ប៉ូលិស ប្រកាសមិនបន្ធូរដៃ លើការអនុវត្តច្បាប់ចរាចរណ៍
- 2018-01-09 09:05:58
- ចំនួនមតិ 0 | ចំនួនចែករំលែក 0
ប៉ូលិស ប្រកាសមិនបន្ធូរដៃ លើការអនុវត្តច្បាប់ចរាចរណ៍
ចន្លោះមិនឃើញ
ខណៈចំនួនអ្នកស្លាប់ដោយគ្រោះថ្នាក់ចរាចរណ៍មានការកើនឡើង នគរបាលចរាចរណ៍បានប្រកាសហើយថា នឹងមិនបន្ធូរដៃទៅលើការអនុវត្តច្បាប់ចរាចរណ៍នោះទេ មិនតែប៉ុណ្ណោះនគរបាលនឹងបន្តដាក់ចេញនូវយុទ្ធនាការចំនួនពីរនៅដើមឆ្នាំ ២០១៨នេះ។ នេះបើតាម លោក គៀត ច័ន្ទថារិទ្ធិ អ្នកនាំពាក្យអគ្គស្នងការនគរបាលជាតិ បានថ្លែងប្រាប់អ្នកយកព័ត៌មានកាលពីចុងសប្តាហ៍មុន។
លោកបានឱ្យដឹងថា យុទ្ធនាការទាំងពីរនោះរួមមាន ទី១ រឹតបន្តឹងទៅលើការបើកបរលើសល្បឿនកំណត់ និង ទី២ គឺការមិនពាក់មួកសុវត្ថិភាពនៅពេលបើកបរ។ ការបើកបរលើសល្បឿនកំណត់ និងមិនពាក់មួកសុវត្ថិភាពអំឡុងពេលបើកបរបានឆក់យកអាយុជីវិតជនរងគ្រោះជាបន្តបន្ទាប់ ហើយភាគច្រើន នៃជនរងគ្រោះគឺជាយុវជនវ័យក្មេង។ «យើងត្រួតពិនិត្យអ្នកស្លាប់ដោយជិះម៉ូតូទាំងអស់អត់មានវ័យចាស់ទេសុទ្ធតែយុវជន…អញ្ចឹងមានន័យថាយុវជនយើងក្លាហានបើកបរលឿន។ ដូច្នេះយើងនឹងសុំវិធានការជូនសម្ដេចក្រឡាហោមដោះស្រាយអាទិភាពទាំងពីរនេះ»។ លោក គៀត ច័ន្ទថារិទ្ធិ បន្ថែម។
លោកបានបដិសេធថា យុទ្ធនាការរឹតបន្តឹងច្បាប់ចរាចរណ៍នេះមិនមែននគរបាលធ្វើឡើង ដើម្បីចង់បានប្រាក់ពិន័យពីប្រជាពលរដ្ឋនោះទេ ពោលសកម្មភាពទាំងនេះគ្រាន់តែចង់ឱ្យមានការអនុវត្តច្បាប់ និងឈានទៅកាត់បន្ថយចំនួនរងរបួស និងស្លាប់ដោយសារគ្រោះថ្នាក់ចរាចរណ៍តែប៉ុណ្ណោះ។ «យើងខ្ញុំជាសមត្ថកិច្ចមិនចង់បង្កបញ្ហាអីឱ្យលំបាកទេ ព្រោះថាបើឃាត់ ទោះបីថាអត់ធ្វើអី ឱ្យយកមួកពីផ្ទះមកពាក់ ឬទិញមួកយកមកពាក់ ក៏លំបាកដែរ យើងខ្ញុំដឹង។ ប៉ុន្តែបើមិនធ្វើចឹង មិនទៅមុខហើយ មិនមែនជាពួកខ្ញុំជាប៉ូលីសទេ គ្រោះថ្នាក់ គឺបងប្អូនដែលជិះម៉ូតូហ្នឹងឯង។ អញ្ចឹងហើយសូមយោគយល់ និងអធ្យាស្រ័យ»។
ទាក់ទងនឹងបញ្ហានេះ លោក អ៊ា ចរិយា នាយកវិទ្យាស្ថានសុវត្ថិភាពចរាចរណ៍បានគាំទ្រទៅនឹងចំណាត់ការរបស់សមត្ថកិច្ច និងចាត់ទុកបញ្ហាបើកបរលឿន គឺជារឿងដ៏ចាំបាច់ និងជាមូលហេតុដែលបណ្តាលឱ្យគ្រោះថ្នាក់ចរាចរណ៍ ហើយការពាក់មួយសុវត្ថិភាពក៏ជាការចាំបាច់ផងដែរ ព្រោះបច្ចុប្បន្ននេះមានប្រជាពលរដ្ឋខ្មែរជាង ៨៥% ជិះម៉ូតូ។
របាយការណ៍កាលពីខែធ្នូ ឆ្នាំ២០១៧ បានបង្ហាញថា ចំនួនអ្នកគ្រោះថ្នាក់ស្លាប់ដោយជិះម៉ូតូមមានជាង៨០% នៃអ្នកគ្រោះថ្នាក់ចរាចរណ៍រួម ហើយក្នុងចំណោមអ្នកគ្រោះថ្នាក់ទាំងនោះ គឺមិនបានពាក់មួកសុវត្ថិភាពបានត្រឹមត្រូវ។ «ដូច្នេះបើយើងបានពាក់មួយសុវត្ថិភាពបានត្រឹមត្រូវខ្ញុំគិតថា យើងអាចកាត់បន្ថយអ្នកស្លាប់ និងរបួសធ្ងន់ធ្ងរ ដែលប៉ះទង្គិចត្រង់ក្បាលបានច្រើនដែរ ប៉ុន្តែអ្វីដែលខ្ញុំចង់បន្ថែមទៀតនោះគឺករណីគ្រោះថ្នាក់ចរាចរណ៍ដែលផ្ដើមចេញពីការបើកបរក្រោមឥទ្ធិពលនៃគ្រឿស្រវឹង”។
លោកបានបន្ថែមថា នៅឆ្នាំ ២០១៧កន្លងមកកម្រិត នៃការអនុវត្តច្បាប់ចរាចរណ៍ គឺមានចំនួនតិចតួចមែនទែនបើប្រៀបធៀបនឹងឆ្នាំ ២០១៦។ ដូច្នេះនៅឆ្នាំ ២០១៨ លោកសង្ឃឹមថា រាជរដ្ឋាភិបាលនឹងផ្តោតទៅលើកត្តាហានិភ័យចំនួនបី រួមមានការបើកបរហួសល្បឿនកំណត់ ការមិនពាក់មួយសុវត្ថិភាពបានត្រឹមត្រូវក្នុងពេលបើកបរ និងការបើកបរក្រោមឥទ្ធិពលនៃគ្រឿងស្រវឹង។ «ខ្ញុំគិតថា ការអនុវត្តច្បាប់រឹតបន្តឹងច្បាប់ដែលមានកម្ដៅដូចពេលបច្ចុប្បន្ននេះនឹងនៅតែរក្សាឱ្យមាននិរន្តរភាព និងយូរអង្វែង ដើម្បីឈានទៅផ្លាស់ប្ដូរឥរិយាបថប្រជាពលរដ្ឋដែលមិនទាន់បានគោរពច្បាប់ដូចជាការពាក់មួក ការបើកលឿន ការបើកក្រោយឥទ្ធិពលនៃគ្រឿងស្រវឹង និងការមិនគោរពសិទ្ធិអាទិភាពអីផ្សេងៗ»។
គ្រោះថ្នាក់ចរាចរណ៍ឆ្នាំ ២០១៧ បានកើតឡើងចំនួន ៣ ៥៣១ លើក បណ្តាលឲ្យមនុស្សស្លាប់ចំនួន ១ ៧៨០នាក់ និងរងរបួសចំនួន ៥ ៥៣៩នាក់ ភាគច្រើននៅរាជធានីភ្នំពេញ មានអ្នកស្លាប់ចំនួន១៦៨នាក់ ខេត្តកណ្តាលចំនួន ១៦០នាក់ និងខេត្តកំពង់ធំ ចំនួន ១២៤នាក់។
បន្ទាប់ពីគណៈកម្មការពិនិត្យឃើញ អត្រាអ្នកស្លាប់ដោយសារគ្រោះថ្នាក់ចរាចរណ៍មាន ការកើនឡើងនោះគឺភាគច្រើនកើតចេញពីការបើកបរលើសល្បឿនកំណត់ និងគ្មានពាក់មួកសុវត្ថិភាព។ ដូច្នេះដើម្បីកាត់បន្ថយការស្លាប់នោះនគរបាលនឹងចាប់ផ្តើមចាប់បង្ខំឲ្យបងប្អូន ប្រជាពលរដ្ឋគ្រប់រូបដែលជិះម៉ូតូពាក់មួកឲ្យបានគ្រប់ៗគ្នានៅក្នុងឆ្នាំ ២០១៨នេះ។
បើយោងតាមរបាយការណ៍របស់គណៈកម្មការក៏បានឲ្យដឹងផងដែរថា រថយន្តដឹកកម្មករទទួលរងគ្រោះថ្នាក់ចរាចរណ៍មានចំនួន ២៦លើក ដោយបណ្តាលឲ្យស្លាប់ចំនួន ៤នាក់ របួសចំនួន៤៨៤នាក់ហើយបានកើតឡើងនៅខេត្តចំនួន៩ មានដូចជាខេត្តស្វាយរៀង ខេត្តព្រះសីហនុ ខេត្តតាកែវ ខេត្តកំពង់ឆ្នាំង ខេត្តកំពង់ចាម ខេត្តកំពង់ស្ពឺ ខេត្តព្រៃវែង និងខេត្តកណ្តាលជាដើម ហើយមូលហេតុ ដែលបណ្តាលមកពីការធ្វេសប្រហែស និងកំហុសលក្ខណៈបច្ចេកទេសយានយន្ត៕
កុំច្រឡំថាចាប់មួយប្រាវ! នេះហើយផ្លូវទាំង២០ខ្សែ មានប៉ូលិសចល័តព្រោងព្រាត
Sត្រឹមមួយភ្លែត ៣រឿងប្លែកៗបំផុត ផ្ទុះកក្រើកកម្ពុជាគ្មានប្រទេសណាដូច
កក្រើកភ្នំពេញ! ចំណុចពិសេសបំផុត៤យ៉ាង រឿងចាប់អ្នកមិនគោរពច្បាប់ព្រឹកមិញ