ដាក់ Boost និង Ads លើហ្វេសបុក មួយណាចំណេញជាង?
- 2018-01-19 02:44:31
- ចំនួនមតិ 0 | ចំនួនចែករំលែក 0
ដាក់ Boost និង Ads លើហ្វេសបុក មួយណាចំណេញជាង?
ចន្លោះមិនឃើញ
មនុស្សភាគច្រើនមានការភ័ន្តច្រឡំនូវពាក្យ Boosted Post និង Facebook Ads ហើយធ្វើឲ្យការប្រើប្រាស់ទទួលបានលទ្ធផលខុសពីការគិតរបស់ខ្លួន។
នៅលើបណ្ដាញសង្គម ជាពិសេសម្ចាស់អាជីវកម្មទំព័រតូចធំមួយចំនួន ធ្វើការផុសផ្សព្វផ្សាយផលិតផលនិងសេវាកម្មផ្សេងៗនិងអ្នកខ្លះដាក់លុយបន្ថែម ដើម្បីទទួលការ reach កាន់តែខ្ពស់ដល់អតិថិជន។
ដើម្បីបញ្ចៀសការយល់ច្រឡំទៅថ្ងៃមុខ Sabay បង្ហាញពីភាពខុសគ្នារវាងមុខងារទាំង ២ និងអត្ថប្រយោជន៍ដាច់ដោយឡែកពីគ្នា ដែលម្ចាស់ Page អាចទទួលបានពីក្រុមហ៊ុន Facebook។
+អ្វីទៅជា Boosted Post?
ជាទូទៅការបង្ហោះមិនថារូបភាពឬវីដេអូក្នុងទំព័រ Facebook យើងមិនអាចបោះឲ្យទៅដល់មនុស្សច្រើននោះទេ ដោយ Page ខ្លះបានត្រឹម ១ ភាគរយ ខ្លះ ១០ ភាគរយនៃចំនួន Like សរុប។ ដើម្បីឲ្យអ្នកប្រើប្រាស់បណ្ដាញសង្គមរាប់សែននាក់បានឃើញ Post ណាមួយ តាមការពេញនិយមគេច្រើនប្រើមុខងារ Boost ដែលស្ថិតនៅចំហៀងខាងក្រោមផ្នែកខាងស្កាំដៃ Post នោះ។
ដោយគ្រាន់ដំណើរការឆ្លងកាត់ក្នុង Facebook Page ហើយរង់ចាំការ Approve ពីក្រុមហ៊ុន Facebook ក្នុងរយៈពេលយ៉ាងយូរ ២៤ ម៉ោង។ ម្ចាស់ទំព័រក៏អាចធ្វើការកំណត់នូវទំហំចំណាយ, ប្រភេទបុគ្គលដែលចង់ឲ្យឃើញ (អ្នកស្រលាញ់កីឡា, បច្ចេកវិទ្យា...), ទីតាំង, អាយុ, ភេទ និងចំណង់ចំណូលចិត្តអ្នកប្រើ Facebook ដល់ទៅ ១០ ជម្រើស។ ការធ្វើបែបនេះក្នុងគោលដៅចង់ទទួលបាន Likes, Comments ឬចំនួន Click ឲ្យច្រើនជាងការបង្ហោះធម្មតា។
ក្នុងការកំណត់ទំហំចំណាយ Facebook ក៏បង្ហាញឲ្យឃើញពីខ្ទង់ចំនួន Reach និងការកំណត់ថេរវេលា Boost។ បើតាមច្បាប់កំណត់របស់ក្រុមហ៊ុន យ៉ាងតិច ១ ដុល្លារក្នុងមួយថ្ងៃ ដោយមិនអាចក្រោមពីនេះទៀតបានឡើយ។
+អ្វីទៅជា Facebook Ads?
និយាយសាមញ្ញអាចថាមុខងារនេះប្រើសម្រាប់ផ្សព្វផ្សាយស្លាកយីហោ (Brand) ដោយមិនផ្ដោតលើការបង្ហោះ (Post)។ មានលក្ខណៈស្មុគស្មាញបន្តិច ដោយអ្នកត្រូវចូលទៅកាន់ http://www.facebook.com/ads/create/ បន្ទាប់មកជ្រើសរើសនូវ Page ដែលអ្នកចង់ធ្វើការផ្សព្វផ្សាយ។ បង្ហាញជាលក្ខណៈ Page ទាំងមូល ដោយលោតចេញជារូប Cover បន្សំនឹងការបន្ថែមរូបមួយចំនួនផ្សេងទៀត ទៅតាមទំហំដែល Facebook បានកំណត់ ប៉ុន្តែមិនអនុញ្ញាតឲ្យប្រើប្រាស់អក្សរច្រើននៅលើរូបឡើយ (អក្សរ ២០ ភាគរយនៃទំហំរូប) ព្រោះមិនអាច Reach ទៅដល់ចំនួនច្រើន។
ជម្រើសនៃការកំណត់របស់អតិថិជនក៏មិនខុសគ្នានោះដែរ ធៀបទៅនឹងការ Boost Post ដោយយើងអាចធ្វើការប៉ាន់ប្រមាណពីចំនួន Reach ផ្អែកតាមទំហំចំណាយ បន្សំនឹងអាយុ, ភេទ, ភាសាប្រើប្រាស់, ចំណាប់អារម្មណ៍ និងប្រទេសណាមួយដែលចង់ឲ្យផ្សព្វផ្សាយទៅដល់។
ពេលដំណើរការចប់រួចរាល់ វានឹងបង្ហាញផ្ទាំងពាណិជ្ជកម្ម Page របស់យើង នៅផ្នែកខាងស្តាំដៃលើ Newsfeed របស់អ្នកប្រើប្រាស់ឯទៀត (ករណីពួកគេប្រើកុំព្យូទ័រ) ឬលោតនៅក្នុង Newsfeed ជាធម្មតាពេលពួកគេកំពុងអូសមើលអ្វីមួយ ដោយមានសញ្ញា Like Page នៅផ្នែកខាងស្តាំនៃផុសដោយស្វ័យប្រវត្តិ បន្សំនឹងពាក្យ Sponsor ពីខាងក្រោមឈ្មោះនៃ Facebook Page ដើម្បីសម្គាល់ថាយើងបានផ្សព្វផ្សាយ។
+តើអ្នកគួរប្រើប្រាស់មួយណាដើម្បីបានផលចំណេញច្រើន?
ប្រសិនបើអ្នកចង់បានចំនួន Like ច្រើន ពិតណាស់ដែលត្រូវប្រើប្រាស់មុខងារ Facebook Ads ព្រោះគ្រប់ជំហាននៃការបង្ហាញក្នុង Newsfeed របស់អ្នកប្រើ រមែងភ្ជាប់ប៊ូតុង Like Page ជានិច្ច ទៀតសោតក៏ចំណេញព្រោះអាចផ្សព្វផ្សាយ Brand យើងទៅកាន់បណ្ដាញសង្គម Instagram ថែមទៀតផង។
ចំណែកឯការ Boost Post វិញ យើងអាចទទួលបានប្រយោជន៍មួយបែបផ្សេង ព្រោះការបង្ហោះមួយនោះ នឹងអាចទៅដល់មនុស្សរាប់មុឺននាក់ ដោយចំណាយលុយផ្តើមចេញពី ១ ដុល្លារឡើងទៅ។ ដោយឡែកចំពោះម្ចាស់អាជីវកម្មប្រភេទលក់ទំនិញ Online ក៏អាចបើកចំហឲ្យអតិថិជនបានឃើញពីផលិតផលរបស់ខ្លួនច្រើន ខណៈបើជាម្ចាស់ Website អ្នកក៏អាចស្វែងរកចំនួន Click បានគួរសម។
បើនិយាយពីការចំណាយវិញ តាមបទពិសោធន៍របស់ Sabay ផ្ទាល់ ចំពោះ Facebook Ads បើយើងចាយខ្ទង់ ៥ ដុល្លារក្នុងមួយថ្ងៃចំនួន Like Page ជាមធ្យមបានប្រហែល ៣០០-៥០០ Likes ខណៈ Boost Post បើយើងចំណាយក្នុងទំហំដូចគ្នា បានទៅដល់មនុស្សប្រហែល ៤ ពាន់ទៅ ១ មុឺននាក់ផ្អែកតាមប្រភេទ Page និងផលិតផលដែលអ្នកបង្ហោះ។
បើសួរថាតើយើងគួរប្រើប្រាស់មួយណា Boost Post ជាជម្រើសដ៏ត្រឹមត្រូវបំផុត ព្រោះយើងចំណាយម្តងបានផលនៅលើការបង្ហោះនោះច្រើន ហើយបើក្រឡេកទៅម្ចាស់អាជីវកម្មភាគច្រើន រមែងប្រើមុខងារនេះ ដោយសារ Facebook Ads យើងគ្រាន់តែទទួលបាន Likes ហើយបើពេលក្រោយយើងមិន Boost Post ការបង្ហោះនោះក៏ទៅដល់អ្នកប្រើត្រឹមតែ ១ ទៅ ១០ ភាគរយប៉ុណ្ណោះនៃចំនួន Likes សរុប។ ផ្ទុយទៅវិញប្រសិនបើអ្នកជាម្ចាស់ Brand ល្បីឈ្មោះ ដែលចង់ទទួលបាន Facebook Page មួយមានអ្នក Like ច្រើន និងមិនគិតផលចំណេញ ជម្រើសល្អបំផុតគឺ Facebook Ads។
ប្រភព: https://www.reloadmedia.com.au/searchstrategy/social-media/the-difference-between-facebook-ads-boosted-posts/ https://www.socialmediaexaminer.com/facebook-boost-posts-promoted-posts/
ចុច Like និង See First ដើម្បីទទួលព័ត៌មានបច្ចេកវិទ្យាមុនគេ......
អានអត្ថបទ:
ធនាគារកណ្ដាលប្រទេសចិន បញ្ជាឲ្យបិទចរាចររូបិយប័ណ្ណឌីជីថលជាបន្ទាន់
របៀបដំណើរការ Siri លើ iPhone X ខុសគ្នាដាច់ពីម៉ូដែលមុនៗ