Nissan នឹងដាក់ដំណើរការសេវាតាក់ស៊ីបើកបរស្វ័យប្រវត្តិ នៅជប៉ុនខែក្រោយ

2018-02-25 08:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន Nissan កំពុងរៀបចំដាក់ដំណើរការសេវារថយន្តតាក់ស៊ីបើកបរដោយស្វ័យប្រវត្តិ ហៅថា Easy Ride សម្រាប់ថ្ងៃទី ០៥ ខែមីនា ដោយមានការចាប់ដៃគូជាមួយនឹងក្រុមហ៊ុន DeNa។

ក្រុមហ៊ុន DeNa (អានថា D-N-A) ជាក្រុមហ៊ុនសេវា Online របស់ជប៉ុន សកម្មច្រើនក្នុងវិស័យដឹកជញ្ជូន និងគំនិតផ្ដួចផ្ដើមផ្សេងៗរួមមាន តាក់ស៊ីបើកបរស្វ័យប្រវត្តិ ការចែករំលែករថយន្តប្រើប្រាស់ និងចំណតរួម។ ក្នុងឆ្នាំ ២០១៦ ក្រុមហ៊ុននេះបានដំណើរការសេវារថយន្តក្រុងស្វ័យប្រវត្តិហៅថា Robot Shuttle។

ការសាកល្បងដំបូងគឺ អ្នកធ្វើដំណើរនៅស្រុក Minato Mirai ក្រុង Yokohama ក្នុងតំបន់ Kanagawa Prefecture របស់ជប៉ុន នឹងអាចប្រើរថយន្តបើកបរស្វ័យប្រវត្តិ ដោយប្រើកម្មវិធីថ្មី។ រថយន្តនឹងកំណត់តំបន់ធ្វើដំណើរការ ៤.៥ គីឡូម៉ែត្រ ចន្លោះពីការិយាល័យកណ្ដាលរបស់ Nissan និងផ្សារទំនើប Yokohama World Porters។ រថយន្តនឹងស្ថិតក្រោមការត្រួតពិនិត្យពីចម្ងាយ។

ក្នុងរថយន្តមាន Tablet មួយផ្ដល់ជម្រើសទីតាំងជាង ៥០០ កន្លែង ហើយនឹងមាន Coupon បញ្ចុះតម្លៃពីហាងផ្សេងៗជាច្រើន តាមតំបន់ សម្រាប់ទាញយកលើទូរសព្ទអ្នកចូលរួម។ អ្នកចូលរួម នឹងស្នើឲ្យបំពេញនូវការយល់ឃើញ (Survey) ទាក់ទងនឹងសេវាកម្ម និងតម្លៃផងដែរ។ ក្រុមហ៊ុនលើកឡើងថា ខ្លួននឹងពង្រីកសេវាកម្មឲ្យកាន់តែធំ ត្រឹមឆ្នាំ ២០២០។

Nissan នឹងចូលរួមក្នុងចំណាត់ថ្នាក់ក្រុមហ៊ុនឈានជើងចូលផ្នែករថយន្តបើកបរស្វ័យប្រវត្តិជាមួយនឹង Uber, Lyft, Ford, GM, Didi Chuxing, Waymo និងក្រុមហ៊ុនមួយចំនួនទៀត។

Nissan នឹងមានគូរប្រជែងធំមួយគឺក្រុមហ៊ុន Sony ដែលថ្មីៗនេះបានប្រកាសថា ខ្លួននឹងចាប់ដៃគូជាមួយក្រុមហ៊ុន Daiwa Motor Transportation និងក្រុមហ៊ុនតាក់ស៊ីក្នុងស្រុក ៥ ទៀត ក្នុងប្រទេសជប៉ុន ដើម្បីបង្កើតប្រព័ន្ធតាក់ស៊ីថ្មីមួយ ដើម្បីផ្គូផ្គងរវាងអ្នកបើកបរ និងអ្នកធ្វើដំណើរតាមរយៈកម្មវិធីទូរសព្ទ៕