ថ្មីបំផុត! ស្ពានអាកាស២កន្លែងនឹងបើកការដ្ឋានមុនចូលឆ្នាំខ្មែរ ចំចំណុចស្ទះផុតលេខ

2018-02-19 02:09:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាដំណឹងល្អមួយសម្រាប់ប្រជាពលរដ្ឋរស់នៅរាជធានីភ្នំពេញ ដែលតែងធុញទ្រាន់ចំពោះបញ្ហាកកស្ទះចរាចរណ៍ ដោយរដ្ឋាភិបាលគ្រោងនឹងបើកការដ្ឋានសាងសង់ស្ពានអាកាសថ្មី២កន្លែងទៀត នៅមុនចូលឆ្នាំខ្មែរខាងមុខនេះ។ ស្ពានអាកាសថ្មីទាំង២កន្លែងនោះ មានដូចជា៖

១. ស្ពានអាកាសថ្មីនៅច្រមុះជ្រូកក្បាលថ្នល់

ស្ពានអាកាស១កន្លែងទៀត គ្រោងនឹងសាងសង់នៅច្រមុះជ្រូកក្បាលថ្នល់ជាមួយនឹងផ្លូវ ៦០ម៉ែត្រ ដែលជាចំណុចប្រសព្វផ្លូវ ៦០ម៉ែត្រ ផ្លូវព្រះមុនីវង្ស និងផ្លូវ២៧១ ជាប់ព្រំប្រទល់ខណ្ឌមានជ័យ និងខណ្ឌចំការមន ក្បែរនឹងស្ពានអាកាសក្បាលថ្នល់។ ស្ពានអាកាសថ្មីនេះ គ្រោងនឹងបើកការដ្ឋានមុនចូលឆ្នាំថ្មីប្រពៃណីខ្មែរខាងមុខនេះ។

រូបភាព៖ រដ្ឋបាលរាជធានីភ្នំពេញ

លោក ម៉េត មាសភក្តី អ្នកនាំពាក្យសាលារាជធានីភ្នំពេញ បានឲ្យដឹងថា នៅក្នុងកិច្ចប្រជុំរវាងសាលារាជធានីភ្នំពេញ ជាមួយតំណាងក្រុមហ៊ុន OCIC និងអាជ្ញាធរពាក់ព័ន្ធ កាលពីឆ្នាំ ២០១៧ បានលើកឡើងពីកាត់បន្ថយការស្ថាបនាស្ពាន២ខ្សែ នៅស្ពានអាកាសក្បាលថ្នល់ ពោលគឺនៅរក្សាតែស្ពានបន្ថែមមួយខ្សែប៉ុណ្ណោះ ដោយរត់ពីផ្លូវព្រះមុនីវង្សឡើងទៅផ្លូវព្រះនរោត្តម។ ការកាត់បន្ថយនេះ គឺដោយសារតែការដោះស្រាយផលប៉ះពាល់ មានចំនួនទឹកប្រាក់ច្រើនលើសលប់ពេក រហូតដល់រាប់លានដុល្លារ ទើបរដ្ឋបាលរាជធានីភ្នំពេញ សម្រេចសាងសង់ស្ពានអាកាសមួយកន្លែងទៀតនៅច្រមុះជ្រូកក្បាលថ្នល់វិញ។

អ្នកនាំពាក្យសាលារាជធានីភ្នំពេញ បន្ថែមទៀតថា បន្ទាប់ពីមានការស្ថាបនាស្ពានអាកាសច្រមុះជ្រូកក្បាលថ្នល់នេះរួច នឹងអាចដោះស្រាយការកកស្ទះចរាចរណ៍ នៅតំបន់នេះបានយ៉ាងរលូនជាក់ជាមិនខាន។

២. ស្ពានអាកាស និងផ្លូវក្រោមដីចោមចៅ

ស្ពានអាកាស និងផ្លូវក្រោមដីនៅតំបន់រង្វង់ចោមចៅ ដែលមានទីតាំងស្ថិតក្នុងសង្កាត់ចោមចៅ ខណ្ឌពោធិសែនជ័យ រាជធានីភ្នំពេញ នឹងត្រូវបើកការដ្ឋានសាងសង់ឡើង នៅអំឡុងបុណ្យចូលឆ្នាំថ្មីប្រពៃណីជាតិខ្មែរខាងមុខ។ នេះបើតាមលោក ម៉េត មាសភក្ដី អ្នកនាំពាក្យសាលារាជធានីភ្នំពេញបានថ្លែងប្រាប់ sabay ។

ប្លង់ស្ពានអាកាសថ្មី នៅចោមចៅ (រូបភាព៖ រដ្ឋបាលរាជធានីភ្នំពេញ)

លោកបានបន្ថែមថា ក្រុមការងារបច្ចេកទេសបានសម្រេចជ្រើសរើសប្លង់ចុងក្រោយរួចហើយ ក្នុងចំណោមប្លង់ចន្លោះ ៦ ប្លង់ ទៅ ៧ប្លង់ តាមរយៈកិច្ចប្រជុំ កាលពីថ្ងៃទី១៤ ខែកុម្ភៈ ឆ្នាំ២០១៨ ក្រោមអធិបតីភាពលោក ឃួង ស្រេង អភិបាលល នៃគណៈអភិបាលរាជធានីភ្នំពេញ។ ការសាងសង់ស្ពានអាកាស និងផ្លូវក្រោមដីត្រូវបានធ្វើឡើង ក្នុងគោលបំណងសម្រួលចរាចរណ៍ដល់អ្នកធ្វើដំណើរនៅផ្លូវជាតិលេខ៤ ផ្លូវជាតិលេខ៣ ផ្លូវចោមចៅ និងមហាវិថីសហព័ន្ធរុស្ស៊ី ចេញចូលមករាជធានីភ្នំពេញមិនឱ្យមានកកស្ទះ។

ប្លង់ស្ពានអាកាសថ្មី នៅចោមចៅ (រូបភាព៖ រដ្ឋបាលរាជធានីភ្នំពេញ)

លោក ភក្តី មិនបានបញ្ជាក់ពីទំហំទឹកប្រាក់ និងរយៈពេលនៃការសាងសង់បានទេ ពោលគឺត្រូវរង់ចាំរហូតដល់ពេលបើកការដ្ឋានសាងសង់ទើបអាចបញ្ជាក់បាន។

បច្ចុប្បន្ននេះ នៅក្នុងរាជធានីភ្នំពេញមានស្ពានអាកាសចំនួន ៥កន្លែង គឺស្ពានអាកាសក្បាលថ្នល់ នៅអតីតរង្វង់មូលក្បាលថ្នល់ ស្ពានអាកាសស្ទឹងមានជ័យ ស្ពានអាកាស៧មករា ស្ថិតនៅស្តុបពេទ្យលោកសង្ឃ និងស្ពានអាកាស៥មករា ស្ថិតនៅស្ដុបតិចណូ ហើយបច្ចុប្បន្នសំណង់ស្ពានអាកាស មួយនៅស្តុបផ្សារដីហុយក៏ស្ថាបនាជិតរួចរាល់ហើយដែរ និងគ្រោងដាក់ដំណើរការមុនចូលឆ្នាំខ្មែរ៕

ចុចអាន៖

អត្ថបទ៖ វឌ្ឍនៈ