ត្រូវមានចំណុចទាំងនេះ មុនសម្រេចចិត្តធ្វើអាជីវកម្ម
- 2018-01-15 06:04:07
- ចំនួនមតិ 0 | ចំនួនចែករំលែក 0
ត្រូវមានចំណុចទាំងនេះ មុនសម្រេចចិត្តធ្វើអាជីវកម្ម
ចន្លោះមិនឃើញ
បើនិយាយដល់ការធ្វើជំនួញគឺចាំបាច់ត្រូវមានដើមទុនជាថវិកា ជំនាញ និងបទពិសោធន៍។ ប៉ុន្តែអ្នកដែលចង់ចាប់ផ្ដើម មុខជំនួញថ្មីថ្មោងប្រាកដណាស់ ថានឹងខ្វះនូវចំណុចពីរគឺជំនាញ និងបទពិសោធន៍ បើទោះបីធ្លាប់ធ្វើការងារជាបុគ្គលិកគេយូរប៉ុណ្ណាក៏ដោយ។
ចំណុចនេះ លោកឧកញ៉ា គួច ម៉េងលី អ្នកវិនិយោគលើវិស័យអប់រំមួយរូបនៅកម្ពុជា បានផ្ដាំទៅអ្នកដែលមានបំណងចង់ចេញរកស៊ីថា ត្រូវកសាងទំនុកចិត្ត និងភាពចាស់ទុំ តាមរយៈ ទំនាក់ទំនង ភាពស្មោះត្រង់ និងភាពច្បាស់លាស់ក្នុងការងារជាមុនសិន ទើបអាចឈរជើងបាននឹងល្អ។ ចំណុចទាំងនេះលោកថាពេលខ្លះពិបាករកជាងប្រាក់ទៅទៀត។
លោកឧកញ៉ាមានប្រសាសន៍ ទៅកាន់យុវវ័យដែលមានបំណងចង់ឈានជើងចេញរកស៊ីដោយខ្លួនឯងថាកុំដោយសារតែចង់ចំណេញ ឬទទួលបានផលប្រយោជន៍រហ័សសុខចិត្ត ប្រើវិធីសាស្ត្រផ្លូវកាត់ និយាយមិនប្រាកដប្រជា ប្រែក្រឡះមិនស្មោះត្រង់។
ជាងនេះទៅទៀតប្រើវិធីសាស្ត្រកេងចំណេញតាមរយៈការក្រឡុកតម្លៃជាដើម ដែលនេះ ជាហានិភ័យធ្ងន់ធ្ងរ ធ្វើឲ្យមុខជំនួញឆាប់រលាយ។ ត្រង់ចំណុចនេះលោកថាបើចង់កៀងគរ រកអ្នកវិនិយោគទុន ឬចូលហ៊ុនគ្នា ពេលជួបវិបត្តហិរញ្ញវត្ថុម្ដងៗ ពិតជាពិបាកណាស់។
លោកបន្ថែមថាៈ «ដូចខ្ញុំនិយាយដដែលៗក្មួយៗប្អូនខ្លះគាត់ចូលចិត្តរកស៊ីយកផ្លូវកាត់ ទី១គាត់អត់ទាន់បានរៀនសូត្រច្រើន គាត់អត់យល់ ការនិយាយស្តីរបស់គាត់ភ្លាវ ខ្វះចាស់ទុំនិយម ខ្វះភាពថ្លឹងថ្លែង...អ៊ីចឹងអាវប្បធម៌ ការគោរព ឲ្យតម្លៃ ថ្លៃថ្នូ ពាក្យពេចន៍មិនគ្រលាស់ បាតដៃខ្នងដៃ គឺវាស្មើនឹងលុយកាក់ដែលជួលកាលវាពិបាករកជាងលុយកាក់ផង»។
យុវជនមួយចំនួន តែងប្រហែសខ្លួន ខ្ជះខ្ជាយ មិនឲ្យតម្លៃ លើទំនាក់ទំនង ភាពស្មោះត្រង់ និងភាពច្បាស់លាស់ក្នុងការងារ និងមានជំងឺខ្លាចថាខ្លួនឯងចាស់ទុំ មិនសមនឹងវ័យ ដែលចំណុចនេះលោកឧកញ៉ាថា ជាគំនិតខុសស្រឡះ។
លោកឧកញ៉ា គួច ម៉េលី បន្ថែមថា ប្រើសិនមានថវិកាសមល្មម គួរវិនិយោគលើកាសិក្សាឲ្យបានជ្រៅជ្រះសិន រួចសឹមចេញធ្វើការយកបទពិសោធន៍ មុនឈានជើងធ្វើជំនួញ ដើម្បីធ្វើឲ្យខ្លួនឯងចាស់ទុំផ្នែកផ្នត់គំនិត ជៀសវាងប្រើផ្លូវកាត់ ចេញរកស៊ីតាមព្រេងតាមសំណាងនិងអាចខាតចុងលង់ដើមបាត់ទំនាក់ទំនង និងបាក់ទឹកចិត្ត៕