មកស្គាល់គូប្រកួតរបស់ រិន សារ័ត្ន ក្នុងទ្រុង ONE Championship នៅឥណ្ឌូណេស៊ី

2018-01-19 03:38:15
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាករគុនខ្មែរ រិន សារ័ត្ន នឹងត្រូវប៉ះកីឡាករម្ចាស់ផ្ទះ Sunoto នៅក្នុងកម្មវិធីប្រកួតក្បាច់គុនចម្រុះ ONE: Kings of Courage របស់ស្ថាប័ន ONE Championship នាថ្ងៃទី២០ ខែមករា នៅទីក្រុងហ្សាការតា ប្រទេសឥណ្ឌូណេស៊ី។

Sunoto ជាកីឡាករលេចធ្លោមួយរូប ក្នុងចំណោមកីឡាករក្បាច់គុនចម្រុះ MMA របស់ឥណ្ឌូណេស៊ី។ អ្វីដែលគួរឲ្យចាប់អារម្មណ៍ គឺប្រកួតចុងក្រោយរបស់ Sunoto ក៏ប៉ះកីឡាករកម្ពុជាដូចគ្នាដែរ គឺកីឡាករ ចាន់ ហេង កាលពីខែមករា ឆ្នាំ២០១៧។ នៅក្នុងការប្រកួតនោះ Sunoto បានវាយ ចាន់ ហេង ឲ្យសន្លប់ក្នុងទឹកទី១។

Sunoto និយាយក្នុងសន្និសីទកាសែតមុនការប្រកួត

ចាប់តាំងពីពេលនោះមក Sunoto ត្រូវស្ថាប័ន ONE Championship ដាក់ឈ្មោះឲ្យប្រកួត ២កម្មវិធីទៀត ប៉ុន្តែសុទ្ធតែត្រូវលុបចោលវិញ។ មួយប្រកួតក្នុងចំណោម២ប្រកួតនោះ Sunoto ត្រូវប៉ះកីឡាករកម្ពុជា ថៃ រិទ្ធី ក្នុងខែកញ្ញា ឆ្នាំ២០១៧ តែ Sunoto បានដកខ្លួននៅមុនការប្រកួតមកដល់ ដោយសារជំងឺផ្ដាសាយ ដែលធ្វើឲ្យ ថៃ រិទ្ធី ត្រូវជួបកីឡាករម៉ាឡេស៊ី Maye ជំនួសវិញ (ថៃ រិទ្ធី ឈ្នះ)។

អំឡុងពេលខកខានប្រកួតក្នុងទ្រុង MMA កីឡាករដែលមានរហស្សនាម The Terminator រូបនេះ បានជាប់ជម្រើសជាតិឥណ្ឌូណេស៊ី ផ្នែកកីឡា Sambo (កីឡាក្បាច់គុនមួយប្រភេទ មានដើមកំណើតនៅរុស្ស៊ី)។ ក្រោយជាប់ក្នុងក្រុមជម្រើសជាតិ Sunoto ត្រូវទៅហ្វឹកហាត់នៅប្រទេសរុស្ស៊ី ដើម្បីត្រៀមប្រកួត Asian Games ឆ្នាំ២០១៨ ប៉ុន្តែសំណាងមិនល្អ វិញ្ញាសា Sambo ត្រូវដកចេញពីកម្មវិធីប្រកួតវិញ។

Sunoto និង រិន សារ័ត្ន បង្ខាញខ្លួនក្នុងសន្និសីទកាសែតមុនការប្រកួត

Sunoto បានអះអាងថា ខ្លួនបានត្រៀមរួចជាស្រេច ដើម្បីប្រកួតតទល់នឹង រិន សារ័ត្ន នៅមុខអ្នកគាំទ្ររបស់ខ្លួនជាច្រើនម៉ឺននាក់នៅ Jakarta Convention Center។ " ខ្ញុំត្រៀមរួចរាល់អស់ហើយ។ ខ្ញុំមានជំនឿចិត្ត ដោយសារខ្ញុំបានហ្វឹកហាត់ដើម្បីប្រកួតនេះ អស់រយៈពេលពេញមួយឆ្នាំមកហើយ។ ខ្ញុំមានជំនឿចិត្តថាអាចធ្វើបាន"។

គួរបញ្ជាក់ថា កំណត់ត្រាក្នុងទ្រុង MMA របស់ Sunoto គឺប្រកួត៩ដង ឈ្នះ ៦ និងចាញ់ ៣។ ក្នុងចំណោម ៩ប្រកួតនោះ គឺមាន ៧ប្រកួត ក្នុងស្ថាប័ន ONE Championship។

រិន សារ័ត្ន ថ្លែងក្នុងសន្និសីទកាសែត

ចំណែក សារ័ត្ន វិញ ជាកីឡាករលេចធ្លោមួយរូបក្នុងសង្វៀនប្រដាល់គុនខ្មែរ។ ទោះខានប្រកួត MMA យូរ តែកូនសិស្សលោកគ្រូហ៊ុន ចាន់រាជ ប្រចាំក្លឹប Cambodian Top Team រូបនេះ ក៏ធ្លាប់មានបទពិសោធន៍ច្រើនគួរសមដែរ ពោលគឺ សារ័ត្ន ធ្លាប់ឈ្នះជើងឯករង ក្នុងកម្មវិធីប្រកួតក្បាច់គុនចម្រុះរបស់ MYTV កាលពីចុងឆ្នាំ ២០១៤ ហើយក៏ធ្លាប់ប្រកួតក្នុងទ្រុង ONE Championship បានមួយប្រកួតដែរ ដោយបានយកឈ្នះកីឡាករ Mission Ali នាខែធ្នូ ឆ្នាំ២០១៥៕