នារីថៃពិការភ្នែកត្រូវជាប់គុក ១៨ខែ ក្រោយ Share សារលើ Facebook ប្រមាថរាជវង្ស

2018-01-05 04:18:46
ចំនួនមតិ 0 | ចំនួនចែករំលែក 0

ចន្លោះមិនឃើញ

នារីពិការភ្នែកម្នាក់ ត្រូវតុលាការថៃកាត់ទោសឲ្យជាប់គុក ១៨ខែ នៅថ្ងៃព្រហស្បតិ៍ម្សិលមិញនេះ ដោយសារការ Share សារនៅលើបណ្ដាញសង្គម Facebook ដែលចាត់ទុកថាជាការប្រមាថដល់គ្រួសាររាជវង្ស។

នារីខាងលើមានឈ្មោះថា Nuhurhayati Masoe អាយុ២៣ឆ្នាំ មកពីខេត្ត Yala ប្រទេសថៃ ត្រូវបានផ្ដន្ទាទោសបន្ទាប់ពី Share សម្រង់អត្ថបទ ពីអត្ថបទមួយដែលត្រូវបានបង្ហោះលើបណ្ដាញសង្គម Facebook កាលពីខែតុលា ឆ្នាំ២០១៦។

នាង Masoe បានឮអត្ថបទនោះតាមរយៈកម្មវិធីសំឡេងសម្រាប់ជនពិការភ្នែក។

«ចៅក្រមបាននិយាយថា ពួកគេអាណិតអាសូរនាង ដោយសារតែនាងពិការភ្នែក ប៉ុន្តែមិនអាចព្យួរទោសបានឡើយ ព្រោះនាងបានប្រព្រឹត្តបទល្មើសធ្ងន់ធ្ងរ»។ នេះបើយោងតាមមេធាវីការពារក្តី លោក Kaosar Aleemama ប្រាប់ទៅកាន់សារព័ត៌មាន AFP។

ទោះជាយ៉ាងណា មេធាវីការពារក្តីដដែលបានឲ្យដឹងបន្ថែមថា ការពិតនាង Masoe ត្រូវតុលាការផ្ដន្ទាទោសរយៈពេល ៣ឆ្នាំ ប៉ុន្តែបានកាត់បន្ថយមកត្រឹម ១៨ខែវិញ ដោយសារតែនាងបានទទួលទោសកំហុស។

គួរបញ្ជាក់ឲ្យដឹងថា នៅក្នុងប្រទេសថៃ អ្នកដែលប្រមាថដល់ខ្សែរាជវង្ស ជាពិសេសព្រះមហាក្សត្រ អាចត្រូវជាប់គុករហូតដល់ទៅ ១៥ឆ្នាំឯណោះ៕

ចុចអាន៖

ប្រភព៖ Dailymail ប្រែសម្រួល៖ សេង ឡុង