អាថ៌កំបាំងរក្សាសព៣ ល្បីរន្ទឺពេញពិភពលោក តែមិនទាន់មានអ្នកបកស្រាយច្បាស់

2017-12-06 09:04:29
ចំនួនមតិ 0 | ចំនួនចែករំលែក 0

ចន្លោះមិនឃើញ

រឿងរ៉ាវប្រវត្តិសាស្ត្រមួយចំនួន បានបន្សល់ទុកជាចម្ងល់សម្រាប់មនុស្សជំនាន់ក្រោយ ហើយសូម្បីអ្នកវិទ្យាសាស្ត្រដែលស្រាវជ្រាវខ្លាំង ក៏អាចស្រឡាំងកាំងនឹងភាពអស្ចារ្យកាលពីសម័យបុរាណដែរ។ ក្នុងចំណោមរឿងទាំងអស់នោះ អាថ៌កំបាំងរក្សាសពរបស់មនុស្សជំនាន់ដើមទាំង៣ នៅប្រទេសចិន នៅមិនទាន់មានអ្នកវិទ្យាសាស្ត្រអាចបកស្រាយបានច្បាស់នោះទេ។

១. ព្រះសង្ឃបាត់ព្រះកាយ ២០០ឆ្នាំ រកឃើញក្នុងឆ្នាំ២០១៥

កាលពីខែមករា ឆ្នាំ២០១៥ អ្នកជំនាញបានរកឃើញសាកសពព្រះសង្ឃមួយអង្គដែលបាត់ព្រះកាយប្រហែលពីររយឆ្នាំ ក្នុងកាយវិការសមាធិ ព្រះហស្តទាំងគូក្ដោបចូលគ្នា ហើយមានសភាពល្អ មិនស្អុយរលួយឡើយ។ រឿងរ៉ាវនេះ បានបង្កការភ្ញាក់ផ្អើលយ៉ាងខ្លាំងចំពោះបណ្ដាញសារព័ត៌មានធំៗលើលោក និងបង្កើតជាចម្ងល់ថាហេតុអ្វីបានជាព្រះសពនេះមិនស្អុយរលួយ។

អ្វីដែលគួរឲ្យចាប់អារម្មណ៍បំផុត គឺពេលនោះបព្វជិតជាន់ខ្ពស់ក្នុងសាសនាព្រះពុទ្ធមួយអង្គ បានបញ្ចេញសង្ឃដីកាថា ព្រះសង្ឃដែលរកឃើញគង់ភាវនាក្នុងព្រះភ្នែនដូចផ្កាឈូកនេះ កំពុងសមាធិស្លុងអារម្មណ៍អណ្ដែតអណ្ដូងស្មារតី និងមិនទាន់សុគតនៅឡើយទេ។ សពព្រះសង្ឃដែលរកឃើញរក្សាទុកក្នុងស្បែកសត្វ នៅភាគកណ្ដាលប្រទេសម៉ុងហ្គោលីនេះ ត្រូវគេយកទៅស្រាវជ្រាវអស់ពេលជាយូរ និងមិនទាន់មានការបញ្ជាក់ច្បាស់នៅឡើយទេ។

អ្នកវិទ្យាសាស្ត្រ នៅតែមិនអាចបកស្រាយបានថា ហេតុអ្វីបានជាសពព្រះសង្ឃអាចនៅរក្សាបានយ៉ាងល្អដូចនេះ ប៉ុន្តែមតិខ្លះបានអះអាងថា អាកាសធាតុត្រជាក់គឺជាមូលហេតុនៅពីក្រោយអាថ៌កំបាំងដ៏អស្ចារ្យនេះ។ យ៉ាងណាក្ដី វេជ្ជបណ្ឌិត Barry Kerzin ដែលជាគ្រូពេទ្យប្រចាំព្រះកាយរបស់មេដឹកនាំសាសនានៅទីបេ ដាឡៃ ឡាម៉ា បានប្រាប់កាសែត Siberian Times ថា ព្រះសង្ឃដែលរកឃើញ កំពុងស្ថិតនៅក្នុងស្ថានភាពសមាធិដ៏កម្រមួយ។ លោកបានបន្តទៀតថា ប្រសិនបើអ្នកតាំងសមាធិ អាចបន្តនៅក្នុងស្ថានភាពបែបនេះរហូត គេនឹងក្លាយទៅជាព្រះពុទ្ធ។

សពព្រះសង្ឃនេះ ត្រូវរកឃើញ ក្រោយពេលបុរសម្នាក់លួចយក និងបម្រុងលក់តាមទីផ្សារងងឹត។ មន្ត្រីប៉ូលិសប្រទេសម៉ុងហ្គោលី បានចាប់ខ្លួនជនសង្ស័យហើយ ចំណែកសពព្រះសង្ឃត្រូវបញ្ជូនទៅរក្សាទុកនៅមជ្ឈមណ្ឌលជាតិជំនាញកោសល្យវិច័យ រហូតបាត់ដំណឹងដល់សព្វថ្ងៃ។

២. ក្នុងរូបចម្លាក់ ១០០០ឆ្នាំ បែរជាមានបង្កប់សពព្រះសង្ឃយ៉ាងអាថ៌កំបាំង

នៅខែកុម្ភៈឆ្នាំ២០១៥ ពោលគឺមួយខែក្រោយមក ក្រុមអ្នកវិទ្យាសាស្ត្រមានការភ្ញាក់ផ្អើលយ៉ាងខ្លាំង ក្រោយថតកាំរស្មីទៅលើរូបចម្លាក់មួយ ប្រទះឃើញសាកសពព្រះសង្ឃមួយអង្គបាត់សរីរាង្គទាំងអស់កំពុងសមាធិនៅក្នុងនោះ។ រូបចម្លាក់ដែលរកឃើញនេះ អាចមានអាយុកាលតាំងពីសតវត្សទី១១ ឬ ១២ មកម្ល៉េះ។

ការថតកាំរស្មីទៅលើរូបចម្លាក់នេះ ធ្វើឡើងនៅសារមន្ទីរ Drents នាមជ្ឈមណ្ឌលវេជ្ជសាស្ត្រ Meander ប្រទេសហុល្លង់។ ក្រុមអ្នកស្រាវជ្រាវដឹងតាំងពីមុនថតថាមានសពព្រះសង្ឃនៅក្នុងនោះ ប៉ុន្តែបន្ទាប់ពីថតរួចពួកគេរឹតតែមានការភ្ញាក់ផ្អើល ព្រោះសរីរាង្គរបស់ព្រះសង្ឃត្រូវគេយកចេញពីក្នុងព្រះកាយអស់។ លើសពីនេះ គេថែមទាំងរកឃើញក្រដាសរុំដែលមានសរសេរអក្សរចិននៅជាមួយសពព្រះសង្ឃផងដែរ។

ពុទ្ធសាសនិកជាច្រើន ជឿជាក់ថាព្រះសង្ឃនៅក្នុងរូបចម្លាក់នេះ មិនទាន់សុគតទេ ពោលគឺនៅកំពុងសមាធិយ៉ាងស្ងៀមស្ងាត់ដូចព្រះសង្ឃដែលបាត់ព្រះកាយ ២០០ឆ្នាំ និងរកឃើញកាលពីខែមករា ឆ្នាំ២០១៥ យ៉ាងដូច្នេះដែរ។

៣. ការរក្សាសពជាង ២ពាន់ឆ្នាំ គ្មានអ្នកវិទ្យាសាស្ត្រណាបកស្រាយបាន

រឿងរ៉ាវរក្សាសាកសពជាង ២ពាន់ឆ្នាំនៅប្រទេសចិន បានល្បីពាសពេញពិភពលោកអស់ជាច្រើនឆ្នាំមកហើយ។ រហូតមកដល់បច្ចុប្បន្ន គ្មានអ្នកវិទ្យាសាស្ត្រណាអាចបកស្រាយរួច ថាក្នុងពេលនោះ គេបានប្រើបច្ចេកទេសអ្វី ទើបអាចធ្វើឲ្យសាកសពមិនរលួយ ហើយមានសភាពធម្មតាទាំងសរីរាង្គខាងក្នុង។

Lady of Dai ដែលត្រូវគេស្គាល់ថាមានឈ្មោះ Xin Zhui មានជីវិតនៅក្នុងរាជវង្សហាន(ឆ្នាំ២០៦ មុនគ្រិស្តសករាជ រហូតដល់ឆ្នាំ២២៩ នៃគ្រិស្តសករាជ) ជាប្រពន្ធរបស់អភិជនម្នាក់ឈ្មោះ Li Cang នៃជនជាតិភាគតិច Dai។ នាងបានស្លាប់ក្នុងចន្លោះឆ្នាំ ១៧៨-១៤៥មុនគ្រិស្តសករាជ នៅអាយុប្រហែល ៥០ឆ្នាំ។ ចំណែកមូលហេតុស្លាប់ អាចបណ្ដាលមកពីជំងឺគាំងបេះដូង ដែលអ្នកវិទ្យាសាស្ត្រចាត់ទុកថាជាករណីដំបូងបំផុត។

សាច់របស់សាកសពហាក់នៅទន់ល្អ ឯដៃ និងជើងទាំងសងខាង សុទ្ធតែអាចបត់បាន។ ចំណែកគ្រឿងក្នុងវិញ គ្មានការខូចខាតឡើយ ហើយអ្នកវិទ្យាសាស្ត្រនៅអាចពិនិត្យដឹងថា នាងមានឈាមប្រភេទ A ទៀតផង។ អ្វីដែលគួរឲ្យស្ញប់ស្ញែងនោះ គឺនាងនៅមានសក់ និងត្របកភ្នែក ដែលធ្វើឲ្យអ្នកវិទ្យាសាស្ត្រពិបាកជឿ។

ក្ដារមឈូសរបស់ Xin Zhui ត្រូវប្រទះឃើញក្នុងទីទួលមួយនៅក្រុង Changsha ខេត្ត Hunan ប្រទេសចិន ក្នុងឆ្នាំ១៩៧១ នៅពេលកម្មករកំពុងជីកលេណដ្ឋានក្រោមដី។ សពរបស់លោកស្រី Zhui ត្រូវរុំជិតដោយសូត្រ ជាង២០ស្រទាប់ និងរក្សាទុកក្នុងក្ដារមឈូស ៤ជាន់ ហើយប្រើធ្យូង និងដីឥដ្ឋបិទពីក្រៅយ៉ាងរឹងមាំរហូតបាក់តេរីមិនអាចចូលបាន។

យ៉ាងណាក្ដី រហូតមកដល់បច្ចុប្បន្ននេះ អ្នកវិទ្យាសាស្ត្រនៅតែមិនអាចបកស្រាយបានថា តើគេបានប្រើសារជាតិអ្វីបន្ថែមទៀត ទើបរក្សាសាកសពមិនឲ្យរលួយ ព្រោះតាមធម្មតាគឺមិនអាចទៅរួចនោះទេ។ សាកសពនេះត្រូវរក្សាទុកនៅ សារមន្ទីរខេត្ត Hunan ដើម្បីធ្វើការពិសោធន៍បន្តទៀត៕

ចុចអានអត្ថបទ៖

ប្រភព៖ BBC | Dailymail | WonderList ប្រែសម្រួល៖ គង់ វិសាល