នារីជប៉ុនដែលត្រូវគេបំពានរាងកាយលើរថភ្លើង ៦ឆ្នាំ សរសេរសៀវភៅរៀបរាប់បទពិសោធន៍ឈឺចាប់

2018-01-24 04:43:30
ចំនួនមតិ 0 | ចំនួនចែករំលែក 0

ចន្លោះមិនឃើញ

នារីជនជាតិជប៉ុនដែលត្រូវបានគេបំពានរាងកាយ (ស្ទាបអង្អែល) នៅលើរថភ្លើងអស់រយៈពេល ៦ឆ្នាំ បានសរសេរ និងបោះពុម្ពសៀវភៅ ដែលរៀបរាប់អំពីបទពិសោធន៍ដ៏ឈឺចាប់របស់នាង។

ការបំពាន ឬ ស្ទាបអង្អែលរាងកាយនៅលើសេវាកម្មដឹកជញ្ជូនសាធារណៈ ឬហៅថា Chikan គឺជារឿងរ៉ាវដែលតែងកើតឡើងនៅក្នុងប្រទេសជប៉ុន។ សិស្សសាលា គឺជាជនរងគ្រោះទូទៅ ពីមនុស្សប្រុសធ្វើការលើសកំណត់ ដែលធ្វើរឿងទាំងនេះដើម្បីបំបាត់ស្ត្រេស។

នៅក្នុងសៀវភៅដែលមានចំណងជើងថា «Tchikan» នាង Kumi Sasaki ដែលបច្ចុប្បន្នរស់នៅទីក្រុងប៉ារីស ប្រទេសបារាំង បានប្រាប់ពីរឿងរ៉ាវនៃការរំលោភបំពានជារៀងរាល់ថ្ងៃ ដែលនាងទទួលរងពីអាយុ ១២ ដល់ ១៨ ឆ្នាំ ពោលគឺតាំងពីរៀនថ្នាក់មធ្យមសិក្សាដល់ថ្នាក់វិទ្យាល័យ។

នាង Kumi Sasaki

ក្នុងនោះដែរ នាងបានរំលឹកពីឧប្បត្តិហេតុ Chikan ដំបូងរបស់នាង ថា «ម្រាមដៃដែលមិនធ្លាប់ស្គាល់របស់គេ បានលូកចូលមកក្នុងកអាវរបស់ខ្ញុំ។ បន្ទាប់មកគេបានស្ទាបខ្នង , ជើង , ចង្កេះ និងគូទរបស់ខ្ញុំ។ គេបានលើកសំពត់របស់ខ្ញុំឡើងយ៉ាងស្ងៀមស្ងាត់ ដោយគ្រាន់តែប្រើម្រាមដៃរុញ ហើយបានប៉ះភ្លៅខាងឆ្វេងរបស់ខ្ញុំទៀតផង»។

ទោះបីជាយ៉ាងណា នេះគ្រាន់តែជាការចាប់ផ្ដើមនៃបទពិសោធន៍ដ៏អាក្រក់របស់ នាង Sasaki តែប៉ុណ្ណោះ។ ក្នុងរយៈពេលជាង ៦ ឆ្នាំមកនេះ នាងត្រូវបានបំពាន និងស្ទាបអង្អែលដោយបុរសគ្រប់វ័យ ចាប់ពីវ័យជំទង់ ដល់ ៧០ឆ្នាំ។ មិនតែប៉ុណ្ណោះ Chikan បានដាក់សម្ពាធផ្នែកអារម្មណ៍ និងផ្លូវចិត្តលើ នាង Sasaki យ៉ាងខ្លាំង រហូតដល់ថ្នាក់គិតចង់សម្លាប់ខ្លួនទៀតផង៕