ល្អខ្លាំង! កម្ពុជានឹងមានព្រលានយន្តហោះថ្មីចែស៣កន្លែង និងផ្លូវហាយវ៉េឆ្លងប្រទេស

2018-01-30 02:19:23
ចំនួនមតិ 0 | ចំនួនចែករំលែក 0

ចន្លោះមិនឃើញ

គម្រោងអភិវឌ្ឍហេដ្ឋារចនាសម្ព័ន្ធលំដាប់កំពូលៗជាច្រើន ត្រូវបានរាជរដ្ឋាភិបាលសម្រេចជាបន្តបន្ទាប់។ ក្នុងនោះគម្រោងសាងសង់ព្រលានយន្តហោះអន្តរជាតិថ្មី៣កន្លែងនៅកម្ពុជា នឹងចាប់ផ្ដើមសាងសង់ក្នុងឆ្នាំ២០១៨នេះ។ ចំណែកឯផ្លូវហាយវ៉េឆ្លងប្រទេសក៏រដ្ឋាភិបាលកំពុងសិក្សាដែរ។

១. ព្រលានយន្តហោះអន្តរជាតិភ្នំពេញថ្មីនៅខេត្តកណ្ដាល

រាជរដ្ឋាភិបាលបានសម្រេចសាងសង់ព្រលានយន្តហោះអន្តរជាតិថ្មី លើផ្ទៃដីទំហំប្រមាណ ២,៦០០ហិកតា ស្ថិតនៅក្នុងក្រុងតាខ្មៅ និងស្រុកកណ្តាលស្ទឹង ខេត្តកណ្តាល។

រូបតំណាង

ប្រលានយន្តហោះថ្មីនេះ ត្រូវចំណាយទុនវិនិយោគរហូតដល់ទៅ ១,៥០០លានដុល្លារអាមេរិក។ ក្នុងនោះទឹកប្រាក់ ១,១០០លានដុល្លារ ជាកម្ចីពីធនាគារបរទេស និង ២៨០លានដុល្លារជារបស់ក្រុម OCIC របស់ឧកញ៉ា ពុង ខៀវសែ ហើយដើមទុនចុះបញ្ជីមានរហូតដល់ ១២០លានដុល្លារអាមេរិក។

ឧកញ៉ា ពុង ឃាវសែ ប្រធានសមាគមវិនិយោគអនិកជននៅកម្ពុជា បានចុះកិច្ចព្រមព្រៀងក្របខណ្ឌ ស្ដីពីកិច្ចសហប្រតិបត្តិការណ៍ ជាមួយក្រុមហ៊ុនចិនជាដៃគូវិនិយោគនោះ នៅថ្ងៃទី១១ ខែមករា ឆ្នាំ២០១៨ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងលោក លី ខឺឈាង នាយករដ្ឋមន្ត្រីចិន។

២. ព្រលានយន្តហោះអន្តរជាតិថ្មីនៅខេត្តសៀមរាប

អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល លោក ស៊ិន ចាន់សិរីវុត្ថា បានឲ្យដឹងថា ព្រលានយន្តហោះថ្មីខេត្តសៀមរាប នឹងត្រូវសាងសង់នាពេលឆាប់ៗនេះ នៅលើផ្ទៃដូជាង៧០០ហិកតា និងបោះទុនវិនិយោគលើទឹកប្រាក់៨៨០លានដុល្លារអាមេរិក ក្រោមការវិនិយោគដោយក្រុមហ៊ុនYUNAN Development Group ដែលជាក្រុមហ៊ុនយក្សមួយមានមូលដ្ឋាននៅប្រទេសចិន។

៣. ព្រលានយន្តហោះអន្តរជាតិថ្មីនៅខេត្តកោះកុង

ព្រលានយន្តហោះលំដាប់អន្តរជាតិថ្មីមួយនៅខេត្តកោះកុង ដែលវិនិយោគដោយក្រុមហ៊ុនUnion Development Group (UDG) របស់ប្រទេសចិន បាននឹងកំពុងចាប់ផ្តើមសាងសង់ហើយ។ នេះបើតាម អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល លោក ស៊ិន ចាន់សិរីវុត្ថា។

ព្រលានយន្តហោះអន្តរជាតិនេះ ស្ថិតនៅក្នុង ស្រុកបទុមសាគរ ខេត្តកោះកុង គ្រោងវិនិយោគទឹកប្រាក់ចន្លោះពី ៣០០ទៅ៣៥០លានដុល្លារអាមេរិក។ បច្ចុប្បន្ននេះ កំពុងចាប់ផ្ដើមឈូសឆាយដី ដើម្បីរៀបចំជាការដ្ឋានហើយ។លោកបានបន្ថែមទៀតថា ព្រលានយន្តហោះនេះមានទំហំដី៧៥០ហិកតា ជាលក្ខណៈខ្នាតអន្តរជាតិតែម្ដង ហើយអាចទទួលការចុះចតយន្តហោះមកពីគ្រប់ទិសទី។

៤. ផ្លូវហាយវ៉េ ឥណ្ឌា-មីយ៉ាន់ម៉ា-ថៃ នឹងត្រូវតភ្ជាប់មកកម្ពុជា

ប្រមុខដឹកនាំកម្ពុជា និងឥណ្ឌា បានសម្តែងការពេញចិត្តចំពោះវឌ្ឍនភាពនៃកិច្ចប្រឹងប្រែងធ្វើការតភ្ជាប់ក្នុងតំបន់ ដូចជាផ្លូវហាយវ៉េត្រីភាគី ឥណ្ឌា-មីយ៉ាន់ម៉ា-ថៃ និងបានឯកភាពរិះរកលទ្ធភាពដើម្បីពង្រីកបន្តផ្លូវហាយវ៉េនេះឲ្យមកដល់កម្ពុជា និងហួសពីកម្ពុជាទៅទៀត។ នេះបើយោងតាមសេចក្តីថ្លែងការណ៍រួមស្តីពីទស្សនកិច្ចផ្លូវការរបស់សម្តេច ហ៊ុន សែន នៅសាធារណរដ្ឋឥណ្ឌា កាលពីថ្ងៃទី២៧ ខែមករា ឆ្នាំ២០១៨។

រូបតំណាង

ផ្លូវហាយវ៉េត្រីភាគី ឥណ្ឌា-មីយ៉ាន់ម៉ា-ថៃ គឺតភ្ជាប់ពីក្រុង Moreh ក្នុងរដ្ឋ Manipur ប្រទេសឥណ្ឌា រហូតដល់ក្រុង Mae Sot ប្រទេសថៃ ដោយឆ្លងកាត់ប្រទេសមីយ៉ាន់ម៉ា។ បើតាមគម្រោង ផ្លូវហាយវ៉េនេះ នឹងពង្រីកដល់កម្ពុជា ឡាវ និងវៀតណាម។

លោក Nitin Gadkari រដ្ឋមន្រ្តីដឹកជញ្ជូនឥណ្ឌា បានបញ្ជាក់កាលពីពេលថ្មីៗនេះថា ផ្លូវហាយវ៉េ ឥណ្ឌា-មីយ៉ាន់ម៉ា-ថៃ នឹងអាចដំណើរការបាននៅខែធ្នូ ឆ្នាំ២០១៩។ ផ្លូវប្រវែងប្រហែល ១៤០០គីឡូម៉ែត្រនេះ នឹងជួយជំរុញដល់វិស័យពាណិជ្ជកម្ម សុខភាព អប់រំ និងទេសចរណ៍ ក្នុងប្រទេសទាំង៣នេះ៕

ចុចអាន៖

អត្ថបទ៖ វឌ្ឍនៈ