ពេទ្យប្រាប់ថាមានជំងឺអេដស៍ ដេកចាំថ្ងៃស្លាប់អស់ ៧ឆ្នាំ ចុងក្រោយដឹងលទ្ធផលហួសចិត្ត

2017-12-07 02:30:05
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីឆ្នាំ ២០០៨ លោក Zhong Xiaowei រស់នៅទីក្រុង Chengdu ត្រូវបានពេទ្យពិនិត្យឃើញថាបានផ្ទុកមេរោគអេដស៍ ធ្វើឲ្យលោកដេកចាំថ្ងៃស្លាប់អស់រយៈពេល ៧ឆ្នាំ។ ប៉ុន្តែក្រោយមកការពិនិត្យមួយទៀតបង្ហាញថាលោកមិនបានផ្ទុកមេរោគអេដស៍នោះទេ។

មុនពេលរៀបការ លោក Zhong និងមិត្តស្រីបានព្រមព្រៀងគ្នាទៅពិនិត្យឈាមរកមេរោគអេដស៍ ។ ជាលទ្ធផលលោក Zhong ត្រូវបានមណ្ឌលសុខភាព Chengdu CDC ប្រាប់កាលពីខែធ្នូឆ្នាំ២០០៨ថា ឈាមរបស់លោកទទួលបានលទ្ធផលវិជ្ជមាន និងមានន័យថាកើតអេដស៍។ ហើយលទ្ធផលនេះក៏ត្រូវបានបញ្ជាក់ដោយមណ្ឌលសុខភាព Sichuan CDC ផងដែរ។

លោក Zhong និយាយថាលោកទទួលយកលទ្ធផលនេះដោយមិនមានការងឿងឆ្ងល់នោះទេ និងជឿថាវាកើតឡើងដោយសារលោកចាក់ថ្នាំហេរ៉ូអ៊ីនកាលពីប៉ុន្មានឆ្នាំមុន។ មិត្តស្រីនិងក្រុមគ្រួសារបានចាកចេញនិងផ្ដាច់ទំនាក់ទំនងជាមួយលោក។

លោកក៏ចាប់ផ្ដើមសំងំក្នុងអាគារបាក់បែក និងបដិសេធមិនលេបថ្នាំដើម្បីរងចាំសេចក្ដីស្លាប់អស់រយៈពេល ៧ឆ្នាំ។ លោកបាននិយាយថាធ្លាប់គិតចង់សម្លាប់ខ្លួនដែរ ប៉ុន្តែដោយសារអាណិតម្ដាយរបស់លោកទើបមិនដាច់ចិត្ត។

ក្រោយមកនៅខែធ្នូឆ្នាំ ២០១៥ លោកបានទៅពិនិត្យឈាមម្តងទៀតនៅ Jinniu District CDC ដែលលទ្ធផលចេញមកធ្វើឲ្យលោកឆ្ងល់យ៉ាងខ្លាំងដោយសារតែវាមិនដូចទៅនឹងលទ្ធផលរបស់អ្នកកើតអេដស៍ផ្សេងទៀត។ វាបានធ្វើឲ្យលោកសម្រេចចិត្តទៅពិនិត្យឈាមម្តងទៀតនៅមន្ទីរពេទ្យ Huaxi នៃសកលវិទ្យាល័យ Sichuan ដែលលទ្ធផលបង្ហាញពីភាពអវិជ្ជមាន ហើយលោកមិនមានផ្ទុកមេរោគអេដស៍នោះទេ។

ក្រោយពីដឹងលទ្ធផលដ៏រំភើបនេះ លោក Zhong បានសម្រេចចិត្តថានឹងប្តឹងមណ្ឌលសុខភាព Chengdu CDC និង Sichuan ដើម្បីទាមទារឲ្យពួកគេធ្វើការសុំទោសចំពោះកំហុសឆ្គងរបស់ពួកគេ ហើយត្រូវសងថ្លៃជំងឺចិត្តទាំងអស់ដែលលោកបានទទួលរងអស់រយៈពេល ៧ឆ្នាំ៕

ចុចអាន៖

ប្រភព៖ Shanghaiist ប្រែសម្រួល៖ រ័ត្ន