ចិនគ្រោងជម្លៀសអ្នកភូមិជាង ១៥ ០០០ នាក់ចេញពីផ្នូររាជវង្សមីង ព្រោះហេតុផលមួយ

2018-01-29 02:39:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រជាជនប្រមាណជា ១៥ ០០០ នាក់មកពី ១៦ភូមិ ដែលរស់នៅលើផ្ទៃដី ៨៧ គីឡូម៉ែត្រការ៉េ នឹងត្រូវជម្លៀសចេញពីតំបន់ជុំវិញផ្នូររាជវង្ស មីង។

លោក Zhang Yanyou ប្រធានរដ្ឋបាលស្រុក Changping បាននិយាយថា បច្ចុប្បន្ន ភ្ញៀវអាចចូលទស្សនាបានត្រឹម ៣ ផ្នូរប៉ុណ្ណោះ ក្នុងចំណោម ១៣ផ្នូរ។ ហេតុដូចនេះហើយ គម្រោងនេះ ត្រូវបានធ្វើឡើង ដើម្បីជួសជុលផ្នូរនៃអធិរាជ មីង និងដាក់ឲ្យសាធារណជនអាចចូលទស្សនាផ្នូរទាំង ១៣ ក្រោយពីការជួសជុលរួចរាល់។

លោក Zhang បានបន្តថា ជញ្ជាំងប្រវែង ៨០ គីឡូម៉ែត្រ នឹងត្រូវបានសាងសង់ឡើងនៅជុំវិញតំបន់ផ្នូររាជវង្ស មីង ក្រោយពេលដែលអ្នកភូមិត្រូវបានជម្លៀសចេញ។ លើសពីនេះទៀត ផ្លូវចំនួន ៣ ខ្សែ ដែលឆ្លងកាត់តំបន់នេះ ក៏នឹងត្រូវផ្លាស់ប្តូរផងដែរ ដោយសារតែមានការប៉ះពាល់ដល់ការអភិរក្ស និងការគ្រប់គ្រងតំបន់នេះ។

គួរបញ្ជាក់ថា បណ្ដុំផ្នូរដែលគេស្គាល់ឈ្មោះថា ផ្នូរទី ១៣ នៃរាជវង្ស មីង គឺជាកន្លែងទាក់ទាញភ្ញៀវទេសចរដ៏ល្បីល្បាញមួយ ដែលមានចម្ងាយប្រហែល ៥០គីឡូម៉ែត្រ ភាគពាយព្យនៃទីក្រុង ប៉េកាំង។ ហើយតំបន់នេះ ក៏ត្រូវបានបញ្ជីបេតិកភណ្ឌពិភពលោក UNESCO កាលពីឆ្នាំ ២០០៣ ផងដែរ៕