ឆ្កែចេះជិះរថភ្លើងរាប់រយគីឡូម៉ែត្រដើម្បីស្វែងរកម្ចាស់

2018-01-27 02:32:28
ចំនួនមតិ 0 | ចំនួនចែករំលែក 0

ចន្លោះមិនឃើញ

វាពិតជាគួរឱ្យភ្ញាក់ផ្អើលមែនទែន ដែលឆ្កែមួយក្បាលបានធ្វើដំណើរតែឯងតាមរថភ្លើងក្នុងចម្ងាយ ផ្លូវដល់ទៅ ១៨០ គីឡូម៉ែត្រ និងថែមទាំងចេះ ប្តូរស្ថានីយនៅក្នុងទីក្រុងមែនឆេស្ទ័រ (Manchester) ប្រទេសអង់គ្លេស ទៀតផង។

ឆ្កែដែលមានឈ្មោះថា “ដូបឺមែន” (Doberman) ខាងលើនេះត្រូវបានជួយសង្គ្រោះដោយអ្នកស្ម័គ្រចិត្ត ដែលជឿថាវាជាឆ្កែអនាថា បន្ទាប់ពីប្រទះឃើញវាតែម្នាក់ឯងនៅម្តុំស្ថានីយរថភ្លើង ប័មីងហាំ ញូវ ទ្រិត( Birmingham New Street) ក្នុងទីក្រុងបឺមីងហែម (Birmingham)។

បន្ទាប់ពីវាត្រូវបានបញ្ជូនទៅជួបពេទ្យសត្វសម្រាប់ការពិនិត្យ គេបានប្រទះឃើញបន្ទះមីក្រូឈីប ពាក់ជាប់នឹងវា។ ហើយលទ្ធផលនៃការស្រាវជ្រាវពីបន្ទះឈីបនោះបានបង្ហាញថា វាបានធ្វើដំណើរចេញ ពីតំបន់ប្រជុំជនហាត់ដឺហ្វៀល (Hudderfield)។

ពួកគេបានសន្និដ្ឋានថា សុនខនេះច្បាស់ជាបានផ្លាស់ប្តូរខ្សែរថភ្លើងនៅស្ថានីយ មែនឆេស្ទ័រ ភីខេដីលី ( Manchester Piccadilly) ដែលភ្ជាប់ទីក្រុងទាំងពីរ។ ការធ្វើដំណើរនេះអាចចំណាយរហូតដល់ ៧ ម៉ោង។

សូមបញ្ជាក់ថា ឆ្កែនេះកំពុងទទួលបានការមើលថែជាបណ្តោះអាសន្ននៅមណ្ឌលសង្គ្រោះសត្វ ហៀលប្រេ គេណែល ( Hilbrae Kennels) នៅថែលហ្វដ (Telford) តំបន់ស្រប់សៀ (Shropshire) ហើយបុគ្គលិកនៅទីនោះកំពុងអំពាវនាវរកម្ចាស់ ដោយសង្ឃឹមថាវានឹងបានជួបជុំម្ចាស់របស់វាវិញ ក្នុងពេលឆាប់ៗ៕