ភៀសខ្លួនមកនៅអូស្រា្តលី អត់ចេះអង់គ្លេសមួយម៉ាត់ តស៊ូប្រលងបានពិន្ទុ ៩៩,៨៥ និងជួបរឿងស្មានមិនដល់

2018-01-10 00:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវជនចិនម្នាក់មានឈ្មោះថា Daniel Hu មិនអាចនិយាយភាសាអង់គ្លេសបានសូម្បីតែមួយម៉ាត់ នៅពេលរូបគេបានមកដល់ប្រទេសអូស្ត្រាលីលើកដំបូង ជាមួយឪពុកម្ដាយដែលជាជនអន្តោប្រវេសន៍។

Daniel Hu

ទោះជាយ៉ាងណា យុវជន Hu បានតស៊ូ និងខិតខំប្រឹងប្រែង រហូតអាចប្រលងបានពិន្ទុ ៩៩,៨៥ នៅក្នុងចំណាត់ថ្នាក់នៃថ្នាក់ឧត្ដមសិក្សារបស់អូស្ត្រាលី ATAR ហើយត្រូវអ្នកជំនួញមានទ្រព្យម្នាក់ ជួយបង់ថ្លៃសិក្សាថ្នាក់សកលវិទ្យាល័យជំនួសទៀតផង។

យុវជន Hu ដែលមានឪពុកម្ដាយជាអ្នកបោសសម្អាតផ្លូវ ខ្វះតែ ០,០៥ ពិន្ទុប៉ុណ្ណោះ (៩៩,៩០ពិន្ទុ) ដើម្បីទទួលបានអាហារូបករណ៍សិក្សាសញ្ញាប័ត្រផ្នែកច្បាប់។

យ៉ាងណាមិញ លោក David Lee ដែលបច្ចុប្បន្នជាអ្នកជំនួញសម្បូរទ្រព្យ និងធំធាត់ចេញពីគ្រួសារចិន-ម៉ាឡេស៊ីក្រីក្រ ក៏មកដល់ប្រទេសអូស្ត្រាលីទាំងគ្មានចេះភាសាអង់គ្លេសមួយម៉ាត់ដែរ។

យុវជន Hu បានប្រាប់ថា «លោក Lee មានការយល់ចិត្តច្រើនណាស់ ព្រោះលោកចាប់ផ្ដើមពីតូចតាចមកដែរ។ លោកបានបង់ថ្លៃសិក្សានៅសកលវិទ្យាល័យឲ្យខ្ញុំ ដែលវាពិតជាអស្ចារ្យណាស់ ហើយលោកក៏បានចេញថ្លៃដំណើរកម្សាន្តទៅក្រៅប្រទេសសម្រាប់ឪពុកម្ដាយខ្ញុំផងដែរ»។

យ៉ាងណាមិញ Hu បាននិយាយថា ឪពុកម្ដាយរបស់ខ្លួនប្រហែលជាមិនទទួលយកដំណើរកម្សាន្តក្រៅប្រទេសនោះទេ ប៉ុន្តែពួកគាត់ពិតជាកោតសរសើរចំពោះទឹកចិត្ត និងទង្វើរបស់ លោក Lee ខ្លាំងណាស់។

បច្ចុប្បន្ននេះ Hu ត្រូវបានក្រុមហ៊ុនច្បាប់ចំនួន ៣ ផ្ដល់ការងារក្រៅម៉ោងឲ្យធ្វើ និងបានចាប់ផ្ដើមបើកការបង្រៀនផ្ទាល់ខ្លួនទៀតផង៕