើយមិនចង់ឮអំពីរឿងនេះទេ។"

ប៉ុន្តែក្មេងប្រុស Chen បានដឹងពីទុក្ខលំបាកនេះ ហើយបានទាមទារឱ្យម្ដាយយល់ព្រមឱ្យខ្លួនជួយសង្គ្រោះជីវិត។ គ្រូពេទ្យបានបញ្ជាក់ថា នៅពេលក្មេងប្រុសនេះស្លាប់នៅថ្ងៃទី ២ ខែមេសា គេត្រូវបានបញ្ជូនទៅ បន្ទប់វះកាត់ភ្លាមៗដើម្បីកាត់យកតម្រងនោមនិងថ្លើម បន្ទាប់មកយកទៅបរិច្ចាគឲ្យម្តាយ និងមនុស្សពីរនាក់ទៀត។ តម្រងនោមទីពីររបស់គេ ត្រូវបានបរិច្ចាគទៅឲ្យនារីម្នាក់អាយុ ២១ ឆ្នាំ និងថ្លើមត្រូវបានបរិច្ចាគទៅឲ្យបុរសវ័យ ២៧ ឆ្នាំម្នាក់។

លោក Yi Tai អ្នកនាំពាក្យមន្ទីរពេទ្យបាននិយាយថា ការវះកាត់ទាំងបីនេះ គឺទទួលបានជោគជ័យទាំងស្រុង ហើយថាការស្លាប់របស់ក្មេងនេះបានជួយឱ្យមនុស្សបីនាក់ផ្សេងទៀត រស់រានមានជីវិត។ លោកបាននិយាយថា: "ក្រុមគ្រូពេទ្យបានប្រារព្ធពិធីខ្លីនៃការអធិស្ឋាននិងភាពស្ងប់ស្ងាត់សម្រាប់កុមារដ៏កម្សត់នេះមុនពេលវះកាត់ ខ្ញុំគិតថាមានមនុស្សតិចតួចណាស់ដែលអាចទប់ទឹកភ្នែករបស់ពួកគេបាន"៕