ម្តាយ សារ៉ាយ សក្ខណា ត្រូវម្ចាស់បំណុលរឹបអូសឡាន ឡិចស៊ីស 470

2018-01-03 09:32:37
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកស្រី ផាន់ សម្ផស្ស ម្ដាយ សារ៉ាយ សក្ខណា ត្រូវភាគីម្ចាស់បំណុលឈ្មោះ ឃុត ស្រីមុំ ជាអ្នកចងការប្រាក់ បានរឹបអូសយករថយន្តម៉ាក ឡិចស៊ីស 470 ពណ៌ទឹកដោះគោ ពាក់ស្លាកលេខ 2AJ 5488 មកតម្កល់ទុកនៅតុលាការ។ នេះបើតាមការបង្ហើបពីមន្ត្រីតុលាការនៅវេលាម៉ោង២៖៤០នាទីរសៀលនេះ ដោយអះអាងថា អ្នកស្រីពាក់ព័ន្ធនឹងបំណុលចំនួន៣ម៉ឺនដុល្លារ ហើយមិនដោះស្រាយ។

បានមន្ត្រីតុលាការបង្ហើបថា

ម្តាយអ្នកនាង សារ៉ាយ សក្ខណា

មកទល់ម៉ោងនេះ រថយន្តរបស់អ្នកស្រីត្រូវបានតុលាការឃាត់ទុក ខណៈអ្នកស្រីបានបើករថយន្តមកឲ្យតុលាការតម្កល់ទុកដោយផ្ទាល់ ហើយក៏បានចូលក្នុងតុលាការ ហើយមិនមានការបកស្រាយ។

រថយន្តម៉ាក ឡិចស៊ីស របស់ម្តាយអ្នកនាង សារ៉ាយ សក្ខណា

ប្រភពពីតុលាការនិយាយថា រថយន្តរបស់អ្នកស្រី សម្ផស្ស ម្ដាយអ្នកនាង សារ៉ាយ សក្ខណា ត្រូវបានតុលាការរឹបអូសតាមបណ្ដឹងរបស់អ្នកស្រី ឃុត ស្រីមុំ បន្ទាប់ពីអ្នកស្រីខ្ចីលុយចំនួន៣ម៉ឺនដុល្លារ ហើយមិនសងទាំងដើម និងការប្រាក់ ទើបឈានដល់ការរឹបអូសនេះ។ ប្រភពនោះថា អ្នកស្រី សម្ផស្ស បានយករថយន្តដែលបានបង់រំលោះនៅឃ្លាំងរថយន្ត យីហោ A5 យកមកបញ្ចាំអ្នកស្រី ឃុត ស្រីមុំ កាលពី១ឆ្នាំមុន តែដោយមានការយោគយល់ អ្នកស្រី ឃុត ស្រីមុំ ម្ចាស់ចងការប្រាក់ ក៏បានប្រគល់រថយន្តឲ្យយកមកប្រើមួយរយៈ។

ប្រភពដដែលបន្តថា អ្នកស្រី ផាន់ សម្ផស្ស មិនបានបង់ការប្រាក់ និងមិនដោះស្រាយបំណុលរយៈពេលយូរមកហើយ ទើបឈានដល់ការដាក់បណ្ដឹង ហើយដោយមានការតវ៉ា ទើបឈានដល់ការស្នើឲ្យតុលាការរឹបអូសយករថយន្តរបស់អ្នកស្រី មកតម្កល់ទុកនៅតុលាការ នៅរសៀលថ្ងៃទី៣ មករានេះ។

សារ៉ាយ សក្ខណា និងអ្នកម្តាយ

ស្របជាមួយព័ត៌មាននេះ គេឃើញម្ដាយអ្នកនាង សារ៉ាយ សក្ខណា បិទម៉ាស់ បើករថយន្តដែលមានជម្លោះចូលក្នុងតុលាការ ដោយមិនអាចសុំការបកស្រាយបាននៅឡើយទេ។ មកទល់ពេលនេះ អ្នកស្រីម្ដាយ សារ៉ាយ សក្ខណា នៅតែមិនអាចសុំការបំភ្លឺ ស្របគ្នាដែលរថយន្តដែលត្រូវបានតុលាការរឹបអូស ត្រូវបានទម្លាយថា នឹងបន្តតម្កល់ទុករហូតដល់មានដំណោះស្រាយ ឯអ្នកនាង សារ៉ាយ សក្ខណា ក៏មិនអាចសុំការបកស្រាយបានដូចគ្នា ដោយទូរស័ព្ទរបស់អ្នកនាងមិនហៅចូលបាន៕

អត្ថបទៈ ចរិយា