គ្រូបង្វឹក សុខ ធី ស្រឡាញ់វិស័យប្រដាល់ ចង់ប្រើជីវិតមួយនេះឲ្យស្គាល់គ្រប់រសជាតិ

2018-02-06 02:15:15
ចំនួនមតិ 0 | ចំនួនចែករំលែក 0

ចន្លោះមិនឃើញ

លោកគ្រូ សាន់ សាយយ៉ាន់ ថា ដោយសារស្រឡាញ់វិស័យប្រដាល់មួយនេះ ទើបចង់ភ្លក់រសជាតិគ្រប់យ៉ាង មិនថាជាគ្រូបង្វឹក ឬធ្វើអាជ្ញាកណ្ដាល ចៅក្រម នោះឡើយ។

លោកគ្រូ សាន់ សាយយ៉ាន់

លោក សាន់ សាយយ៉ាន់ បានឲ្យដឹងថា ត្រេកអរជាខ្លាំងដែលបានអ្នកគ្រប់គ្រងប្រដាល់នៅសង្វៀនបាយ័នយោគយល់ និងអនុញ្ញាតឲ្យធ្វើជាចៅក្រម និងអាជ្ញាកណ្ដាលនៅទីនោះ។ ដោយចិត្តស្រឡាញ់ខាងវិស័យប្រដាល់តាំងពីដើមផងនោះ ធ្លាប់ជាកីឡាករឡើងសង្វៀនរាប់ភ្លេច និងជាគ្រូបង្វឹកផង ទើបចង់សាកការឡើងធ្វើអាជ្ញាកណ្ដាល ឬចៅក្រមនៅសង្វៀនធំៗម្ដង។

លោកគ្រូ សាន់ សាយយ៉ាន់ កំពុងធ្វើអាជ្ញាកណ្ដាល

គ្រូប្រដាល់របស់កីឡាករ សុខ ធី បន្ថែមថា បើទោះជាធ្លាប់ធ្វើជាចៅក្រម អាជ្ញាកណ្ដាល ២-៣ ឆ្នាំ នៅឯខេត្តក្ដី ប៉ុន្តែនៅតែភ័យពេលបានឡើងធ្វើលើកដំបូងនៅភ្នំពេញ។ សង្វៀននៅប៉ុស្តិ៍បាយ័ននេះធំ និងមានមនុស្សទស្សនាច្រើន ហើយបន្តផ្ទាល់តាមទូរទស្សន៍ជាហេតុធ្វើឲ្យលោកនៅតែភ័យ ប៉ុន្តែអាចថាឡើងចាប់កីឡាករប្រហែល ១០ដងទៅ អាចប្រសើរឡើងវិញហើយ។ ការធ្វើអាជ្ញាកណ្ដាលនៅភ្នំពេញវាខុស ពីការធ្វើនៅឯខេត្តដែលភាគច្រើនជាកីឡាករតូចៗ និងវ៉ៃរញ៉េរញ៉ៃ ខណៈកីឡាករនៅភ្នំពេញចេះវ៉ៃតាមក្បួនខ្នាត និងមិនសូវពិបាកបំបែក ឬញែកចេញនោះឡើយ ព្រោះពួកគេដឹងអស់ហើយ។ ក្រៅពីនេះ ការធ្វើជាអាជ្ញាកណ្ដាលក៏ល្អម្យ៉ាងសម្រាប់លោកផងដែរ អាចថាងាយស្រួលចាប់គូឲ្យកូនសិស្សបានឡើងប្រកួតជាងមុនផង។

លោកគ្រូ សាន់ សាយយ៉ាន់ កំពុងធ្វើអាជ្ញាកណ្ដាល

លោក សាន់ សាយយ៉ាន់ ជាគ្រូប្រដាល់មកពីខេត្តបន្ទាយមានជ័យ និងបានឡើងធ្វើអាជ្ញាកណ្ដាលនៅសង្វៀនបាយ័នស្ទឹងមានជ័យក្នុងកម្មវិធីប្រដាល់ គូបូតា កាលពីថ្ងៃសុក្រ ទី២ កន្លងទៅនេះ៕

អត្ថបទ៖ នួន ស៊ីណា