អាជ្ញាធរត្រៀមចុះពង្រឹងការប្រើប្រាស់អក្សរខ្មែរលើផ្លាកយីហោ នៅខេត្តព្រះសីហនុ

2018-02-08 08:28:02
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានមន្ទីរទេសចរខេត្តព្រះសីហនុ បានបង្ហើបប្រាប់ Sabay ថា មន្ទីរទេសចរខេត្ត និងស្ថាប័នពាក់ព័ន្ធនឹងចុះពង្រឹងច្បាប់ដល់បណ្ដាហាងមួយចំនួន ដែលប្រើប្រាស់អក្សរបរទេសធំជាងខ្មែរ ឬដាក់អក្សរខ្មែរនៅក្រោមអក្សរបរទេស ឬគ្មានអក្សរខ្មែរតែម្ដង។

លោក តាំង សុចិត្រគីស្នា ប្រធានមន្ទីរទេសចរខេត្តព្រះសីហនុ បានប្រាប់ Sabay កាលពីរសៀលថ្ងៃនេះថា ក្រោយពីមានកិច្ចប្រជុំកាលពីម្សិលមិញមកនោះ រដ្ឋមន្ត្រីក្រសួងទេសចរបានជំរុញឲ្យគ្រប់ស្ថាប័នមន្ទីរសហការគ្នាពង្រឹងច្បាប់ ដោយចុះណែនាំ និងត្រួតពិនិត្យជនបរទេសមករកស៊ីនៅក្នុងខេត្តព្រះសីហនុ ដោយធ្វើយ៉ាងណាឲ្យពួកគេគោរពច្បាប់របស់ខ្មែរ។ នៅក្នុងការពង្រឹងនេះក៏មានវិធានការត្រួតពិនិត្យ និងណែនាំ នៃការប្រើប្រាស់អក្សរខ្មែរលើផ្លាយីហោ ផ្សព្វផ្សាយពាណិជ្ជកម្ម ដែលមិនគោរពច្បាប់របស់ខ្មែរ។

វិធានខាងការខាងលើនេះ ធ្វើឡើងក្រោយពីមានមហាជន ក៏ដូចជាអ្នកប្រើប្រាស់បណ្ដាញសង្គមហ្វេសបុក ជារឿយៗ ថតរូបបង្ហោះ នៃការសរសេរអក្សរចិន លើផ្ទាំងផ្សាយពាណិជ្ជកម្ម ឬការផ្សព្វផ្សាយយីហោរបស់ខ្លួន ដោយពុំមានអក្សរខ្មែរ ឬដាក់អក្សរខ្មែរនៅក្រោមអក្សរចិនជាដើម។

រូបភាពនេះ ត្រូវបានគេចែកចាយលើបណ្ដាញសង្គមហ្វេសបុក

ប្រធានមន្ទីរទេសចរណ៍រូបនេះបានឲ្យដឹងទៀតថា វិធានការនេះ មិនមែនមានតែមន្ទីរទេសចរទេ គឺមានកិច្ចសហការជាមួយស្ថាប័នពាក់ព័ន្ធ ដើម្បីចុះត្រួតពិនិត្យ និងណែនាំ ដល់បណ្ដាអ្នករកស៊ីបរទេស ជាពិសេសជនជាតិ ដែលមិនបានដឹងអំពីច្បាប់ស្រុកខ្មែរ។

«អាចថាកន្លងមកយើងនៅខ្សោយការផ្សព្វផ្សាយដល់វិនិយោគិនបរទេស ចឹងហើយទើបកើតមានរឿងមិនប្រក្រតីមួយចំនួន ដូច្នេះចាប់ពីពេលនេះ យើងនឹងចុះផ្សព្វផ្សាយនឹងពង្រឹងច្បាប់ ដើម្បីធ្វើយ៉ាងណាឲ្យពួកគេយល់ដឹងច្បាប់ នៅក្នុងប្រទេសកម្ពុជា»។

ការប្រើប្រាស់អក្សរលើផ្លាកត្រឹមត្រូវ ដែលមានអក្សរខ្មែរនៅលើ អក្សរបរទេសនៅក្រោម

គេនៅចាំបានថា លោកបណ្ឌិត ប៉ែន សុផល រដ្ឋលេខាធិការក្រសួងរៀបចំដែនដី និងក្រុមការងារស្ថាប័នពាក់ព័ន្ធ នៃរដ្ឋបាលខេត្តព្រះសីហនុ ក៏ធ្លាប់បានចុះពិនិត្យការដ្ឋានសំណង់មួយចំនួន ដែលមានស្លាកយីហោ ឬផ្ទាំងប៉ាណូជាអក្សរចិន។ លោក ប៉ែន សុផល ក៏បានណែនាំ ដល់តំណាងភាគីអ្នកវិនិយោគចិន ស្ដីអំពីការប្រើប្រាស់អក្សរខ្មែរ និងអក្សរបរទេស ឬអក្សរចិន នៅលើផ្ទាំងគំនូរសំណង់ ឬផ្លាកសញ្ញាផ្សព្វផ្សាយនៅតាមតំបន់ឆ្នេរ ឲ្យបានត្រឹមត្រូវស្របតាមការណែនាំរបស់ក្រសួងផងដែរ៕

អត្ថបទ៖ ប៊ិន ប៊ុណ្ណា