តារាបាល់ទាត់ឆ្នើមៗ ដែលមើលទៅធ្លាក់ទម្រង់លេងនៅចុងឆ្នាំ២០១៧

2017-12-26 02:53:47
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតក្នុងលីគកំពូលកម្ពុជាជិតនឹងបញ្ចប់ ស្របពេលកម្មវិធីប្រកួតរបស់ជម្រើសជាតិនៅឆ្នាំ២០១៧ ក៏អស់ហើយដែរ។ សម្រាប់ឆ្នាំ២០១៧ នេះមានកីឡាករដែលធ្លាប់ជាប់ជម្រើសជាតិមួយចំនួន មើលទៅហាក់មានការប្រែប្រួល និងធ្លាក់ទម្រង់លេងក្នុងការបង្ហាញខ្លួនឲ្យក្រុមជម្រើសជាតិ និងក្លឹបរបស់ខ្លួន។ ថ្ងៃនៃ Sabay សូមលើកយកកីឡាករល្បីៗមួយចំនួន ដែលមើលទៅហាក់ធ្លាក់ទម្រង់នៅចុងឆ្នាំ២០១៧៖

១-ចាន់ វន្ឍនាកា ៖ តារាបាល់ទាត់មានដើមកំណើតមកពីខេត្តកំពតរូបនេះត្រូវបានគេមើលឃើញថា មានការធ្លាក់ចុះទម្រ់ងលេងមួយកម្រិត ដោយសារការមិនបានបង្ហាញខ្លួនលើទីលានស្ទើរពេញមួយរដូវកាលនៅក្លឹប Fujieda MyFC ពោលគឺបានលេងតិចតួចប៉ុណ្ណោះ។ ទាក់ទងនឹងទម្រង់លេងរបស់តារាឆ្នើមកម្ពុជារូបនេះ សូម្បីអតីតគ្រូបង្វឹកកម្ពុជាលោក ប្រាក់ សុវណ្ណារ៉ា និងលោក Leonardo Vitorino ក៏បានលើកឡើងស្រដៀងគ្នាថា វឌ្ឍនាកា ហាក់មានការធ្លាក់ចុះទម្រង់លេងក្រោយពេលផ្លាស់ទៅលេងនៅជប៉ុន។

ចាន់ វឌ្ឍនាកា (លេខ១១)

២-ហុង ផេង៖ អតីតខ្សែការពារកណ្ដាលដ៏រឹងមាំរបស់កម្ពុជារូបនេះ ត្រូវបានជ្រុះចេញពីបញ្ជីជម្រើសជាតិ ដោយសាររបួសញាំញី ហើយក៏បណ្ដាលឲ្យរូបគេមានទម្រង់លេងធ្លាក់ចុះខុសពីឆ្នាំ២០១៦ យ៉ាងខ្លាំងផងដែរ។

ហុង ផេង (លេខ២៥)

៣-ច្រឹង ពលរដ្ឋ ៖ ខ្សែបម្រើជម្រើសជាតិកម្ពុជារូបនេះហាក់បាត់បង់ប្រជាប្រិយភាពមួយរយៈ ក្រោយការបាត់បង់ឱកាសបង្ហាញខ្លួនឲ្យជម្រើសជាតិ ដោយសារការកាត់ឈ្មោះជុំវិញការមិនគោរពវិន័យកាលក្រោមការដឹកនាំរបស់លោក Leo។ ប៉ុន្តែយ៉ាងណាក្រោយមានការជាប់ឈ្មោះឡើងវិញ ក្រោមការដឹកនាំរបស់លោក ប្រាក់ សុវណ្ណារ៉ា រូបគេនៅតែគ្មានឱកាសបានលេងលើទីលានដដែល។ ទោះជាយ៉ាងណា ពលរដ្ឋ ត្រូវបានគេមើលឃើញថា ទម្រង់លេងហាក់ធ្លាក់ចុះដូចគ្នាបន្ទាប់ពីមានរឿងរ៉ាវខាងលើ។

ច្រឹង ពលរដ្ឋ (លេខ ១៦)

៤-ធារី ចន្ថាប៊ីន៖ ខ្សែបម្រើកណ្ដាលរបស់ជម្រើសជាតិកម្ពុជាកំពុងស្ថិតនៅក្លឹប Terengganu FC នៃក្របខណ្ឌបាល់ទាត់កំពូលរបស់ប្រទេសម៉ាឡេស៊ី។ បើទោះទទួលបានឱកាសបង្ហាញខ្លួនឲ្យក្លឹបនៅក្រៅប្រទេសក្ដីកីឡាកររូបនេះមិនបានជាប់ជម្រើសជាតិឡើយ ក្នុងប៉ុន្មានប្រកួតចុងក្រោយរបស់ជម្រើសជាតិ។

ធារី ចន្ថាប៊ីន (ស្ដាំ)

៥-ឃួន ឡាបូរ៉ាវី ៖ គ្រប់គ្នាប្រហែលជាស្គាល់ហើយថា ខ្សែប្រយុទ្ធចាស់វស្សារបស់កម្ពុជារូបនេះមានការប្រែប្រួលយ៉ាងណានៅឆ្នាំ២០១៧ ទម្រង់លេងមានការធ្លាក់ចុះយ៉ាងខ្លាំង ពិសេសគឺស្ថានភាពកម្លាំង និងល្បឿន។ វាពិតជាមានភាពខុសគ្នាឆ្ងាយកាលពីឆ្នាំ២០១៦ និងឆ្នាំ២០១៥ ដែលកីឡាកររូបនេះកំពុងលេងល្អ។ ម្យ៉ាងទៀតខ្សែប្រយុទ្ធរបស់បឹងកេតរូបនេះស្ទើរតែបាត់បង់តំណែងជម្រើស១១នាក់ដំបូងរបស់ខ្លួនទៅហើយនៅចុងឆ្នាំ២០១៧នេះ៕