ព្រោះឥទ្ធិពល Black Panther ឆ្មាខ្មៅត្រូវគេសុំយកទៅចិញ្ចឹមគ្មានសល់មួយក្នុងហាង

2018-03-01 04:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ភាពជោគជ័យនៃរឿង Black Panther បានធ្វើឲ្យការសុំសត្វឆ្មាសម្បុរខ្មៅទៅចិញ្ចឹមមានការកើនឡើងលើសពីការរំពឹងទុក។

បើតាមបុគ្គលិកម្នាក់ក្នុងកន្លែងសត្វចិញ្ចឹមមួយនៅទីក្រុង Durango ក្នុងរដ្ឋColorado បាននិយាយថា៖ "ផលប្រយោជន៍ដែលទទួលបានពីរឿង Black Panther គឺទទួលបានលើសពីការរំពឹងទុក។ កន្លែងចិញ្ចឹមសត្វក្នុងតំបន់របស់ខ្ញុំ ធ្លាប់តែមានឆ្មាសម្បុរខ្មៅពី៥០ ទៅ ៦០ក្បាល ឥឡូវនេះគ្មានសល់សូម្បីតែមួយក្បាល។ ព្រោះថា ពួកគេបានសុំទៅហើយដាក់ឈ្មោះតាមតួអង្គនៅក្នុងរឿងនេះ។ ឈ្មោះ "T'challa” គឺពេញនិយមជាងគេ ប៉ុន្តែក៏មានឈ្មោះផ្សេងទៀតដែរ ដូចជា "Okoyes និង Shuris អីជាដើមហ្នឹង"។

រោងភាពយន្តមួយឈ្មោះ The Alamo Drafthouse ក្នុងទីក្រុង Richardson នៃរដ្ឋ Texas បានសហការគ្នាជាមួយមជ្ឈមណ្ឌល Operation Kindness សម្រាប់ការចិញ្ចឹមកូនឆ្មាតូចក្នុងកន្លែងរបស់ពួកគេផងដែរ។ អ្នកគ្រប់គ្រងឈ្មោះ Daniel Wallace បាននិយាយថា៖ "វាអាចជាការផ្សព្វផ្សាយមួយសម្រាប់រឿង "Black Panther។ ពួកយើងនឹងផ្ដល់សំបុត្រកុន២សន្លឹកដោយឥតគិតថ្លៃចំពោះអ្នកណាដែលយកឆ្មាមួយក្បាលទៅចិញ្ចឹម"។

ឆ្មាសម្បុរខ្មៅត្រូវបានមនុស្សទូទៅចាត់ទុកថាជាសត្វមិនល្អ នាំភាពចង្រៃចូលផ្ទះ ប៉ុន្តែចាប់តាំងពីរឿង "Black Panther” នេះចាប់ផ្ដើមចាក់បញ្ចាំងរួចមក មនុស្សជាច្រើនងាកមកចាប់អារម្មណ៍លើឆ្មាសម្បុរបែបនេះច្រើន៕