ស្រ្តីម្នាក់ច្រឡំបោះចោលចិញ្ចៀនពេជ្រ តម្លៃជិត២ម៉ឺនដុល្លារ ចូលគំនរសំរាម តែចុងក្រោយជួបរឿងមួយ

2017-12-22 04:37:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្រ្តីជនជាតិចិនម្នាក់ មានឈ្មោះថា Xia បានច្រឡំដៃបោះចោលចិញ្ចៀនពេជ្រ តម្លៃជិត២ម៉ឺនដុល្លារ ចូលគំនរសំរាម ប៉ុន្តែចុងក្រោយអាចរើសបានមកវិញ ដោយសារមានការជួយពីកម្មករអនាម័យ។

កម្មករអនាម័យមួយក្រុម បានស្វែងរកចិញ្ចៀនពេជ្រនោះ នៅក្នុងគំនរសំរាមប្រមាណជា ១៣តោន នៅកន្លែងកែច្នៃសំរាមមួយ ក្នុងទីក្រុង Yangzhou ប្រទេសចិន កាលពីថ្ងៃអង្គារ កន្លងទៅនេះ។

យោងតាមប្រភពព័ត៌មាន បានឲ្យដឹងថា ចិញ្ចៀនពេជ្រនោះមានតម្លៃ ១២០ ០០០យ័ន ឬប្រមាណ ១៧ ០០០ម៉ឺនដុល្លារ គឺជាកាដូដែលស្វាមីរបស់អ្នកស្រី Xia ឲ្យអ្នកស្រី នៅពេលភ្ជាប់ពាក្យ។ អ្នកស្រី Xia ស្រលាញ់ចិញ្ចៀនពេជ្រខ្លាំងណាស់។ អ្នកស្រីតែងតែដោះវាចេញពីដៃ មុនពេលចូលដេក ហើយពាក់វាវិញនៅពេលព្រឹក។

នៅរសៀលថ្ងៃទី១៨ ខែធ្នូ នៅពេលដែលអ្នកស្រី Xia យកសំរាមទៅបោះចោល ពេលនោះចិញ្ចៀនក៏បានរបូតចេញពីម្រាមដៃរបស់អ្នកស្រី ចូលគំនរសំរាមជាមួយគ្នាតែម្ដង។ ទោះជាយ៉ាងណា នៅពេលអ្នកស្រីដឹងថាខ្លួនបាត់ចិញ្ចៀន គឺយឺតពេលទៅហើយ ព្រោះវារំលងផុត ៣ម៉ោងបាត់ទៅហើយ ខណៈអ្នកស្រីក៏បានត្រលប់ទៅរកវិញដែរ តែមិនអាចរកឃើញឡើយ។

ក្រោយមក អ្នកស្រីបានទាក់ទងទៅស្ថានីយអនាម័យក្នុងតំបន់ នៅវេលាម៉ោង ៤រសៀល ប៉ុន្តែអ្នកមើលការខុសត្រូវរបស់ស្ថានីយនោះ បានប្រាប់ថា សំរាមត្រូវគេប្រមូល ហើយបញ្ជូនទៅកន្លែងកែច្នៃបាត់ទៅហើយ។ អ្នកមើលការរូបនេះ ក៏បានស្នើសុំឲ្យកន្លែងកែច្នៃផ្អាកដំណើរការសិន។

នៅថ្ងៃទី១៩ ខែធ្នូ វេលាម៉ោង ៦ព្រឹក កម្មករអនាម័យចំនួន ៨នាក់ បានចាប់ផ្ដើមស្វែងរកចិញ្ចៀនពេជ្រនោះ នៅក្នុងគំនរសំរាមដែលមានទម្ងន់ប្រហែល ១៣តោន។ នៅទីបំផុត កម្មករម្នាក់ឈ្មោះ Yang Zhenglong បានរកវាឃើញ នៅវេលាម៉ោងប្រហែល ៨ព្រឹកតែម្តង៕

ចុចអាន៖

ប្រភព៖ Dailymail ប្រែសម្រួល៖ សេង ឡុង