ជាង២ម៉ឺននាក់ប្រឈមឆ្លងអេដស៍ដោយសារធ្វើធ្មេញ

2014-11-12 21:10:53
ចំនួនមតិ 0 | ចំនួនចែករំលែក 0

ចន្លោះមិនឃើញ

បណ្ដាប្រធានសុខាភិបាលអង់គ្លេស នឹងធ្វើការកោះហៅអ្នកជំងឺត្រឡប់មកវិញ ជាលក្ខណៈទ្រង់ទ្រាយធំមួយដែលមិនធ្លាប់មានក្នុងប្រវត្តិសាស្ត្រសេវាសុខភាពជាតិអង់គ្លេស។ ការកោះហៅធ្វើឡើង ក្រោយមានការភ័យខ្លាចថា មនុស្សរាប់ពាន់នាក់អាចឆ្លងជំងឺអេដស៍ និងជំងឺផ្សេងទៀត។

អ្នកជំងឺជាង២២០០០នាក់ នឹងឆ្លងកាត់ការធ្វើតេស្តឈាម ក្រោយទទួលការព្យាបាលពីពេទ្យធ្មេញម្នាក់ ដែលមិនបានអនុវត្តត្រឹមត្រូវ តាមរបៀបស្តង់ដារបច្ចេកទេស។ ពួកគេនឹងត្រូវធ្វើតេស្តរកមេរោគឆ្លងតាមឈាម និងរោគថ្លើមប្រភេទ B និង C ផងដែរ។

លោកគ្រូពេទ្យធ្មេញនេះ ត្រូវគេសង្ស័យកាលពីខែកក្កដា ក្រោយមនុស្សម្នាក់ បានថតសកម្មភាពព្យាបាល ដែលមិនត្រូវតាមស្តង់ដារ។ ក្រោយមើលវីដេអូហើយ ក្រុមប្រធានសុខាភិបាល បានដាក់ការស៊ើបអង្កេត ហើយអំពាវនាវឱ្យបុគ្គលិក មកពីមន្ទីរសុខភាពសាធារណៈអង់គ្លេសទាំងអស់ជួយលើករណីនេះ។

បន្ទាប់មានការអំពាវនាវយ៉ាងដូច្នេះ ពួកគេក៏បានវាយតម្លៃ លើហានិភ័យនៃការព្យាបាលនៅគ្លីនិក ហើយសន្និដ្ឋានថា អ្នកជំងឺជាច្រើន អាចប្រឈមឆ្លង មេរោគឆ្លងតាមឈាម។

ប្រភពខាងលើបានបញ្ជាក់ថា អ្នកជំងឺជាង១៦០នាក់ ត្រូវគេរាយការណ៍ កំពុងប្រឈមមុខនឹងការឆ្លងរោគខ្លាំងបំផុត។ ពួកគេនិយាយថា ពេទ្យធ្មេញដែលគេហទំព័រ Mirror សុំមិនបញ្ចេញឈ្មោះ ធ្វើខុសស្តង់ដារនៃការព្យាបាល។

លោកគ្រូពេទ្យធ្វើឱ្យគេភ័យគ្រប់គ្នានេះ បានបើកក្លីនិកក្នុងទីក្រុង Nottingham អស់រយៈពេល៣២ឆ្នាំមកហើយ និងបានព្យាបាលអ្នកជំងឺជាង២២០០០នាក់។ លោកត្រូវអគ្គក្រុមប្រឹក្សាធ្មេញ ផ្អាកអាជីវកម្ម១៨ខែ ដោយត្រូវរង់ចាំការស៊ើបអង្កេត៕